Nuevos horarios del serviciu d’autobús al aeropuertu

Les primeres salíes dende Xixón hacia la terminal van producise esta temporada a les 5 de la mañana

0
664

El Consorciu de Tresportes d’Asturies (CTA) va modificar esti xueves los servicios d’autobús al aeropuertu d’Asturies por cuenta de la ampliación del horariu operativu de la terminal. L’aeródromu de Santiagu’l Monte va adelantrar la so apertura a les 06:40 hores para antemanar les salíes de los primeros vuelos.

La entrada a valir de los nuevos horarios va afectar a los servicios que s’empresten escontra y dende l’aeropuertu, con salíes de Xixón y Uviéu, y paraes n’Avilés y Castrillón. Como principales novedaes respecto al pasáu iviernu, nesta temporada habrá salíes dende Xixón y Uviéu a les 05:00 hores, para dar asina cobertoria a los usuarios de los primeros vuelos escontra Madrid y Barcelona. Igualmente, pela tarde van afaese les postreres salíes col fin d’ameyorar el serviciu.

Los horarios van ser los siguientes:
– Salíes de Xixón y Uviéu (circula per Avilés y Castrillón): 5, 6,7, 8, 9, 10, 11, 12, 13, 14, 15, 16, 17, 18, 19, 20:30 y 21:30 hores.
– Salíes del aeropuertu. Un autobús hacia Uviéu y otru hacia Castrillón, Avilés y Xixón: 6, 7, 8, 9, 10, 11, 12, 13, 14, 15, 16, 17, 18, 19:30, 20:30, 21:45 y 23:45 hores.

El CTA va caltener el sistema de retrasar la salida un máximu de 15 minutos si nes hores de partida de los autobuses del aeropuertu hai vuelos desembarcando. Nel casu del últimu serviciu dende la terminal, el retrasu va poder llegar a los 30 minutos, p’atender les últimes llegaes regulares.

El serviciu públicu d’autobús al aeropuertu, que s’empresta dende 2012, tresportó en 2018 a más de 189.000 pasaxeros. Nos primeros meses d’anguaño atropa yá 150.025, un 0,4% más que nel mesmu períodu del exerciciu pasáu. Nos próximos díes va anovase la flota qu’opera esta ruta, formada por cuatro vehículos esclusivos, coles mires d’ameyorar la comodidá de los usuarios.