El Boletín Oficial del Principáu d’Asturies (BOPA) publicó güei la convocatoria d’ayudes financiada pol Fondu de Transición Xusta (FTX) pa sofitar proyectos d’inversión empresarial que promuevan el desenvolvimientu d’una economía de cero emisiones netes. El Conseyu de Gobiernu aprobó’l xueves esta llinia, que’l so presupuestu inicial xube a 40 millones.
La convocatoria ta dirixida a grandes empreses y a agrupaciones de grandes empreses con pymes, y los proyectos van poder presentase a partir de mañana. Trátase de la primera gran llinia d’ayudes financiada por esti organismu, que ye’l preséu de cohesión européu que sofita’l procesu de transición enerxética nes rexones más afectaes pol cambéu de modelu económicu.
Estes ayudes van financiar proyectos destinaos a la producción d’equipos y componentes que promuevan una economía de cero emisiones netes como bateríes, paneles solares, turbinas eóliques, bombes de calor, electrolizadores y equipos de captura, almacenamientu y usu de carbonu. Acordies con la convocatoria, el plazu máximu d’execución de los proyectos subvencionaos va ser de 30 meses dende la fecha del resolvimientu definitivu de concesión.
