El Grupu de Rescate de Bomberos del Serviciu d’Emerxencies del Principáu d’Asturies alcontró, esta nueche, en perfectu estáu, a dos senderistes, un home y una muyer, que se desorientaron ayeri tarde cuando realizaben la ruta circular de Peña Cerreos, en L.lena.
Los dos perdíos fueron acompañaos hasta cerca de Tuiza onde habíen dexao aparcáu’l so vehículu. Fueron alcontraos, a 1.950 metros d’altitú, al este de Peña Cerreos, n’Ubiña. Na zona había bastante nieve y dalgún pasu espuestu en fastera xelada polo que, por seguridá, el descensu realizóse, encordaos y bien amodo yá que los senderistes nun llevaben crampones.
El Centru de Coordinación d’Emerxencies del 112 Asturies recibió l’avisu a les 19.51 hores d’ayeri domingu. Na llamada, realizada polos mesmos afectaos, indicaben que s’habíen desnortiao cuando realizaben la ruta. Diba unes hores contactaren col refuxu de Meicín y agora nun llograben falar con ellos pa saber si unviaren ayuda. Llevaben gps y bona equipación.
La Sala 112 del SEPA activó a dos efectivos del Grupu de Rescate per tierra. A les 23.21 comuniquen que tienen a los dos perdíos a la vista. A les 00.10 confirmen que yá tán colos senderistes. Nun precisen asistencia sanitaria. Empecipien la baxada escontra’l refuxu de Meicín. Van dir bien lentu porque la pareya nun tien crampones. A les 02.44 hores informen que dexaron a los senderistes nel so vehículu que taba como a un kilómetru de Tuiza. Rematada la intervención tornen a base onde lleguen a les 03.46 hores.
