El periodista Inaciu Galán entrevistó al presidente Adrián Barbón pal espaciu que va emitise esti martes de 23:00 a 00:00 hores na RPA
RPA va emitir güei martes 21 de xunu, a les 23 hores, la entrevista al presidente Adrián Barbón que-y fixo’l periodista Inaciu Galán dientro del programa documental Asturies 81:21, la hora de l’autonomía. L’espaciu, presentáu pol periodista Inaciu Galán, busca conocenos meyor como pueblu, facer balance de cuarenta años y mirar hacia’l futuru de l’autonomía asturiana.
El capítulu dedicáu al presidente grabóse’l xueves na sala del Conseyu de Gobiernu del Palaciu de los Presidentes y nella’l presidente Adrián Barbón conversa con Inaciu Galán conversa alredor de la hestoria de l’autonomía asturiana, precedentes como’l gobiernu de Belarmino Tomás, los llogros y cuestiones pendientes, la so valoración de les distintes presidencies, asina como delles cuestiones d’actualidá alredor de la fallida reforma estatutaria y el futuru del país.
A lo llargo de los 17 capítulos del espaciu emitíos yá, pasaron pel programa los ex presidentes Pedro de Silva, Juan Luis Rodríguez-Vigil o Antonio Trevín, asina como ex conseyeros y conseyeres como Amelia Varcárcel, Graciano Torre, Xicu Xabel García Valledor, María Victoria Escudor, Antonio Masip y otros líderes políticos como la ex ministra María Luisa Carcedo, o los ex diputaos Xuan Xosé Sánchez Vicente y Gaspar Llamazares, buscando percorrer tolos momentos de l’autonomía asturiana.
La entrevista con Adrián Barbón va tar disponible darréu en RPA a la carta y va volver a emitise’l sábadu a les 13 hores en RPA.
