Les agües de nueve de cada diez sableres asturianes son escelentes pal bañu, la máxima calificación sanitaria que se concede na Unión Europea a partir de los analises selmanales realizaos de xunu a setiembre nos cuatro últimes temporaes (2019-2022).
Les resultancies llograes l’añu pasáu pola Axencia de Seguridá Alimentaria, Sanidá Ambiental Consumu, y que van tar vixentes esta temporada, ratifiquen que toles zones de bañu presenten una calidá afayadiza. D’elles, la mayoría son escelentes, el 9,3%, bones y el 4,1%, suficientes.
Amás, per primer vegada los arenales de Navia, Porcía (El Franco) y San Antolín (Llanes) consiguieron una calidá escelente, mientres que San Pedro de Bocamar (Cuideiru) baxa na clasificación a bona.
El Llaboratoriu de Salú Pública de la Conseyería de Salú encárgase de recoyer amueses en 73 puntos distribuyíos en 63 sableres de 19 conceyos. Mientres la temporada de branu analícense semanalmente los datos rellacionaos col estáu sanitariu de les agües. La sucesión de midíes determina la calificación final añal que s’otorga a cada zona. El llaboratoriu cunta cola máxima acreditación pa realizar los analises de tol procesu, dende la recoyida pal muestréu hasta’l so estudiu posterior.
