Un camioneru finó n’entornando’l camión que conducía al altor del puntu kilométricu 87 de la AP-66, en sentido Asturies, nel conceyu de Ḷḷena. Según los datos facilitaos pol Serviciu d’Atención Médica Urxente (SAMU) el fallecíu ye un varón de 52 años d’edá. Los servicios sanitarios movíos al llugar, equipu médicu de la UVI-móvil de Mieres namás pudieron confirmar el so fallecimientu.
Los restos mortales del fináu tuvieron que ser escarcelaos por efectivos de Bomberos del Serviciu d’Emerxencies del Principáu d’Asturies (SEPA), con base nos parques de Mieres y Llamorgal. Los bomberos tuvieron qu’asitiar coxinos d’alta presión para llevantar la cabina y poder abrir buecu para estrayer al conductor. Para llevar a cabu la escarcelación los bomberos tuvieron que poner l’equipu de respiración autónoma cuidao que el camión tresportaba sosa caústica en paquetes y ácidu sulfúrico.
Los restos mortales del fináu tuvieron que ser escarcelaos de la cabina
El Centru de Coordinación d’Emerxencies del 112 Asturies recibió al avisu a les 06.23 hores. Na llamada señalaben qu’un camión entornara na autopista. Desconocíase lo que tresportaba y si había persones mancaes. Minutos dempués dende la empresa concesionaria de l’autopista indiquen que tienen cerrada l’autopista y que’l camión nun tresporta mercancíes peligroses anque finalmente confírmase que si lo ye. Añeden que’l camioneru ta atrapáu y que’l tráiler cutió a una máquina quitanieves. Ta entornáu na mediana.
La Sala 112 del SEPA moviliza a bomberos del parque de Mieres y otra dotación dende’l parque de La Morgal. A les 06.57 hores confirmen que’l conductor ta atrapáu y empecipien llabores d’escarcelación. A les 08.03 informen que yá escarcelaron al conductor que ta fináu. Amás d’activar a los bomberos comunicóse lo asocedío al SAMU qu’unvió los medios yá citaos y a la Guardia Civil de Tráficu que se fixo cargu de los trámites para proceder al llevantamientu del cadabre. A les 08.33 hores los bomberos del parque de Llamorgal retiren del incidente para tornar a la so base y pocu dempués facer la dotación movida dende Mieres.
