Que los paseos seyan seguros. La nueva normalidá a la que va conducir la fase de desescalada empecipiada pol Gobiernu va traer cambeos na movilidá urbana. El Conceyu de Xixón punxo en marcha un plan pa promover los desplazamientos a pie y en bicicleta. El Consistoriu empecipió un estudiu p’ampliar ceres y espacios pal tránsitu de peatones. Va facese utilizando señalización, moblame urbanu y maceteros. L’oxetivu ye asegurar un anchu mínimu en zones de camín y ampliar los espacios d’esparcimientu, como se fixo nel paséu d’El Muro, onde se cerró unu de los carriles pa dexar el so usu per parte de el peatones.
El Conceyu va poner tamién en marcha un Metrominutu, una iniciativa cola que yá cunten ciudaes como Pontevedra, Pamplona, Madrid y Sevilla. Lo que se quier ye promover el vezu de caminar y valorizar los desplazamientos a cuerpu na redolada urbana. Pa ello editará un planu sinópticu que va midir distancies ente dellos puntos de la ciudá y los tiempos medios de desplazamientu, utilizando distintos formatos: papel, web y aplicación.
La movilidá na desescalada tendrá nes bicicletes a les otres grandes protagonistes. El Conceyu de Xixón va priorizar la movilidá urbana en bici nel plan de transición hacia una «nueva normalidá». Les actuaciones pa favorecer la movilidá ciclista inclúin la implantación de ciclo-carriles en 29 cais y aveníes coles mires de configurar corredores que dean continuidá a los carriles-bici esistentes. Amás, va reabrise el serviciu Xixón-Bici y va autorizar la reapertura de los servicios de bicicleta y patinete compartíos de Tucycle, con nueves condiciones. En dambos casos, les bicicletes y los patinetes van ser desinfestaos diariamente por Emulsa. Pal so usu va ser obligatoriu llevar guantes.
