Podemos-Equo nun quier nin oyir falar de xubir los sueldos de los conceyales. Les tres representantes de la coalición na Casa Conceyu espresaron el so refugu a l’incrementu de les asignaciones previstes pa l’alcaldesa y los ediles lliberaos plantegaes pol nuevu equipu de gobiernu. La so vocera, Yolanda Huergo, llamentó «que’l primer alcuerdu que s’ufierte a la ciudadanía xixonesa seya un aumentu de les retribuciones».
La conceyala defendió la llimitación salarial de los ediles. «Paeznos clave que’l trabayu municipal pueda realizase en condiciones salariales dignes, pero eso nun pasa por xubir los sueldos de los conceyales como primer midida». Huergo asegura qu’esta midida ye «mala d’esplicar». Nuna nota de prensa, la conceyala amosó la so «total disconformidá» pa con una decisión que «supon un mal empiezu de mandatu».
Huergo discrepa igualmente del repartu de la representación municipal nes comisiones informatives y otros organismos del conceyu de Xixón. «Enzanca la participación política, lo que ye una amenorga democrática del derechu de representación de les persones que nos votaron». Nesi sentíu, solicita un repartu «proporcional y equilibráu», dalgo que consideren «fundamental pal fayadizu exerciciu de l’acción política». Pa la coalición, ye «llamentable» que se centre l’alderique nes retribuciones, cuando «lo importante ye garantizar l’exerciciu de la práctica política, tando nel gobiernu o na oposición».
