Na tarde d’ayerí, el Muséu de la Sidra de Nava acoyó la entrega de los premios del Campeonatu Oficial d’Escanciadores d’Asturies 2022, onde se reconocieron a los diez primeros clasificaos d’esta última edición. Toos ellos recibieron diploma acreditativu, y a los trés primeros un premiu n’efectivu. Tamién se galardonó a los trés meyores puntuaos de la categoría sub25.
Los ganadores d’esta edición fueron los siguientes:
1. Salvador Ondó (Tierra Astur)
2. Jorge Vargas (La Montera Picona)
3. Wilkin Akiles (La Avenida)
4. Jonathan Trabanco (Los Portales de Jaimón)
5. Pelayo Rodríguez (Independiente)
6. Alberto Truchado (La Ruta)
7. Humberto Rey (Independiente)
8. Pablo Suárez (Tierra Astur)
9. Rubén Campa (La Bolera)
10. Antonio Sorca (El Portal)
Categoría Sub-25
1. Daniel Rujas (La Botica)
2. Alexander Gabriel (Tierra Astur)
3. José Ramón (El Centenario)
Antes de la entrega de diplomes, les autoridaes presentes nel actu dirixieron unes palabres al públicu asistente. “Tamos bien contentos de sofitar esti concursu. La sidra natural y l’escanciáu van de la mano. Tenemos caltener esta tradición. Primero, porque ye patrimoniu nuesu. Y segundu, porque col echáu la sidra algama la so máxima calidá”, manifestó’l vicepresidente del Conseyu Regulador de la DOP Sidra d’Asturies, Víctor Ramos.
Per otru llau, el presidente de Otea, José Luis Álvarez Almeida, adelantró qu’esti miércoles va llevar a cabu la formalización del alcuerdu del certificáu de profesionalidá del escanciador, una categoría qu’alza al profesional del escanciáu “a otres como la de sumiller”. Pela so parte, la directora xeneral de Desenvolvimientu Rural y Agroalimentación, Begoña López, consideró que “la figura del escanciador ye tan importante como la del llagarero, cosechero o productor. Cada vez que l’escanciador llevanta’l brazu, llevanta a Asturies”, concluyó.
