La Conseyería d’Ordenación de Territoriu, Urbanismu, Vivienda y Derechos Ciudadanos licitará, nun plazu averáu d’un mes, la construcción de 507 viviendes pa xóvenes en nueve conceyos: Xixón, Siero, Llanera, Llangréu, Sotu’l Barcu, Llaviana, Colunga, Onís y Taramundi. El conseyeru Ovidio Zapico anunció güei esta midida na Xunta Xeneral, onde tamién adelantró qu’Asturies va publicar una sestu resolvimientu d’ayudes del bonu alquiler mozu, colo qu’esta llinia va superar yá los 6 millones.
En concretu, les nueves promociones de pisos van desenvolver nes localidaes de Xixón, Llugones, Llugo de Llanera, La Felguera, L’Arena, La Pola Llaviana, Colunga, Benia y Taramundi.
Tocantes a la xestión de les ayudes al alquiler, Zapico esplicó que, p’avanzar na guerra contra la burocracia social”, la Dirección Xeneral de Vivienda va contratar a seis persones al traviés de la Sociedá de Servicios del Principáu (Serpa), que van reforzar l’equipu qu’anguaño tramita estes subvenciones.
Amás, señaló que bien llueu va poner en marcha una comisión de siguimientu cola plataforma d’afectaos polos retrasos nos pagos, que se va axuntar una vegada al mes, y va suponer “un exerciciu de tresparencia”.
Per otra parte, el conseyeru refirióse a la implantación dende Vipasa d’un programa d’intermediación comuñal y socioeducativo, dotáu con 2,4 millones, que pretende ayudar a 2.278 families hasta 2029, mesmo qu’ “ameyorar la vida comuñal ya intervenir pa resolver conflictos y aumentar l’aforru enerxético”.
Al respective de l’aplicación n’Asturies del índiz de precios d’alquiler aprobáu pol Gobiernu d’España, el titular d’Ordenación refirióse a la contratación d’un estudiu pa conocer la realidá de la comunidá y recordó que namás el Conceyu de Xixón solicitó la declaración de zona tensionada pa los barrios de L’Arena y Cimadevilla.
Amás, avanzó que’l so departamentu ta analizando marcos de collaboración con propietarios privaos pa que Vipasa pueda xestionar tamién vivienda llibre, de la que repitió’l so pidimientu al Ministeriu de Vivienda y Axenda Urbana pa que modifique la Llei d’Alquiler Urbanu, coles mires de que les alministraciones autonómiques puedan actuar sobro los alquileres de curtia duración.
