Rescaten a una familia que quedó enriscada na sablera del Osu

Los trés, una muyer, un home y un menor de 14 años, atopábense en perfectu estáu

0
533

Efectivos de Bomberos rescataron, esta nueche, a una familia que quedó enriscada nun saliente de les roques a unos 500 metros de la sablera del Osu, en Ribedeva. En llegando hasta la zona los bomberos ayudaronlos a baxar de les roques y emponese hasta la sablera de La Franca onde había dexáu aparcáu’l so vehículu. Los trés, una muyer, un home y un menor de 14 años, atopábense en perfectu estáu.

El Centru de Coordinación d’Emerxencies del 112 Asturies recibió l’avisu a les 01.47 hores. Na llamada, realizada por ún de los afectaos, esplicaba que taba cola so familia a unos 500 metros de la sablera del Osu. Empecipiaren una ruta y quedaren atrapaos nunes roques. Teníen solo la llinterna del teléfonu móvil col que faciliten la so localización. Nun víen nada, nun podíen xubir y tampoco dar la vuelta.

La Sala 112 del SEPA moviliza una dotación de Bomberos del SEPA del parque de Llanes qu’aprovechando la baxada de marea llogra llegar al llugar onde s’atopaba la familia. A les 02.31 hores informen que yá tán saliendo del llugar pola sablera y, unos minutos más tarde, a les 02.51 comuniquen que yá los dexaron en La Franca onde teníen aparcáu’l so vehículu. Rematada la intervención retiren para tornar a parque onde lleguen a les 03.14 hores. L’incidente, como marca’l protocolu, tamién se comunicó a la Guardia Civil.