Les unidaes d’Infecciones de Tresmisión Sexual del Hospital Monte Naranco y de la Casa del Mar, asina como la de Medicina Interna del Hospital Universitariu San Agustín van atender directamente a los usuarios previa cita
La Conseyería de Salú implanto esti mes el Programa de Profilaxis Pre-esposición (PrEP) al VIH, que consiste na dispensación d’un tratamientu farmacolóxicu asociáu a control médicu, siguimientu y educación pa la salú.
Esti programa de prevención non solo dispensa una medicación, sinón que “al traviés del siguimientu qu’establez el programa empobina a los sos usuarios escontra práctiques más segures p’amenorgar la so esposición al VIH” señaló’l xefe de Programes de Prevención de la Dirección Xeneral de Salú Pública, José María Blanco.
El programa destínase a persones adultes seronegativas que presenten un riesgu altu d’infectase por VIH. Considérase que podrán beneficiase unes 300 persones na comunidá autónoma. Con esti programa inténtase menguar la probabilidá d’infecciones nueves por VIH y rastrexar tamién otres dolencies de tresmisión sexual. Amás, va dexar a los usuarios del programa controlar l’apaición de resistencies a los antiretrovirales y tar atentos a los posibles problemes asociaos a esta medicación.
L’atención va realizase nes Unidaes d’Infecciones de Tresmisión Sexual (ITS) del Hospital Monte Naranco n’Uviéu y de Casa del Mar, en Xixón, mesmo que na Unidá VIH del Serviciu de Medicina Interna del Hospital Universitariu San Agustín d’Avilés.
La Unidá d’ITS del Hospital Monte Naranco va atender a los usuarios de les árees sanitaries II, IV y VII, que correspuenden col suroccidente, Uviéu y Mieres. Pela so parte, la ITS de la Casa del Mar va encargase de les persones interesaes de les árees de Xixón, oriente y el Valle del Nalón, mentes que n’Avilés van asistir a les persones de la so área y la de Xarrio.
Les persones interesaes van poder solicitar cita directa pel teléfonu nes trés unidaes nes que se centralizó l’atención asistencial. Asina mesmo, el personal sanitario d’Atención Primaria, les asociaciones que desenvuelven la so actividá con colectivos que puedan beneficiase del programa y les farmacies comunitaries onde se fai la prueba rápida de VIH, van facilitar información sobre esti programa.
Asturies rexistró 59 casos de VIH nel 2019, una incidencia que se caltién estable nos años últimos. El 84,7 % de los diagnósticos nuevos produzse per tresmisión sexual y el 3,4 % per vía endovenosa, siendo desconocíos los motivos que provocaron la tresmisión nel 11,9 % de los casos. Los varones ente 25 y 54 años son el grupu de población más afectáu.
