Un varón resultó mancáu tres sufrir una cayida mientres facía la ruta de los Sedos d’Ozania a la H.ocica, n’Amieva. L’afectáu presenta un traumatismu craneoencefálicu y policontusiones. Por cuenta de la dificultá d’accesu a la zona na que s’atopaba’l montañeru, el Grupu de Rescate del Serviciu d’Emerxencies del Principáu d’Asturies (SEPA) pasó la nueche nel llugar xuntu al afectáu, que foi atendíu pola médica-rescatadora del equipu. Nel llugar tamién tuvieron efectivos del Grupu de Rescate ya Intervención en Monte (GREIM) de la Guardia Civil.
El Centru de Coordinación d’Emerxencies recibió l’avisu a les 19:52 hores. Na llamada, tresferida pel Centru Operativu de Servicios (COS) de la Guardia Civil, l’alertante esplicó que se mareara, sangraba por un oyíu, atopabase nuna zona peligrosa y nun podía siguir. L’afectáu tenía ropa d’abrigu, comida y batería nel teléfonu. Nel momentu movilizóse per tierra a la médica-rescatadora y a dos bomberos rescatadores del Grupu de Rescate del SEPA ya informóse al GREIM.
A les 23:28 hores el GREIM indicó que yá s’atopaba col afectáu (esti unviara les sos coordenaes pa la so localización) y señalaron que nun podíen sacalo del llugar con camiya por cuenta de que yera un llugar de bien mal accesu. Tres atopase con otru efectivu del GREIM, los integrantes del equipu de rescate del SEPA llegaron pocu dempués al llugar nel que se topaba’l mancáu. La médica-rescatadora foi la encargada d’atendelu. L’afectáu sufrió una cayida cuando s’atopaba baxando, de regresu, na ruta de los Sedos d’Ozania. L’espaciu de parés verticales qu’enzancaben el poder caminar obligó a los rescatadores a pasar la nueche na zona, col afectáu, a la espera de que mientres la mañana l’helicópteru medicalizáu del SEPA pudiera salir escontra Amieva. La trupa borrina nun dexó’l despegue de l’aeronave hasta les 12:06 hores.
En llegando a la zona alredor de les 12:30 hores, efectuóse la operación de rescate. Por aciu una operación de grúa doble estrayóse del llugar, col triángulu de rescate, a la médica y al mancáu. La operación se grúa executóse tamién pa sacar del llugar al restu de bomberos-rescatadores, dos, y al efectivu del GREIM que tamién permaneció con ellos.
El mancáu foi treslladáu al HUCA. L’equipu de rescate dio per rematada la intervención a la so llegada a base, a les 13:42 hores.
