Una persona perdió la vida nun accidente de tráficu na AS-35 al so pasu pol conceyu de Villayón. El camión nel que circulaba esta persona cayó de la carretera por un desnivel, unos 25 metros, y incendióse, provocando una pequeña quema forestal. El vehículu quedó nel cantu del calce d’un ríu qu’escurre por esti llugar.
El Centru de Coordinación d’Emerxencies recibió l’avisu a les 16:15 hores. Na llamada indicóse qu’un camión cayera d’una ponte, empezara a quemar y nun se vía al so conductor. De momentu movilizóse al Xefe de Bomberos de la Zona Noroccidental, a los efectivos de Bomberos del Serviciu d’Emerxencies del Principáu d’Asturies (SEPA) de los parques de Valdés y Barres, a unu de los helicópteros multifunción de Bomberos del SEPA, con efectivos de la base de Ibias, y al Grupu de Rescate de Bomberos, a bordu del helicópteru medicalizado.
Una vegada na zona, la quema y el llugar, de bien mal accesu, nel que s’atopaba’l camión torgó la intervención del equipu de rescate que permaneció nel llugar, marcando dende l’aire onde s’atopaba’l vehículu accidentáu. De siguío, llegó’l restu d’efectivos de Bomberos del SEPA. L’helicópteru multifunción, al pie de los bomberos de Ibias, realizó una serie descargues coles que s’escastó’l fueu qu’afectó a maleza. Coles mesmes, el restu de la dotación, xuntu al Xefe de Zona, baxó hasta’l camión. Foise montando un tendíu de mangones para escastar les llapaes del camión, de la que se rastrexaba l’espaciu en busca del posible ocupante del vehículu, por si pudiera salir despidíu del mesmu.
Los bomberos utilizaron agua y espluma para escastar el fueu del camión. Les llapaes xamuscaron la cabeza tractora del camión, ente que la góndola, que taba vacida, nun resultó quemada. Foi mientres les xeres d’estinción, cuando los efectivos de bomberos alcontraron el cuerpu ensin vida de la persona que circulaba nel mesmu. Tres la pertinente autorización, la dotación de bomberes va dar en portear el cuerpu ensin vida d’esta persona hasta la carretera.
La sala del 112 del SEPA informó a la Guardia Civil, al Serviciu d’Atención Médica Urxente (SAMU) qu’activó la UVI Móvil de Xarrio y al serviciu de caltenimientu de la calzada.
