Una persona finó y otra resultó mancada nun accidente de tráficu nel que se vieron implicaos un turismu y un vehículu 4×4, na N-630, llegando a Campumanes, en L.lena. Por causes que se desconocen topetaron frontolateralmente.
Dambos tuvieron que ser escarcelaos de los vehículos que conducíen por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Mieres. Hasta’l llugar tamién se movilizó otra dotación dende’l parque de San Martín de Rey Aurelio y el xefe de zona centro-este.
Según los datos facilitaos pol Serviciu d’Atención Médica Urxente (SAMU) el fináu ye un varón de 87 años d’edá. El mancáu, un varón de 26 años d’edá, foi treslladáu al Hospital Álvarez Buylla con pronósticu reserváu, por cuenta de más pruebes y hasta nueva valoración médica. Foi atendíu nel llugar del accidente pol equipu médicu de la UVI-móvil mierense que darréu lo treslladó al centru hospitalariu. Hasta’l llugar tamién se movió l’equipu d’Atención Primaria de Campumanes cola ambulancia de soporte vital básicu de La Pola L.lena.
Pa escarcelar al mancáu los bomberos cortaron la pilastra central del vehículu, retiraron la puerta y estrayéronlu con ayuda de la tabla de rescate. En recibiendo la correspondiente autorización dieron en lliberar al fináu, conductor del vehículu 4×4. El vehículu taba entornáu sobre un llateral. Los bomberos cortaron el techu y retiraron tamién el volante pa poder abrir buecu y escarcelalu. La Guardia Civil fíxose cargu de los trámites pa proceder al llevantamientu del cadabre.
