El Gobiernu d’Asturies va construyir diez viviendes públiques p’arriendu asequible, con garaxe y trasteru, en Benia, la capital del conceyu d’Onís, con una inversión de 2.287.188 euros. L’Executivu formalizó esta tarde, nuna xunta telemática, el primer pasu pa impulsar esta iniciativa, al dar el vistu bonu a un informe que xustifica la tramitación d’un contratu conxuntu pa la redacción del proyectu y l’execución de les obres d’edificación.
El financiamientu del proyectu, que se va sufragar en parte con fondos europeos Next Generation del Plan de Recuperación, Tresformamientu y Resiliencia, va distribuyir en dos añalidaes: 1.972.070 euros p’anguaño y 315.118 pal próximu. Nesti importe tán incluyíos los 81.361 euros destinaos a la redacción del proyectu.
El contratu conxuntu implica una única llicitación, de mou que se van empezar los trámites y va simplificase’l procedimientu. El Conseyu de Gobiernu va autorizar tanto’l gastu como la contratación cuando se conozan los detalles de la propuesta escoyida.
La Conseyería d’Ordenación de Territoriu, Urbanismu, Vivienda y Derechos Ciudadanos persigue que la construcción de les viviendes empiece antes de finales d’abril de 2025, de mou que la obra tea rematada en xunu de 2026. Esti proyectu va contribuyir al desenvolvimientu del conceyu y va ayudar a afitar población na capital d’Onís.
Per otra parte, y tamién nel ámbitu de la vivienda, el Conseyu de Gobiernu dio lluz verde a les llistes d’axudicación, en réxime d’arrendamientu, de cinco viviendes públiques asitiaes na localidá de Sotu d’Agues, nel conceyu de Sobrescobiu.
Estos pisos destínense, per un sitiu, a families con fíos o fíes, con preferencia pa les families numberoses, y a mozos menores de 35 años, col fin d’afitar población na redolada del Parque Natural de Redes.
