El Gobiernu d’Asturies va garantizar la estabilidá financiera de la Universidá d’Uviéu con un contratu-programa por un periodu d’hasta diez años. El Principáu y l’institución académica llegaron a un doble alcuerdo: per un sitiu, un conveniu de transición pa 2022 dotáu con 150 millones y, por otru, un modelu de financiamientu que los sos detalles se zarrarán nos próximos meses y que va tener una vixencia de seis años prorrogable otros cuatro.
El conseyeru de Ciencia, Innovación y Universidá, Borja Sánchez, y el rector de la Universidá d’Uviéu, Ignacio Villaverde, roblaron güei el conveniu para 2022 ya informaron sobro’l futuru alcuerdu que se va aprobar a lo llargo del añu. Nel actu tamién participaron la directora xeneral d’Universidá, Cristina González, y el vicerrector de Relaciones Institucionales y Coordinación, Humberto Rodríguez Solla.
L’oxetivu del Principáu ye dotar a la Universidá d’estabilidá presupuestaria al marxe de llexislatures polítiques y mandatos rectorales, con un contratu-programa ente 2023 y 2028, que va poder estendese hasta 2032. “Ye la primer vegada que podemos falar d’un compromisu con un horizonte tan llargu, que garantiza xuna financiamientu estable mientres xuna década y facilita a la Universidá planiar al llargu plazu”, valoró’l conseyeru.
Sánchez incidió en que parte del financiamientu ta venceyada a oxetivos de meyora n’ámbitos de docencia, investigación y tresferencia de conocencia, que van contribuyir a que la Universidá d’Uviéu esguile puestos nos rankings nacionales ya internacionales.
Pela so parte, el rector, Ignacio Villaverde, valoró de forma bien positiva’l fechu d’algamar un alcuerdu financieru con una vixencia que supera un mandatu, y precisó que los indicadores del financiamientu por oxetivos “tán alliniaos col plan estratéxicu de la institución, que se van presentar nos próximos díes, y van contribuyir a señalizar los pasos que se deben dar pa consiguir una meyor Universidá”.
Les cifres coles que va cuntar el futuru contratu-programa van cerrar nos próximos meses. Sicasí, el puntu de partida ye’l conveniu suscritu güei, con 150 millones, recoyíos nel presupuestu d’anguaño. Esta partida inclúi l’aportación ordinaria, el plan d’inversiones, el financiamientu por oxetivos y la compensación pola conxelación del preciu de la matrícula universitaria.
La mayor novedá céntrase nel financiamientu por resultancies, con una dotación de 2,5 millones. Esti apartáu inclúi 28 indicadores en seis ámbitos, ente los que figuren los siguientes: meyora de la tasa de rendimientu del alumnáu, medría d’estudiantes estranxeros, aumentu de publicaciones científiques d’excelencia, númberu de tesis, patentes, más cátedres con empreses, midíes d’igualdá o amenorgamientu de gastos enerxéticos son dalgunos de los indicadores recoyíos.
