La venta de tabacu mentoláu ta prohibía dende esti miércoles n’España. El Ministeriu de Sanidá recuerda que nun se podrán fabricar, distribuyir nin comercializar dientro de la Xunión Europea les marques comerciales de tabacu que contengan mentol. Remata asina la moratoria establecida pa estos productos yá sía como arume presente na so composición o en cápsules dosificadores en filtros.
Esta decisión parte del compromisu de los Estaos miembros na llucha contra’l tabaquismu. La razón fundamental de la mesma ye qu’estos productos favorecen la introducción de nuevos consumidores de tabacu, sobremanera mozos, y enzanquen la posibilidá de dexalo. El mentol incluyíu dientro del productu sirve p’amazcarar el sabor amargosu del tabacu en combustión. Amás, tien un efectu anestésicu y ye capaz d’adormilitiar la boca y el gargüelu. Tien coles mesmes propiedaes desconxestionantes y refrescantes de les mucoses, polo qu’amazcara l’efectu irritante, el picor y la conxestión de les víes respiratories.
El mentol tien tamién un efectu dilatador de los alvéolos pulmonares. Esto provoca una absorción más rápida de la nicotina del tabacu, que tien un potente efectu adictivu. Ello aumenta, indirectamente, el potencial adictivu del productu nel so conxuntu. Estos sabores y arumes amonten, poro, el atractivu del productu y esiste la falsa percepción de que son más saludables.
