El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, treslladó a la ministra de Vivienda y Axenda Urbana, Isabel Rodríguez, la urxencia de regular los alquileres de curtia duración p’atayar la problemática de la crecedera esponencial de los pisos turísticos. Zapico plantegó esti pidimientu mientres la so intervención na primer Conferencia Sectorial de Vivienda, Urbanismu y Suelu d’esta llexislatura, celebrada en Madrid.
El titular d’Urbanismu amosóse “satisfechu” tres l’anunciu de la ministra sobre la constitución d’un grupu de trabayu que va encetar la reordenación del alquiler temporal. “Somos conscientes de que solamente lleva 60 díes nel cargu y, por tanto, tenemos de da-y un marxe pa empezar a desenvolver les sos polítiques”, precisó.
Tamién valoró la disposición de Rodríguez y del so equipu a esplegar polítiques que favorezan el cumplimientu del artículu 47 de la Constitución: l’accesu a la vivienda digna per parte de la ciudadanía”.
Al respective de la Llei de Vivienda aprobada’l pasáu mayu, frente a les crítiques de les comunidaes gobernaes pol Partíu Popular, el conseyeru amosó’l respaldu d’Asturies a la norma y al so desenvolvimientu: “Ye una ferramienta que consideramos bien útil”.
Amás, amosóse partidariu d’ampliar los fondos destinaos al Bono Alquiler Mozu, como propunxo la ministra, “pa favorecer a un colectivu que tien especial dificultá p’aportar a la vivienda y, por tanto, pa desafiase”. Nesti sentíu, espresó’l so prestu pol desenvolvimientu d’estes ayudes n’Asturies.
En relación col anunciu del Gobiernu d’España de destinar 430 millones a la rehabilitación de pisos y la construcción de viviendes a preciu afayadizu, Zapico señaló qu’entá nun se conoz la cifra que correspondería a Asturies na repartida. “Güei solo falemos de los criterios y la distribución tien de ser aprobada primero pol Conseyu de Ministros”, esplicó, de la qu’añedió que los importes van ratificar na próxima Conferencia Sectorial.
