Salú aconseya adelantar la inmunización de les embaranzaes frente a la tosferina a les 27 selmanes de xestación
La Conseyería de Salú incorpora al calendariu vacunal la profilaxis nonavalente (VPH9) frente al virus del papiloma humanu, que va ser la única que se va utilizar en neñes y neños de 13 años. Esta vacuna aumenta la protección frente a los xenotipos oncoxénicos y los causantes de verrugues xenitales.
Ye una de les trés actualizaciones p’anguaño, de les que s’informó güei a los miembros del Comité Asesor de Vacunes del Principáu.
El calendariu vacunal incluye les profilaxis del rotavirus y el gripe a los naciellos prematuros, quier dicise, neños y neñes con menos de 37 selmanes d’edá o con menos de 1.700 gramos de pesu. Nel casu del rotavirus va alministrase ente los 2 y los 6 meses d’edá, anque la inoculación pue empezar a partir de les 6 selmanes de vida, y la vacunación antigripal anual va alministrase dende los 6 a los 24 meses d’edá.
Tamién s’adaptó la pauta de vacunación en prematuros de les vacunes hexavalente y del neumococu de 13 serotipos a la mesma pauta que s’usa nos nacíos a términu. Nesti sentíu, van alministrase dambes profilaxis a los 2, 4 y 11 meses d’edá como nos demás naciellos.
Al respective de les xestantes, aconséyase adelantar a la selmana 27 l’alministración de la vacuna de la tosferina, poles evidencies científiques que demuestren que protexe a los naciellos y tamién a los prematuros.
