Paru total: Emtusa reaxusta los sos horarios

La empresa municipal reaxusta los sos servicios p'afaese a les nueves midíes impuestes pol Gobiernu central

0
997
Ocho viaxeros mancaos nel choque d'un autobús urbanu

Nuevos cambeos nos horarios d’autobús urbanu. Emtusa reaxusta dende esti llunes los sos servicios p’afaese a la suspensión de toda actividá non ensencial impuesta pol Gobiernu central. L’amenorgamientu va ser d’un 70% al respective d’un día ordinariu lectivu, sacaste a primer hora, cuando va ser d’un 40%.

Les frecuencies medies ente autobuses van ser de 30, 60 ó 120 minutos, en función de la llínea. L’últimu serviciu va salir de les cabeceres a les 21 hores, sacante les salíes dende l’Hospital de Cabueñes. Los autobuses que xunen el centru sanitariu cola ciudá van circular hasta les 22.30 hores pa dar serviciu al personal. Emtusa recuerda que los autobuses desinféstense a diariu.

L’amenorgamientu de frecuencies tamién va afectar al tresporte interurbanu. Les nueves llimitaciones nos principales corredores xestionaos pol Consorciu de Tresportes d’Asturies (CTA) busquen contener la espansión de la COVID-19. La ufierta va amenorgase notablemente n’hores con menor demanda, les denominaes ‘hores valle’ y tamién en corredores non esenciales nesti momentu.

Asina mesmo, la conseyería caltién les midíes de prohibición del pagu del viaxe n’efectivo y la llimitación de places a un terciu de la capacidá de cada autobús. Tampoco se puede ocupar la primer fila, como midida de protección de los profesionales y usuarios. Cuasi 300 puntos de venta y recarga de la tarxeta del billete únicu permanecen abiertos. Los controles sobre viaxeros pa verificar que los desplazamientos realízanse por motivos autorizaos van intensificase.