El Conceyu de Xixón, al traviés de la Fundación Municipal de Servicios Sociales, entama les XVIII Xornaes municipales contra’l Racismu y la Xenofobia que se van celebrar hasta’l 31 de marzu con motivu del Día Internacional pa la Eliminación de la Discriminación Racial.
Van desenvolvese col lema ‘Per un mundu con más arte’, diseñáu pola moza Irene García Robles, que foi la ganadora del concursu convocáu pa escoyer la imaxe de les xornaes. Nesi sentíu, la programación va tratar al rodiu del arte y la inmigración, con propuestes rellacionaes cola creación artística como la lliteratura, pintura, poesía, música, etc.
Na presentación de les xornaes y entrega de premios del concursu de cartelos que tuvo llugar esti mediudía nel Salón de Recepciones, participó la conceyala de Derechos y Bienestar Social, Natalia González Peláez, quien señaló qu’esta iniciativa ye un espaciu de convivencia y de cohesión social, que busca cada añu aumentar la participación ciudadana pa consiguir una sociedá integradora y multicultural.
L’oxetivu ye, a última hora, visibilizar a la población inmigrante y de minoríes étniques que vive y habita nel conceyu al traviés del diálogu y la convivencia intercultural nel contestu d’una sociedá plural y diversa. Coles mesmes, les xornaes pretenden favorecer l’alcuentru, la conocencia, la comprensión, la comunicación, l’enfotu y la cooperación ente tola ciudadanía; prevenir actitúes racistes y xenófobes y denunciar los prexuicios, los estereotipos y les situaciones discriminatories esistentes escontra les persones inmigrantes y les minoríes étniques.
Son un exemplu de collaboración y trabayu en rede, yá que nel desenvolvimientu de la programación d’esta edición participaron cuatro departamentos municipales (Mocedá, Igualdá, Empléu y Servicios Sociales) y nueve entidaes del tercer sector: ACCEM, Amaranta, APIA; Asociación pa l’Ayuda del Inmigrante Africanu n’Asturies, Asociación Xitana de Xixón, Cruz Roja, CISE, Fundación Secretariáu Xitanu, Late y Mar de Niebla.
Destaquen actividaes como la narración oral de cuentos africanos con Boni Ofogo col títulu L’elefante que perdió’l so güeyu; sesiones de Cuentacuentos al cargu de Paula Carballeira y un Taller de narración oral col títulu de “cuntar tamién dende otres miraes”; la proyección del documental Frente al silenciu, en collaboración con Amnistía Internacional y el Grupu Eleuterio Quintanilla, con un alcuentru posterior del públicu col Director; o un alcuentru de Patricia Simón, periodista escritora especializada en Relaciones Internacionales, colos Grupos de Participación Infantil y Adolescente de Xixón, complementáu con una charra coloquiu de Patricia nel Toma 3 col títulu “viaxe per un mundu llenu d’idealistes”.
