Efectivos de Bomberos del Serviciu d’Emerxencies del Principáu d’Asturies (SEPA) con base nel parque de Grau y el Grupu de Rescate del SEPA alcontraron, esta nueche, a un pescador desnortiáu na redolada de la localidá de Villamarín. L’home, un varón de 66 años d’edá, atopábase cansáu pero en perfectu estáu de salú. Foi acompañáu pol equipu hasta’l llugar onde dexaren aparcaos los vehículos onde lu esperaben los sos dos compañeros de pesca. Tuvieron que caminar cerca d’hora y media pel monte ente una frondosa maleza.
El Centru de Coordinación d’Emerxencies del 112 Asturies recibió l’avisu a les 22.39 hores d’ayeri martes. La llamada realizóla los sos otros dos compañeros de pesca. Esplicaron que salieren xuntos pero él nun llegara al llugar onde quedaran, la localidá de Villamarín na zona del ríu Cubia, zona de monte y muncha maleza. Según dixo intentara coyer un senderu pa salir a la carretera pero se perdió.
La Sala 112 del SEPA movilizo a bomberos de parque moscón y al Grupu de Rescate con base en La Morgal per tierra. Mentanto contáctase col desapaecíu que llogró unviar el so allugamientu con ayuda del so teléfonu móvil. A les 02.52 hores l’equipu alcontró al pescador. Baxáronlu hasta los vehículos onde llegaron a les 04.17 hores. Ellí tamién taba una patrulla de la Guardia Civil. Rematada la intervención dambes dotaciones tornaron a les sos respectives bases. Los bomberos moscones llegaron al parque a les 05.21 hores y el Grupu de Rescate, a la so base en La Morgal, a les 05.31 hores.
