Efectivos d’emerxencies rescataron esti llunes a un montañeru que se mancara en cayendo na zona norte del picu Mirueñu, na Sierra del Sueve, en Colunga. El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, treslladó al afectáu al Hospital Universitariu Central d’Asturies (HUCA). L’afectáu, un varón de 70 años, foi atendíu nel llugar pola médica-rescatadora y evacuáu darréu. Na operación de grúa emplegáronse 35 metros de cable. Presentaba, por cuenta de más pruebes y hasta nueva valoración médica, traumatismu abdominal de pronósticu reserváu.
La sala del 112 Asturies recibió l’avisu a les 13.32 hores. Na llamada señalaben qu’un montañeru cayera sobre una banda y costába-y alendar. Nesi momentu’l Grupu de Rescate col helicópteru medicalizáu atopábase realizáu otra intervención en Colunga polo que se-yos solicitó una valoración médica pa saber si l’afectáu podía esperar a ser rescatáu, unos 30 minutos, hasta que rematara la otra intervención. N’alcontrando a los montañeros y dexar a la médica y unu de los rescatadores col afectáu p’atender al montañeru’l restu del equipu foi a recargar a Cangues d’Onís.
