La Conseyería de Presidencia ellaboró una guía de rempuesta a solicitúes d’accesu a la información pública al serviciu de tola Alministración autonómica. El documentu, el primeru d’estes característiques que s’ellabora nel Principáu, básase na normativa de tresparencia nacional y autonómica y va sirvir pa homoxeneizar, coordinar y ameyorar la respuesta a les solicitúes de la ciudadanía.
El derechu d’accesu a la información pública implica que, de manera gratuita, cualquier persona puede solicitar datos de les alministraciones, el sector públicu o’l mundu académicu, que tendrán de ser facilitaos, sacantes s’incumpla dalguna llende, como la seguridá nacional, o esista una causa xustificada d’inadmisión.
La guía del Principáu inclúi 30 modelos de respuesta a les solicitúes d’información fácilmente adaptables pa cualquier emplegáu públicu, según una llista de verificación que dexa navegar, de forma axilosa y senciella, hasta la respuesta definitiva de l’Alministración. El testu incorpora, amás, doctrina y xurisprudencia sobre tresparencia.
El documentu tien calter emponedor, polo que cada departamentu va decidir voluntariamente si quier usalo. Sicasí, recueye los criterios y encamientos impulsaos dende la Dirección Xeneral de Gobernanza Pública, Tresparencia, Participación Ciudadana y Axenda 2030 pa garantizar una meyor respuesta a les solicitúes d’accesu a la información pública.
