La conseyera de Cultura, Política Llingüística y Turismu, Berta Piñán, treslladó güei al ministru de Cultura y Deporte, José Manuel Rodríguez Uribes, la necesidá d’avanzar en delles cuestiones que precisen de la collaboración y toma de decisiones ente l’Executivu central y el Gobiernu d’Asturies.

Piñán informó al ministru sobre los proyectos nos que’l so departamentu vien trabayando dende l’entamu de la llexislatura y que son susceptibles d’optar a los planes de recuperación y resiliencia europeos. Amás, dambos revisaron les inversiones en materia de patrimoniu y promoción cultural que son comunes al Principáu y al Gobiernu central, y trataron sobre la necesidá de futuros apoyos. 

Ente los planes nos que trabaya la Conseyería de Cultura y que podríen entrar dientro de los fondos europeos de recuperación, Piñán espunxo al ministru les llinies maestres del proyectu Camín de Caminos, una iniciativa que tien por oxetu la creación d’una rede de rutes históriques y culturales pol patrimoniu, la naturaleza, la tradición y la memoria oral d’Asturies.

Otramiente, informó a Rodríguez Uribes de que Cultura estudia la posibilidá de que los fondos europeos puedan cubrir el desenvolvimientu d’un plan de sofitu específicu pal impulsu del sector audiovisual, del videoxuegu y de la innovación. El proyectu incluyiría la habilitación d’un plató públicu de producción audiovisual y de soníu, amás d’instalaciones d’apoyu al sector del videoxuegu.

Inversiones en patrimoniu y cultura

Dambos dirixentes trataron tamién sobre les inversiones nel Prerrománicu (concretamente les qu’afecten a San Salvador de Priesca, Valdediós y Santuyano ), les ayudes al patrimoniu industrial, como les del pozu Santa Bárbara, en Mieres, o les actuaciones en monesterios, con especial referencia a la ellaboración d’un plan director pal de Santa María d’Oubona.

Nel alcuentru abordóse amás, la situación de dellos asuntos sobre los que se producieron contactos ente dambes alministraciones dende l’entamu d’esta llexislatura, como la formación d’una mesa del prerrománicu, con participación del ministeriu, el Gobiernu asturianu, la Ilesia y los conceyos implicaos, o la constitución de la comisión de siguimientu de les obres del Chao Samartín.

Per otra parte, la conseyera solicitó a Rodríguez Uribes que los ceadores en llingua asturiana puedan optar a les convocatories de premios y subvenciones del ministeriu, mesmo qu’una mayor presencia d’estos nes actividaes y programes que pongan en marcha.

Finalmente, Piñán treslladó l’interés del Principáu por que’l Gobiernu central sofite la candidatura de la cultura sidrera a Patrimoniu Inmaterial de la Humanidá.