La Conseyería d’Alministración Autonómica, Mediu Ambiente y Cambéu Climáticu volvió a entamar les obres de saneamientu de la cuenca del ríu Alvares, en Solís y Cancienes, nel conceyu de Corvera, que van concluyir n’avientu y van beneficiar a 326 habitantes.
La viceconseyera de Mediu Ambiente y Cambéu Climáticu, Nieves Roqueñí, visitó güei la zona y esplicó que los trabayos reiniciáronse tres l’aprobación del modificáu que va dexar completar l’actuación. El proyectu consiste en construyir una rede de colectores que van recoyer les agües residuales d’orixe domésticu. D’esta miente, la rede va conectar al colector interceptor del ríu Alvares, por onde van escurrir pal so tratamientu na depuradora de Maqua.
La conseyería va executar siete redes de saneamientu, una pa cada localidá, lo que supon un total de 12.132 metros de colectores, 421 pozos de rexistru y 151 acometíes domiciliaries.
L’actuación tuvo que ser paralizada p’afaer el proyectu a delles dificultaes detectaes mientres la so execución, fundamentalmente rellacionaes coles característiques geotécnicas del sosuelu en distintos tramos que presenten gran cantidá de sustrato predresu; la necesidá de modificar el proyectu nes cruces del ríu en Solís Este y Les Agüeres y la reubicación del colector de Cancienes pelos terrenes disponibles pa desenvolver les obres.
