Les dimisiones que se tán socediendo en Foro Asturies tres la confirmación del pactu ente la formación liderada por Carmen Moriyón y VOX en Xixón falen d’una resquiebra interna. José Suárez Arias-Cachero «Felechosa», Vicesecretariu d’Estratexa de la formación, Carlos Suárez, presidente de Foro n’Uviéu, o Inaciu Iglesias, vocal de la directiva, fueron los primeros en dexar los sos cargos y en dellos casos el propiu partíu.
Toos ellos respuenden a un perfil centrista y de sensibilidá asturianista que siempres contrastó con figures del Foro xixonés más averaes a la derecha, como Jesús Martínez Salvador o Pelayo Barcia. La tendencia asturianista dibuxada por estos agora ex cargos de Foro Asturias tuvo siempres cercana al diputáu Adrián Pumares, qu’amosó la so sensibilidá asturianista y el so refugu a pactos colos estremos.
El pactu xixonés robláu esti vienres fai a Foro asumir principios radicales de VOX y una postura contra l’asturianu que choca frontalmente col camín señaláu por Pumares nel pasáu. Pumares fuera precisamente’l políticu más señaláu por VOX, con delles campañes especialmente venceyaes al so sofitu a la oficialidá del asturianu y a les sos postures de sensibilidá asturianista nes que yera insultáu y calificáu de «traidor» y «vendíu», ente otros calificativos. Carmen Moriyón prometió nun pactar con aquellos que señalaron y acosaron a Pumares, esplicando en delles ocasiones que nun tenía «nada que falar» con VOX y que nunca fadría pactos «colos estremos».
Por toes estes razones tolos güeyos tán puestos agora sobre Adrián Pumares, que guarda silenciu dende que se confirmó’l pactu. Nes redes sociales les postures van dende la petición d’esplicaciones hasta’l pidimientu de dimisión o la renuncia al escañu. ¿Qué tará agora na cabeza d’Adrián Pumares? Namás él podrá esclariar la so postura sobre esti pactu que ta poniendo pates arriba a Foro Asturias.
