La Conseyería de Presidencia, al traviés de la Dirección Xeneral de Mocedá, Diversidá Sexual y Derechos LGTBI, convida a la ciudadanía a participar nuna esperiencia de realidá virtual contra la LGTBIfobia na que les persones interesaes van poder ponese na piel de quien carecen situaciones homófobes por aciu l’usu d’unes gafes de visión tridimensional. D’esta miente, van esperimentar les diverses situaciones a les que s’enfrenta’l colectivu LGTBI en tolos campos de la so vida: dende’l familiar, hasta’l d’ociu y tiempu llibre, pasando pol educativu.
“Ye una esperiencia que, partiendo de la emoción y l’empatía, busca la implicación de la ciudadanía como axente activu para promover territorios más xustos ya inclusivos cola diversidá y concenciaos cola visibilidá LGTBI”, esplicó’l director xeneral Marcos Torre.
Les gafes de realidá virtual dexen visualizar situaciones de la vida cotidiana nes que se xeneren situaciones d’odiu escontra les persones LGTBI o inclusive se produz dalgún tipu d’agresión homófoba. Énte estos comportamientos, convidar a los participantes a actuar y llantar cara a la homofobia. “L’oxetivu ye amosar que, en más ocasiones de les que pensamos, asoceden estos fechos, pero tamién tratamos de promover cambeos y esplica-y a la xente que puede ser activu y amosar refugu énte estes agresiones”, precisó Torre.
Les persones comenenciudes van poder participar nesta esperiencia, dende güei y hasta’l día 12, nel palaciu del Conde de Toreno, n’Uviéu, n’horariu de 11:00 a 14:00 y de 16:00 a 21:00 hores.
Ayuda contra les agresiones homófobes
Asturies cunta con un númberu de teléfonu gratuitu, el 900 701 138, p’atender de manera áxil y profesional les necesidaes de personar víctimes de LGTBIfobia. Esta llinia ta operativa mientres les 24 hores, tolos díes del añu, tanto en manera de llamada convencional como por aciu mensaxería por wasap.
Cualquier persona que se considere víctima d’un delitu de LGTBIfobia o que conoza la esistencia de dalgún fechu agresivu, discriminatoriu, denigrante o ofensivu escontra esti colectivu puede utilizar esti serviciu.
En 2022, el teléfonu d’atención a víctimes rexistró 16 situaciones d’agresión/discriminación y un total de 126 consultes.
