Los axentes de Patrulla Osu d’Asturies rescataron esta mañana na localidá somedana de Aguino un osu pardu que nun podía mover les pates traseres, lo que-y obligaba a movese arrastrándose.
L’animal, un machu adultu, foi alcontráu xunto al regueru Aguino por un dispositivu formáu por una decena de persones. Pal so rescate foi necesariu sedalu. Darréu, foi treslladáu a la corralada de la Fundación Oso Asturies en Santu Adrianu, onde va permanecer n’observación mientres los próximos díes col fin d’evaluar la so situación y les sos mancadures.
Los axentes participantes llevaron a cabu’l rescate en condiciones de total seguridá. Al tratase d’un exemplar mancáu, la población de la localidá podría correr riesgu, polo que la estracción del plantígradu yera la prioridá del dispositivu.
L’osu, recoyíu en mui mala traza, podría llevar dellos díes ensin alimentase y presenta llagues causaes pol arrastre del so cuerpu pa movese, según la observación preliminar realizada por veterinarios d’Asturies.
