RPA va estrenar un espaciu nuevu n’asturianu esti martes 9 de febreru, el magacín Sentir Asturies, un programa radio que dea visibilidá y normalice l’asturianu. Cuatro Gotes Producciones realiza esti ambiciosu proyectu de conteníos xenerales con vocación d’información y entretenimientu. Pa ello’l programa cunta colos meyores profesionales que van poner tol so enfotu y dedicación n’apurrir a los oyentes un espaciu útil y risonderu.
Arantxa Margolles ya Inaciu Galán van ser los encargaos de presentar esti espaciu. Dambos con una llarga esperiencia en medios de comunicación asturianos, como la TPA con programes como Historias y Misterios, Elles, muyeres na lliteratura asturiana, Mundu Sidreru… que yá formen parte da la hestoria del audiovisual asturianu.
Esti magacín va tener una temática variada encetada en tonu distendíu y col asturianu como llingua vehicular. Conocer qué ta asocediendo al nuesu alredor, fuera d’Asturies y los nuevos enclinos nes redes sociales, la cultura y la tecnoloxía ye l’oxetivu principal.
Sentir Asturies quier llegar a un públicu nuevu, que se sienta identificáu cola nuesa forma de ver l’actualidá y Asturies. Pero non por ello va dexar fuera a otru públicu d’edá más avanzada o que peracaba otru tipu de conteníu. A última hora, pa tou aquel públicu que nun se conforme colos programes de radio tradicionales, que quiera pasar un ratu risonderu con humor y al empar arriquecese cola actualidá y propuestes qu’Asturies nos ufierta, esti ye’l so espaciu.
En Sentir Asturies vas poder participar y non yá escuchalu, yá que va tar presente en toles redes sociales con conteníu variáu. Interaccionar va ser posible por aciu opiniones al traviés d’audios o mensaxes qu’a los presentadores van llega-yos al traviés del teléfonu 621 279 215.
Ente los collaboradores van tar Pilar Sánchez Vicente, David Fernández, Marcos Salazar, Lluis Fanjul, Jennifer Berrocal, Víctor Suárez, Llucía Miravalles, Ivan Llera, Faustino Zapico, Lucía Montejo, Nuria López, María Esther García o Xuan Nel Turiel, ente otros y otres.
Amás de tar informáu de tola actualidá de forma distendida va haber más secciones que van contribuyir a facer d’esta retresmisión un magacín bien completu. Estes secciones van cuntar con espertos nos sos campos y apasionaos por Asturies.
Amás vas poder conocer a asturianos que viven n’otros países y poder compartir con nós cómo se sienten fuera del país. Por si fuera poco, l’escritor y periodista Inaciu Galán va averanos al llau más personal de protagonistes asturianos perte medies d’una entrevista mui personal na sección “El diván de Galán”, plantegada como una terapia musical con trés temes escoyíos pol protagonista. Esti miércoles va emitise la primera, con Rodrigo Cuevas.
Los presentadores
Arantxa Margolles (Xixón, 1982) ye hestoriadora pola Universidá d’Uviéu y arqueóloga pola Universidá Autónoma de Madrid. Collaboradora habitual d’El Comercio, TPA, onde presentó Histories y Misterios, RPA o PlayPresta, onde presenta Cróniques ocultes y ta especializada na divulgación de la hestoria, tamién con visites guiaes como la esitosa Xixón mete mieu, dientro del ciclu XixónTours.
Inaciu Galán (Xixón, 1986) ye periodista, xestor cultural y escritor. Presentador del programa Mundu Sidreru en TPA y director de proyectos como la plataforma PlayPresta, la revista Viaxast o los documentales Elles, muyeres na lliteratura asturiana o No se dice «ye», se dice «es». El so camín na radio llevólu a tener espacios n’Onda Peñes o la Cadena Ser a lo llargo de los años.
