Xixón al día

Categoría: Sociedá

  • El Gobiernu d’Asturies reanuda esta fin de selmana’l serviciu d’autobuses de pela nueche

    El Gobiernu d’Asturies reanuda esta fin de selmana’l serviciu d’autobuses de pela nueche

    Les restricciones de 2020 ficieron que’l númberu d’usuarios cayere hasta los 42.500 frente a los 178.680 qu’usaren esti tresporte en 2019

    El Consorciu de Tresportes d’Asturies (CTA), dependiente de la Conseyería de Mediu Rural y Cohesión Territorial, va volver a entamar esta fin de selmana’l serviciu d’autobuses de pela nueche búho na zona central d’Asturies y nel valle del Nalón les nueches de los vienres y sábados y dellos víspores de festivu.

    La decisión, empuesta a ameyorar la seguridá de quien se mueven nesta franxa horaria por motivos llaborales o d’ociu, adoptóse dempués de que sanidá actualizara les midíes pa faer frente al coronavirus y ampliáu la hora de zarru del ociu de nueche hasta les 3 de la madrugada a partir de mañana, día 11.

    Los servicios especiales de pela nueche búho (tanto urbanos, como rexonales), que funcionaben les madrugaes de los vienres y los sábados, atayáronse’l 13 de marzu de 2020 como midida en materia de tresporte y movilidá pa contener la pandemia. Estes restricciones espliquen que l’añu pasáu’l númberu d’usuarios cayera hasta los 42.500, frente a les 178.680 persones que se beneficiaren del serviciu en 2019.

    Una vegada analizáu’l contestu de movilidá, a partir de mañana, día 11, van tar activos los horarios y calendarios habituales de les once llinies que dan esti serviciu:

    • Búho Piedrasblancas-Avilés-Piedrasblancas (circular) / CTEA: Dende les 23:00 hasta les 05:00 hores, cada hora, y a les 06:00 l’últimu serviciu hasta Los Campos. Vienres nueche, sábados nueche.
    • Búho Uviéu-Mieres / Transportes Bimenes y Alcotán: Uviéu: 00:05, 02:05 y 05:05 hores. / Mieres: 00:30, 02:30 y 05:30 hores. Vienres noche, sábados nueche.
    • Búho Uviéu-Sama / Alcotán y Transportes Bimenes: Uviéu: 01:00, 04:00 y 06:00 hores. / Sama: 23:30, 01:30 y 04:30 hores. Vienres nueche, sábados nueche
    • Búho Uviéu-Xixón-Uviéu / Ebrobus: Uviéu (dende les 23:30 hasta las 06:30, cada hora) / Xixón (dende les 23:00 hasta las 06:00, cada hora). Vienres nueche, sábados nueche.
    • Búho Avilés-Uviéu-Avilés / Ebrobus: Avilés (dende la 23:00 hasta las 06:00, cada hora)/ Uviéu (dende les 23:30 hasta las 06:30, cada hora). Vienres nueche, sábados nueche.
    • Búho Lluanco-Xixón / Automóviles Luarca: Lluanco (dende les 23:30 hasta las 06:30, cada hora) / Xixón (dende la 23:00 hasta las 06:00, cada hora). Vienres nueche, sábados nueche.
    • Búho Avilés-Xixón-Avilés / Automóviles Luarca Xixón (dende les 23:30 hasta las 06:30, cada hora) / Avilés (dende les 23:00 hasta las 06:00, cada hora). Vienres nueche, sábados nueche.
    • Búho Uviéu-La Pola de Siero / Automóviles Luarca: Uviéu (dende les 23:00 hasta las 06:00, cada hora) / La Pola de Siero (dende les 23:30 hasta las 06:30, cada hora). Vienres nueche, sábados nueche.
    • Búho Uviéu-La Fresneda-Posada de Llanera / Autocares Hortal: Uviéu (dende les 00:00 hasta las 06:00, cada dos hores) / Posada de Llanera (dende les 23:00 hasta las 05:00, cada dos hores). Vienres nueche, sábados nueche.
    • Búho Villa-Llaviana / Consorcio del Nalón Alcotán-Autobuses de Langreo: Villa (dende la 23:45 hasta las 05:45, cada hora y media)/ Llaviana (dende les 23:00 hasta las 05:00, cada hora y media). Vienres nueche, sábados nueche, víspores de festivos.
    • Búho Uviéu-Riosa / Transportes Bimenes: Uviéu (dende les 00:30 hasta las 06:30, cada dos hores) / Riosa (dende les 23:30 hasta las 05:30, cada dos hores). Sábados nueche.
  • Educación busca incoporar muyeres a graos de FP tradicionalmente masculinizaos

    Educación busca incoporar muyeres a graos de FP tradicionalmente masculinizaos

    La Conseyería d’Educación llanzó una campaña de publicidá coles mires de favorecer la incorporación d’alumnes de Formación Profesional (FP) a ciclos y sectores tradicionalmente masculinizados. La iniciativa incide na igualdá de capacidaes en cualquier ámbitu profesional y na necesidá de superar los estereotipos de xéneru na elección d’itinerarios formativos.

