Podemos va defender nel Plenu municipal del miércoles 9 una proposición pa que Xixón entre a la Rede de Ciudaes Fast-Track, que yá compromete a más de 550 ciudaes del mundu na llucha escontra’l VIH/sida y particularmente en trés oxetivos fitos pa 2030: que’l 95% de les persones que viven col VIH/sida conoza’l so estáu serolóxicu, que’l 95% de quien conozan el so estáu serolóxicu positivu reciban un tratamientu antirretroviral y que’l 95% de les persones en tratamientu lleguen a tener una carga viral indetectable, lo que significa intransmisible.
L’adhesión a esta iniciativa, promovida a partir de la Declaración de París de 2014 pola Asociación Internacional de Provisores d’Atención del Sida (IAPAC), ONUSIDA y ONU-Hábitat, ye una reivindicación del Comité Ciudadanu Anti-Sida d’Asturies. La presidenta d’esti colectivu, Loly Fernández Horcajo, y el coordinador del Programa d’Amenorgamientu del Dañu, Jesús Cisneros, acompañaron esti miércoles a la vocera de Podemos Xixón na Casa Conceyu, Olaya Suárez, na presentación de la proposición plenaria.
“Xunise ye importante porque queda enforma que trabayar nel terrén del VIH”, esplica Fernández Horcajo, que señaló que nel conxuntu d’España cumplió yá unu de los oxetivos del 95%, pero persisten problemes como la dificultá d’accesu a los tratamientos, sobre manera pa les persones migrantes; o la estigmatización, que se venceya a una mayor dificultá p’aportar al diagnósticu y tamién a peor salú mental, soledá y aislamientu social”. La presidenta del Comité Anti-Sida reivindicó “la visibilidá de les persones con esta infección como un actu de dignidá” y la so “aportación a la respuesta global contra esta pandemia y les conquistes d’igualdá pa les persones vulnerables”, resaltando a los colectivos dientro de la población con VIH qu’enfrenten retos particulares, como les muyeres o les persones mayores de 50 años.
Pela so parte, Olaya Suárez destacó que la proposición de Podemos tamién reclama que’l Conceyu xixonés ellabore un plan estratéxicu cuntando col texíu asociativu que trabaya nel ámbitu del VIH/sida, mesmo que se desenvuelvan acciones de formación y sensibilización col personal municipal, especialmente empobinaes a aquellos y aquelles profesionales que la so llabor tien una mayor incidencia social.
