Grande Amore llega a Asturies. El 28 de payares, la Sala Estilo d’Uviéu recibe al proyectu gallegu nun conciertu mui especial xunto a Alba Reche, nel marcu de la xira Vibra Mahou. Entre ruíu, distorsión y una identidá cada vez más sólida, Grande Amore vive’l so momentu más estensu y ambiciosu, con más de cincuenta feches de directu y una evolución artística que los lleva a apostar polo esencial: los bonos cantares, ensin artificios.
Col humor irreverente y la sinceridá desarmaos que los caracteriza, falamos con ellos sobre esta xira, el choque de realidaes que suponen les sos collaboraciones, la so mirada al futuru y un presente nel que, ente’l vértigu y la ilusión, siguen demostrando que lo suyo ye salir al escenariu y darlo too.
- ¿Qué significa pa vosotros formar parte de la xira Vibra Mahou y cómo encaxa cola vuestra propuesta musical?
Pa nós, formar parte de los conciertos de Vibra Mahou ye una allegría enorme. Siempres que daquién cunta con nós pa un ciclu asina, pa un festival, pa una sala… ver que los promotores ponen el so enfotu, el so esfuerciu y el so tiempu en ti ye mui reconfortante. Y una responsabilidá tamién, claro.
- ¿Cómo tais viviendo esta xira en comparación con otres nes que participestis?
Esta xira ta siendo la más estensa de toles que fiximos hasta agora, y eso que solo llevamos poco más de mediu añu. Pa finales de 2025, daríamos 55 conciertos dende’l 13 de marzu. Los directos siguen funcionando y siendo la parte fundamental d’esti proyectu, y paez que por fin (toco madera) tamos abriendo un furaquín en dellos festivales grandes a nivel estatal, amás de tocar en sitios emblemáticos de la nuesa tierra como pue ser la Praza da Quintana en Santiago de Compostela o la Sablera de Riazor n’A Coruña. Esperemos que too siga asina de bien y creciendo adulces.
- ¿Qué puede esperar el públicu asturianu del conciertu del 28 de payares?
Nos conciertos dámoslo too, eso dende llueu. El públicu que nos venga a ver esti vienres puede esperar ruíu, distorsión, munchos berros… ¡Oi, yo creo que ye una bona forma d’acabar la selmana!
- ¿Hai dalgo especial preparao pa la fecha d’Asturies que nun se viera n’otres paraes de la xira?
Lo más especial ya inauditu d’esti conciertu va ser, ensin dala dulda, el fechu de tocar con Alba Reche, que ye a día de güei compañera nuesa de sellu. Pue que este seya unu de los mayores choques de realidaes que se vieren nunca na nuesa hestoria. Creyo firmemente que vamos espantar al 90% del públicu d’Alba, y dígolo como daqué inclusive tienru. Recuérdame a cuando de chaval diba a conciertos de hardcore y metalcore que se celebraben en Burela (el mio pueblu), y como muncha xente (yo incluyíu) a los dos cantares escapaba apavorada de la Plaza de Abastos ante esi estrueldu.
- Grande Amore caracterízase por una identidá musical mui personal. ¿Cómo definiríeis agora mesmo la vuestra evolución artística?
Pos… agora mesmo diríate que tamos intentando ser cada vez más un grupu de verdá, al usu. Nun usar tanto’l gimmick d’intentar fundir electrónica y rock pa da-y a esti una vuelta, sinón a cencielles dexanos llevar a la esencia mesma de les composiciones. Esto ye, que si una cantar pide guitarra, baxu y batería… pos, eso, facela con guitarra, baxu y batería. Que, güeyu, quiciabes el puru gimmick yera la clave de la gracia o l’interés que podía tener pa muncha xente’l proyectu, pero bono, asina somos, hai qu’arriesgar nesta vida.
- ¿Qué cambió na vuestra manera de componer dende los vuestros primeros llanzamientos hasta anguaño?
Pa bien o pa mal, too. Yo escucho los primeros cantares de Grande Amore y veo los proyectos que tengo nel ordenador de cantares inacabaos, y la verdá ye que nun me reconozo n’absolutu neses composiciones. Pero supongo que ye lo normal, vamos. Pasaron yá 7 años dende esos primeros aproximamientos, y naide ye’l mesmu que yera va 7 años. Camuden los tos gustos, los tos referentes, les tos aspiraciones…
- ¿Dalguna influencia recién —musical o non musical— que tea marcando la nueva etapa del grupu?
Diríate que los cantares que toi empezando a facer pa lo que va ser (nun futuru más o menos próximu) el cuartu discu de Grande Amore, tán mui influyíes por Black Sabbath y por The White Stripes. A ver qué sale d’ehí…
- ¿En qué táis trabayando agora mesmo? ¿Podéis adelantrar daqué sobre próximes temes o proyectos?
En munches coses, la verdá. Ello ye que lo lóxico (pal proyectu) y saludable (pa mi) sedría nun tar metíu en tantos fregaos al empar. Tenemos un par de collaboraciones bastante importantes pa nós a puntu de salir, toi trabayando nun split con una banda de Santiago qu’almiro muncho de dende va munchos años, tamién empezando a componer pal discu nuevu… Yá te digo, demasiaes coses. Pero asina foi siempres, asina tien que ser y asina va ser.
- ¿Hai collaboraciones que vos gustaría esplorar llueu?
Sí, y yá te digo, dos d’elles cumpliéronse. Dame rabia nun poder dicir más y que paeza como que faigo clickbait en vista al futuru, pero ye que claro, nun depende solo de mi dicilo y…
- Cuando imaxináis el futuru de Grande Amore, ¿pa ónde vos gustaría llevar el proyectu?
Yo, imaxinar, lo que ye imaxinar… siempres lo imaxino mal, si te soi sinceru. Siempres creo que’l fin ta cerca, que la xente va aburrise de nós y qu’a partir del siguiente añu yá s’acabó too. Por suerte, toi (creyo) empezando a aprender a relativizar esos pensamientos y a ser consciente de que son namás frutu de la mio congoxa. Lo cual nun quier dicir que, efectivamente, en dalgún momentu vamos dexar d’interesar y yá ta. ¿Pa ónde me gustaría llevar el proyectu? Sinceramente, si podemos caltenenos asina, tal que tamos agora… yá ye un milagru. Dedicámonos a la música, la xente quier escuchar los nuesos temes, el directu funciona bien… Nun m’asocede un escenariu medianamente realista que seya meyor qu’esti pa una banda de les nueses característiques, la verdá.
