«Cartes nel horru (y delles hestories más)» d’Inaciu Galán, «Baxo’l pumar» de Marga Pedrayes y «L’escudu d’armes de Xixón» de Xuan F. Bas

Esti xueves 17 de xunu a 21:00 hores va celebrase la presentación de les novedaes de Cuatro Gotes Ediciones na carpa 2 de la Feria del Llibru de Xixón. Lluis Fanjul, de Cuatro Gotes, va conducir la mesa na que van presentase «Baxo’l pumar», novela de Marga Pedrayes; «Cartes nel horru (y delles hestories más)», recopilación de rellatos d’Inaciu Galán, y l’estudiu «L’escudu d’armes de Xixón. La iconografía de Pelayu», Xuan F Bas Costales.

La escritora Pilar Sánchez Vicente va presentar a Inaciu Galán y el so llibru, un volume nel qu’axunta los rellatos y microrrellatos qu’espublizó en revistes o colos qu’algamó premios nos últimos años, xunto a otros inéditos. Nesti llibru recuéyense pieces narratives escrites en momentos mui distintos y con temes estremaos, que van dende’l terror al amor, pasando pel rellatu hestóricu y la recopilación d’hestories populares, teniendo en común la busca d’un elementu sorpresivu pal llector.

Marga Pedrayes va presentar la so novela «Baxo’l pumar». La hestoria d’esta novela ñació va dellos años cola idea de retratar la evolución d’un pequeñu llagar familiar a lo llargo d’un sieglu y mediu. Tres dellos cambeos, Marga consideró que tendría de ser un llibru de rellatos n’asturianu, por ser l’idioma del ámbitu sidreru asturianu, onde narra la obsesión del protagonista, Colás, por una pumarada.

Amás, va presentase ensin la presencia del autor por motivos llaborales, «L’escudu d’armes de Xixón», nel que Xuan F. Bas Costales (llicenciáu en Xeografía y Historia pola Universidá d’Uviéu), convídanos a danos una vuelta pelos cambios polos que pasó esi sellu distintivu de la ciudá, dende entamos del sieglu XVII, cuando s’acordó facer un sellu d’armes cola persona del infante Pelayu. Una imaxe que foi camudando y usando modelos estremaos hasta qu’en 1949 el Conceyu dexó afitao l’escudu oficial de Xixón cola figura del rei Pelayu afatáu como un guerreru godu, con cota de mayes, túnica, capa, corona y cruz de la victoria con blagu na manzorga y espada apuntando al suelu na mandrecha. Una evolución que’l autor analiza minuciosamente, acompañao por ilustraciones bien interesantes onde vamos ser a ver los cambios polos que pasó D. Pelayo en sellos, edificos y otres instituciones oficiales onde s’usó esi escudu d’armes.

El sábadu, nun actu diferente, Cuatro Gotes Ediciones va presentar tamién el númberu nuevu de la revista Formientu, que fai esti 2021 quince años d’andadura.