«Moriyón desprecia la democracia y tien secuestráu l’Ayuntamientu» denuncia la oposición énte’l bloquéu establecíu por Carmen Moriyón a responder entrugues sobre la condena del Tribunal de Cuentes por embolsase de forma illegal más de 30.000 euros. La oposición quier que l’alcaldesa respuenda nel próximu plenu y ella ta evitando tener que responder a les consultes usando tolos poderes que-y permiten el cargu.
Los voceros de PSOE, Izquierda Xunida y Podemos comparecieron güei na Casa Conceyu pa denunciar el bloquéu de l’alcaldesa forista de Xixón.
“Nun quier qu’haya debate nel plenu, nun quier sometese a les entrugues de control de la oposición y nun quier dar esplicaciones a la ciudadanía”, denuncia’l voceru d’Izquierda Xunida, Javier Suárez Llana.
“Carmen Moriyón sigue tapeciendo la verdá. Pidimos tresparencia y esiximos que faiga pública la documentación qu’acreite que reintegró’l dineru público qu’utilizó de manera irregular”, reclamen dende’l PSOE xixonés.
“Moriyón niégase a responder énte la ciudadanía sobre los sos sobresueldos illegales: inalmiten toles entrugues de la oposición de forma unillateral y arbitraria.
Enfótense en qu’esta cacicada tenga menos repercusión que dar la cara en plenu. Llévenlo claro, nun vamos callar”, esplicó Olaya Suárez, vocera de Podemos Xixón.
