Les primeres pataques que s’introducieron n’Europa taben rellacionaes coles variedaes andines ecuatoriales, que depués se cruciaron coles variedaes chilenes de tierres baxes. Consideráu un alimentu global con gran importancia na dieta, la so espansión debióse en gran midida a la so capacidá d’adaptación a distintes condiciones de llatitú y temperatura.
La formación de tubérculos ye un procesu bien reguláu. Les variedaes peruanes son capaces de formalos a lo llargo de too l’añu. Non así les variedaes europees, que s’afixeron a producilos solo nuna determinada dómina del añu, cuando les condiciones de lluz y temperatura son óptimes primero que les temperatures baxen.
«L’estudiu de los postreros 350 años d’evolución de la pataca n’Europa permitió caracterizar la diversidá xenética de les pataques históriques», diz Fernández Alonso
¿Cómo y cuándo se produció esta adaptación? A estes entrugues respuende un estudiu internacional publicáu na revista Nature Ecology & Evolution, lideráu por Hernán Burbano, del Max Planck Institute for Developmental Biology d’Alemaña, y nel que tamién participen los investigadores del Conseyu Superior d’Investigaciones Científiques (CSIC) José Luis Fernández Alonso, del Real Xardín Botánicu, y Salomé Prat, del Centru Nacional de Biotecnoloxía.
El trabayu analizó la evolución y adaptación de les variedaes de pataca europees. «L’estudiu de los postreros 350 años d’evolución de la pataca n’Europa dexó caracterizar la diversidá xenética de les pataques históriques utilizando marcadores de xenoma completu. La investigación tamién destaca’l poder de combinar xenomes contemporaneos y hestóricos (de los herbarios) pa entender la complexa hestoria evolutiva de l’adaptación de los cultivos de pataca a los nuevos climes onde foi introducida en cultivu», señala l’investigador José Luis Fernández Alonso, que collaboró con Hernán Burbano nesta investigación.
Investigaciones xenétiques
Hasta agora, l’orixe de la pataca documentárase namás utilizando aproximamientos históricos. Sicasí, nesti estudiu incorpórense investigaciones xenétiques qu’ayuden a conocer la complexidá evolutiva de les variedaes en cultivu. Esta información ye bien relevante pal desenvolvimientu comercial de nueves variedaes con meyora xenética basada na conocencia de les adaptaciones positives na crecedera de la planta. «L’estudiu analizó si una mutación natural nel xen CDF1, que permite la formación de tubérculos en rexones onde los díes pel branu son más llargos qu’en rexones cercanes al Ecuador, asocedió n’Europa o provien de les variedaes importaes de Chile na segunda metá del sieglu XIX», esplica la investigadora del CNB Salomé Prat.
Secuenciáronse un total de 88 amueses qu’inclúin 29 especímenes de herbarios históricos
«El trabayu indica qu’esta mutación anicióse de forma independiente n’Europa, anque coincide nel tiempu cola reintroducción de variedaes chilenes y encruza con plantes monteses, pa la selección de xenes de resistencia a Phythophtora qu’alredor de 1840 causó la plaga de la pataca n’Europa, y a virus. Ye probable que l’adopción de pataca como alimentu básicu n’Europa favoreciera la identificación d’esta mutación que por cuenta del so calter dominante inclúyese na mayoría d’especies que se cultiven na actualidá”.
L’equipu investigador secuenció los xenomes de les pataques históriques suramericanes y europees de los años 1660–1896, cola ayuda de les colecciones calteníes nos herbarios. Dellos especímenes analizaos fueron recoyíos nes espediciones españoles de los sieglos XVIII y XIX n’América y tamién por Darwin nel viaxe del Beagle.
Secuenciáronse un total de 88 amueses qu’inclúin 29 especímenes de herbarios históricos (3 amueses chilenes y 26 amueses europees, delles cultivaes en xardinos botánicos). Tamién se secuenciaron 43 pataques que constitúin una amuesa de la diversidá de les races andines contemporanees, según 16 cultivares europeos modernos.
Los autores conclúin que’l cruzamientu de múltiples variedaes de pataques suramericanes n’Europa, xuntu col encruz posterior con especies monteses contribuyó a l’actual variedá de pataques europees.
