Dos persones, un home y una muyer, finaron nun accidente de tráficu rexistráu na A-8, al altor del puntu kilométricu 299, al altor de la salida de Bamori, en dirección Galicia, conceyu de Llanes.
Dambos, de nacionalidá inglesa, viaxaben nuna motocicleta que, por causes que se desconocen, terminó entornando na vía. Los restos mortales de la muyer tuvieron que ser escarcelaos de debaxo d’un turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Llanes.
Según datos facilitaos pol Serviciu d’Atención Médica Urxente (SAMU) l’equipu médicu de la UVI-móvil de Les Arriondes que se movió al llugar namás pudo confirmar el so fallecimientu. Trátase d’un varón de 68 años y una muyer de 65. La Guardia Civil fíxose cargu de los trámites pa proceder al llevantamientu de los cadabres.
Dase la circunstancia que na redoma d’esti accidente producióse unu choque por alcance d’otru vehículu contra un camión. El conductor del vehículu, un varón, foi treslladáu al hospital de Les Arriondes con una contusión torácica. Foi atendíu nel llugar del accidente pol equipu d’Atención Primaria de Llanes y treslladáu na ambulancia de soporte vital básicu de la zona.
