La conseyera de Transición Ecolóxica, Industria y Desenvolvimientu Económicu y presidenta de Cogersa, Nieves Roqueñí, destacó güei na Xunta Xeneral, qu’una vegada asumíos los erros internos en relación cola contratación d’una póliza de seguru de daños materiales nel consorciu de, les prioridaes centrar nel arreglu de los daños na planta de tratamientu de la basura bruta y en dar respuesta a los grandes retos que tien plantegaos Asturies na xestión de les borrafes nos próximos años.
«Hubo erros, asumímoslos y esi fechu va dexanos avanzar nos oxetivos xenerales de Cogersa», como son el desenvolvimientu de la Estratexa d’Economía Circular, aumentar les tases de reciclaxe, la valorización de borrafes y «cerrar el ciclu de los recursos», señaló la conseyera.
Roqueñí esplicó que dende abril de 2022, fecha na que remató la vixencia del seguru de daños materiales, solo hubo dos propuestes pa la suscripción d’una nueva póliza: en xunetu de 2022 y n’agostu de 2024. Sobre la primera, la ufierta foi refugada pola directora d’Organización ensin informar a la xerente del consorciu y, al respective de la segunda, tán definiéndose les condiciones col mediador pa presentar al conseyu d’alministración, «nel menor tiempu posible», una propuesta de contratación.
«La xerencia va tener que poner en marcha les midíes oportunes pa qu’esto nun vuelva asoceder. Falóse d’una reestructuración fonda, del refuerzu de la cadena de mandu y sobre manera de contratar un seguru de daños materiales y nesta llinia tamos comprometíos», rellató la conseyera.
Tocantes a les obres d’arreglu de la planta de basura bruta, desveló que’l so entamu «ye inminente» y que cunten con un plazu d’execución d’un añu, al que se van sumar otros 5 meses pa la puesta en marcha de la instalación.
