Efectivos de Bomberos del Serviciu d’Emerxencies del Principáu d’Asturies (SEPA), con base nel parque de Cangues d’Onís, xuntu al Xefe de Bomberos de la Zona Oriental y efectivos del Grupu de Rescate ya Intervención de Monte de la Guardia Civil (GREIM) rescataron a un varón, un ganaderu, que se sintió indispuestu mientres s’atopaba nel monte frente a Carreña, en Xavariega, en Cabrales. Según los datos facilitaos pol Serviciu d’Atención Médica Urxente (SAMU) l’home foi treslladáu al Hospital de Cabueñes.
El Centru de Coordinación d’Emerxencies recibió l’avisu a les 12:54 hores. Na llamada indicóse qu’el so hermanu atopábase nel monte y sentíase mal. Coles mesmes una persona averóse hasta onde s’atopaba l’afectáu ya indicó que nun había accesu rodáu, la visibilidá yera mala, con vientu y taba nevando. Énte esta situación nun foi posible la intervención del Grupu de Rescate, a bordu del helicópteru medicalizáu, pero sí la de la de los efectivos de bomberos de Cangues d’Onís, xuntu al Xefe de Bomberos de la Zona Oriental y el GREIM.
En llegando hasta un puntu al que podía aportase en vehículu, los citaos medios empezaron la caminada hasta llegar a onde s’atopaba l’afectáu. A les 15:22 hores yá taben con él. En suministrándo-y ropa seco y facilita-y un cobertor térmicu, yá que presentaba síntomes de hipotermia, bomberos y Guardia Civil, empecipiaron el portéu del afectáu. La operación llevóse a cabu con dificultá debíu tantu al terrén, como a les condiciones meteorolóxiques, yá que nevaba y soplaba una fuerte ventisca. Mentanto la UVI Móvil de la zona averar hasta’l centru de salú de Carreña. Dende equí l’equipu médicu foi treslladáu por un vehículu touterrén de bomberos hasta onde s’atopaben los vehículos de bomberos y Guardia Civil, y en caminando unos minutos, atopáronse colos rescatadores que taben llegando a la zona. En siendo atendíu, algamóse los automóviles y baxóse nel vehículu de la Guardia Civil hasta onde s’atopaba la UVI Móvil pa ser treslladáu.
