Salú confirma ocho nuevos positivos por coronavirus, trés d’ellos rellacionaos con La Buena Vida

Les autoridaes sanitaries piden a la ciudadanía que nun se relaxe nel cumplimientu de les midíes de seguridá para evitar la trasmisión

0
166

Asturies contabilizó nes caberes 24 hores ocho nuevos casos positivos de coronavirus. D’ellos, trés tán rellacionaos col biltu de La Buena Vida, colo que s’alcen a 13 les persones infectaes nesti chigre xixonés. Otru de los positivos ye un contactu estrechu d’unu de los casos del biltu de Castropol, de manera que, hasta agora, el númberu total d’afectaos xube a seis. Esti llunes computáronse por erru cuatro positivos a esti biltu.

Al marxe d’estos dos brotes, el restu de les andaes detectaes el martes correspuenden a un contactu estrechu venceyáu con un casu d’Aragón y una turista y un varón procedentes de Cataluña. Otru ta rellacionáu cola atención odontolóxica a un paciente positivu. Los arimaos presenten síntomes leves y tán aisllaos nes sos cases.

La Conseyería de Salú pide a la ciudadanía que nun se relaxe nel cumplimientu de les midíes de seguridá pa evitar la trasmisión del virus. Recuerda la obligatoriedá del usu del mázcaru pa mayores de seis años nes víes públiques y espacios al aire llibre; en cualquier espaciu zarráu d’usu públicu o que s’atope abiertu al públicu, según nos medios de tresporte públicos y privaos; nesti últimu casu, cuando los ocupantes nun convivan.

Coles mesmes, encamienta la llavadura frecuente de manos y aportuna en que ye imprescindible guardar una distancia interpersonal de, siquier, un metro y medio con persones coles que nun se convive. Amás aconséyase evitar les aglomeraciones y les actividaes sociales innecesaries.