    La campaña, financiada pol Conseyu d’Asturies de la Formación Profesional, utiliza pa la so creatividá imáxenes de muyeres matriculaes en cuatro d’esos ciclos con una presencia masculina mayoritaria. En concretu, trátase d’estudiantes de Técnica en Soldadura y Calderería, Técnica en Carpintería y Mueble, Técnica en Mecanizáu y Técnica Superior en Diseñu de Fabricación Mecánica.

    Les estadístiques reflexen qu’hai families profesionales de FP nes que la presencia masculina supón ente’l 95% y el 99%. Asina asocede en disciplines como Tresporte y Caltenimientu de Vehículos, Fabricación Mecánica, Instalación y Caltenimientu o Eletricidá y Electrónica, ente otros exemplos.

    Sol eslogan La Formación Profesional trabaya ensin estereotipos. ¡Esperámoste!, la campaña ta espublizándose tanto en prensa escrita como en medios dixitales, radios, redes sociales y cartelería tradicional.

    D’esta forma, pretende contribuyise a romper cola asociación d’oficios masculinos y femeninos antes del entamu del periodu de solicitúes de plaza en FP, previstu pal próximu día 21.

  • Asturies amuesa la so gastronomía na feria «Madrid Fusión»

    Asturies amuesa la so gastronomía na feria «Madrid Fusión»

    La conseyera de Cultura presenta les campañes promocionales de les marques de calidá destinaes a hostelería y restauración .

    La conseyera de Cultura, Política Llingüística y Turismu, Berta Piñán, abrió güei na feria Madrid Fusión l’Espaciu Gastronómicu Asturies Paraísu Natural y Alimentos del Paraísu, cola presencia de los restauradores con estrella Michelin. Esta ye la primer vez que’l Gobiernu del Principáu participa con estand propiu a la gran cita internacional de la gastronomía que se celebra en Madrid y en que la so inauguración participó tamién la viceconseyera de Turismu, Graciela Blanco.

    La conseyera valoró la presencia de la comunidá como “la meyor manera de proyectar la fuercia y el potencial de la gastronomía asturiana, nun eventu que se presenta como’l primer congresu global del sector nel mundu”. Piñán insistió na voluntá del Principáu de que la gastronomía sía unu de les exes principales d’Asturies como destín y destacó, ente les acciones próximes d’impulsu turísticu, la celebración na comunidá del congresu internacional Mujeres, Gastronomía y Medio Rural, previstu pa setiembre.

    Mientres la so intervención, previa al actu central de la xornada, la titular de Cultura glosó la relevancia de les dos marques de calidá del Principáu pa hostelería y restauración: Meses d’Asturies y Sidreríes d’Asturies. Dambes arrexunten un bon númberu d’establecimientos con estándares elevaos confirmaos por esixentes auditoríes de serviciu y instalaciones. Amás, la conseyera presentó los audiovisuales realizaos pa la so promoción, trabayos que se sumen a los divulgaos va unes selmanes pa los sellos de calidá d’agospiamientos: Casones Asturianes y Aldea–Asturies Calidá Rural.

    La primer xornada del espaciu asturianu en Madrid Fusión tuvo como principal atractivu la presencia nes cocines de profesionales de la restauración rexonal con estrella Michelin. Los cocineros Nacho y Esther Manzano, de Casa Marcial, y Ricardo Sotres, d’El Retiro, xuntu con Toño Argüelles, d’Argüelles Chocolatier, ellaboraron un menú singular pa los visitantes qu’enllenaron el comedor. El recintu, de 160 metros cuadraos, tien un aforu de 40 persones. L’espaciu d’Asturies tien cubiertes dende va unos díes les reserves pa toles sos actividaes.

     

    Degustación d’alimentos ecolóxicos

    Antes de la xinta de les estrelles Michelin, el pabellón ufiertó una degustación d’alimentos ecolóxicos d’Asturies. La xornada va concluyir con una cata-degustación de los quesos de les denominaciones d’orixe protexíes (DOP) Afuega’l Pitu, Gamonéu, Casín y Cabrales.

