El Grupu de Rescate de Bomberos d’Asturies, a bordu del helicópteru medicalizáu del Serviciu d’Emerxencies del Principáu d’Asturies (SEPA), rescató a un escalador que resultó mancáu na vía Cepeda, na cara Este del Urriellu.
L’afectáu, un varón de 48 años d’edá, foi atendíu na mesma paré pola médica-rescatadora que, amás de suministra-y analxesia intravenosa y cura-y delles feríes, inmovilizó-y la clavícula izquierda antes de treslladalo a l’aeronave por aciu una operación de grúa conxunta d’unos 30 metros. L’accesu al mancáu realizóse tamién por aciu dos tales operaciones cola grúa del helicópteru, primero pa baxar a un bomberu-rescatador qu’aseguró la zona y depués pal descensu de la médica-rescatadora.
El Centru de Coordinación d’Emerxencies del 112 Asturies recibió l’avisu a les 11.59 hores. Na llamada esplicaben qu’el so compañeru, yeren una cordada de trés, golpeárase fuertemente nun brazu y tenía delles feríes tres sufrir una cayida d’unos 15 metros cuando esguilaben la citada vía. Consiguieren baxalo hasta la xunta, pero yá nun podía siguir baxando.
