El conductor d’un turismu perdió la vida tres salise de la vía col vehículu col que circulaba y chocar contra una roca, en circunstancies que se desconocen, nel AS-117, al altor del puntu quilométricu 30, en Sobrescobiu.
Según los datos facilitaos pol Serviciu d’Atención Médica Urxente (SAMU) l’equipu médicu movíu al llugar, Atención Primaria de Sobrescobiu, namás pudo confirmar el so fallecimientu. Foi precisamente esti equipu, el primeru en llegar al incidente, el que sacó a la víctima del interior del turismu yá qu’el motor taba echando fumu y temién que’l vehículu empezara a quemar. Un vecín de la zona apagólu con un estintor.
Hasta’l llugar movióse una dotación de Bomberos del Serviciu d’Emerxencies del Principáu d’Asturies (SEPA) con base nel parque de Samartín del Rei Aurelio. Los bomberos revisaron el vehículu y remataron la estinción con agua quedando afectao solo una parte del motor.
El Centru de Coordinación d’Emerxencies del 112 Asturies recibió l’avisu a les 09.08 hores. Na llamada indicaben qu’un vehículu con una persona nel so interior saliera de la vía y chocara frontalmente contra una roca.
