La Conseyería de Salú desactivó l’alerta por calor n’Asturies énte’l descensu de temperatures previstu a partir de güei pola Axencia Estatal de Meteoroloxía (Aemet), con máximes y mínimes que nun van superar los estragales que pueden suponer riesgu pa la salú de la población. El Plan nacional d’actuaciones preventives de los efectos de los escesos de temperatura sobro la salú 2022 activóse’l pasáu martes con nivel de riesgu 2 (moderáu), al superase simultáneamente máximes de 30 graos y mínimes que nun baxaron de los 18 mientres delles xornaes consecutives.
Ye la primer vegada dende 2004, añu na qu’empezaron a monitorizarse estos episodios adversos, que se rexistra un periodu tan enllargáu d’elevaes temperatures.
La Dirección Xeneral de Salú Pública monitorizó a diariu les temperatures y previsiones meteorolóxiques, y xixiló la posible medría de la mortalidá pola situación meteorolóxica. Hasta esti momentu, al Serviciu de Vixilancia Epidemiolóxica nun-y consta nengún fallecimientu atribuyible al escesu de calor de la selmana pasada.
El Plan nacional d’actuaciones preventives de los efectos de los escesos de temperatura sobro la salú 2022 actívase tolos branos ente los meses de xunu y setiembre ya inclúi, ente otres midíes, la publicación d’un informe selmanal de la situación de riesgu nel portal web de Salú: www.astursalud.es.
Les autoridaes sanitaries revisen a diariu les temperatures y les previsiones de l’Axencia Estatal de Meteoroloxía, con 5 díes d’antelación, y xixilen la mortalidá que se produz mientres esti periodu. Esti plan tien como oxetivu menguar la morbilidad y les muertes acomuñaes a temperatures elevaes, yá que se reparó que trés o más díes consecutivos de temperatures altes y non habituales pueden provocar una medría neses cifres.
