– El Sespa realizó ayeri 4.582 pruebes y la tasa de positividad asitiase nel 6,33%, según el criteriu establecíu pol Ministeriu de Sanidá
– Les autoridaes sanitaries encamienten l’usu de mázcaru n’interiores si hai persones mayores de 65 años o con patoloxíes de riesgu y que les xuntes familiares celébrense solo con persones convivientes
La Conseyería de Salú confirma 226 nuevos casos de covid-19 diagnosticaos ayeri, xornada na que se producieron 36 ingresos por esta causa: 35 en planta y 1 en UCI. Amás, rexistráronse 27 altes.
Anguaño, nel Principáu hai 604 pacientes hospitalizaos con confirmación o barruntu de coronavirus y otres 122 persones afectaes permanecen n’unidaes de cuidos intensivos.
Per otra parte, el sábadu produciéronse 13 fallecimientos: ocho muyeres de 72, 81, 82, 89, 91, 92, 93 y 95 años, y cinco homes de 74, 83, 83, 94 y 98. Siete d’estes persones teníen la so casa nun centru residencial de mayores.
El Servicio de Salud del Principado (Sespa) realizó ayeri 4.582 pruebes de diagnósticu d’infección activa y la tasa de positividad asitiase nel 6,33%, según el criteriu establecíu pol Ministeriu de Sanidá, que realiza’l cálculu en función del númberu de pruebes positives procesaes, en cuenta de por casos confirmaos.
Cribados poblacionales
El Sespa apela a la solidaridá de la población de 30 a 50 años que mora nes árees incluyíes nos códigos postales 33011 (Uviéu), 33209 (Xixón) y 33401 (Avilés), y que vive con persones mayores de 65 años o curia d’elles, por que rellene el formulariu disponible nel enllaz https://www.astursalud.es/formulariu-pcr o llame al 984 100 400 y participe nel cribado pa la detección de casos de coronavirus.
El Serviciu de Salú va dir citando a les persones interesaes pa realizar una PCR. Pa facilitar el contactu, tienen d’incluyir nel formulariu un númberu de teléfonu operativu pa recibir información del día, hora y llugar onde se va llevar a cabu la prueba, según de la resultancia. Ruégase puntualidá pa evitar aglomeraciones y coles.
Con estos cribados, el gobiernu d’Asturies pretende detectar y aisllar a toles persones asintomáticas en zones d’alta incidencia, según a los sos contactos estrechos, pa frenar los contaxos ente la población más vulnerable a la covid-19, que son los mayores de 65 años.
Recomendaciones
Les autoridaes sanitaries encamienten a la ciudadanía que caltenga les midíes de protección (mázcaru, distancia, ventilación) n’interiores, especialmente cuando haya persones mayores o con patoloxíes de riesgu pa evitar brotes, y que les xuntes familiares se celebren solo con persones convivientes.
Asturies sigue en “riesgu bien alto” pola tresmisión comuñal del virus, lo que se traduz nuna gran presión asistencial, especialmente esmolecedora na ocupación de cames hospitalaries y de les unidaes de cuidos intensivos, según pol altu númberu de decesos.
Nesti contestu, alverten de que la movilidá ente les trés grandes ciudaes o ente conceyos constitúi un riesgu de trasmisión del virus si nun se cumplen rigorosamente les midíes de seguridá: llavadura frecuente de manos, usu correctu del mázcaru y caltenimientu de distancia interpersonal.
La Dirección Xeneral de Salú Pública encamienta a la ciudadanía a estremar la protección na vida social y familiar, especialmente coles persones mayores de 65 años que nun tán institucionalizaes, si caltienen contactu o conviven con neños, adolescentes y xente mozo.
La Conseyería de Salú encamienta a la collaboración, tantu individual como colectiva, pa evitar situaciones de riesgu. Amás, aconseya que s’eviten actividaes sociales y familiares innecesaries pa amenorgar el númberu de contaxos.
Salú Pública subraya una vegada más la importancia de la responsabilidá individual d’aquelles persones que tán pendientes de la resultancia d’una PCR o que son consideraes contactos estrechos por qu’acuten la so vida social, permanezan nes sos cases, vixilen el so estáu de salú y cumplan puramente la cuarentena.
El Gobiernu d’Asturies recuerda que, nesta situación escepcional, toos curiamos de toos.