    Mañana, el programa va empecipiar con una cata de sidres naturales esplumoses acoyíes a la DOP Sidra d’Asturies y va rematar con una cata-armonizaxe de la Indicación Xeográfica Protexía (IGP) Choscu de Tinéu con vinos DOP Cangas. Ente dambes actividaes, la xinta va tar dedicada a les guisanderas asturianes y el menú va ser ellaboráu por Yvonne Corral, de Casa Telva; Ramona Menéndez, de Casa Belarmino, y Julio Blanco, de la pastelería Pomme Sucre.

    El miércoles, día de la clausura, van ellaborar el menú de la xinta, dedicáu a los talentos nuevos, Xune Andrade, del Restorán Monte, y Javier Álvarez Farpón, de Casa Farpón, con Jonathan González, de la pastelería Cabo Busto, que va encargase de los postres.

  • Más de 3500 aspirantes participen nes pruebes de certificación de cuatro llingües estranxeres

    Más de 3500 aspirantes participen nes pruebes de certificación de cuatro llingües estranxeres

    Un total de 3.548 aspirantes va sometese hasta’l 7 de xunu a dalgún de los exámenes de certificación de competencies llingüístiques nos niveles básicu, intermediu y avanzáu d’alemán, francés, inglés y italianu, nes escueles oficiales d’idiomes. Trátase de la cifra más baxa de los 3 últimos años. Les pruebes empezaron güei col C1 d’italianu y inglés y van siguir mañana col mesmu nivel d’alemán y francés.

     

    La Conseyería d’Educación publicó un protocolu de midíes de seguranza frente a la covid validáu poles autoridaes sanitaries. Una de les novedaes qu’introduz esti documentu ye que los aspirantes han presentar una declaración responsable onde garanticen que nun tienen síntomes compatibles col coronavirus. Nel casu de menores d’edá, los tutores llegales van tener que validar esa declaración con una firma.

    El protocolu de midíes en vigor pa toles pruebes ta disponible na web d’Educastur, nesti enllaz: https://cutt.ly/GnuDSIQ

    Los exámenes con más inscripciones concéntrense nel nivel intermediu, en concreto, nel B2. El más numberosu va ser el d’inglés, que se va celebrar esti llunes, 31 de mayu, con 1.485 aspirantes.

    Tanto nesta prueba como nes demás, les inscripciones pártense ente toles sedes, a tenor de los recursos humanos disponibles, cola mira de garantizar una organización afayadiza. D’esta manera, un 10 % de los aspirantes va examinase nuna sede distinta a aquella onde formalizó la solicitú.

    El profesoráu de los departamentos didácticos de les escueles oficiales d’idiomes ye l’encargáu d’evaluar y calificar a les persones aspirantes. En total, constituyéronse 22 tribunales, partíos n’ocho sedes, que tán integraos por 144 docentes. Un equipu formáu por profesionales de les mesmes escueles ellaboró 80 modelos d’exámenes pa les cuatro llingües estranxeres.

    Les pruebes consten de cinco partes, que se correspuenden con otres tantes habilidaes: comprensión de testos escritos, comprensión de testos orales, producción de testos escritos, producción de testos orales y mediación. Pa sacar la certificación va ser menester superar toos estos bloques. 

     

  • Cuasi 9.500 docentes piden participar nel segundu plan d’evaluación

    Cuasi 9.500 docentes piden participar nel segundu plan d’evaluación

    La Conseyería d’Educación abre’l plazu d’alegaciones hasta’l día 28, desque publicó la llista provisional d’almisiones .

    La Conseyería d’Educación publicó les llistes provisionales d’almisiones y esclusiones nel segundu Plan d’Evaluación de la Función Docente, n’analizando la documentación de cuasi 9.500 solicitúes recibíes. D’equí p’arriba, el profesoráu tien de plazu hasta’l vienres, día 28, pa presentar les alegaciones que considere oportunes.

    La llista provisional d’almitíos y almitíes nel tramu A, abiertu a tolos profesionales con más de cinco años d’antigüedá, a cuntar dende’l 1 de setiembre del 2020, xube a 3.820 docentes. La rellación del tramu B, de implantación nueva y reserváu p’aquellos que nesa mesma fecha yá cumplieren cinco años de permanencia nel plan y cunten polo menos con cuatro evaluaciones positives, incluye a otros 5.210.

    El Principáu analizó tolos pidimientos y encuadrólos de manera automática nel tramu pal que cumplíen los requisitos.

    Esti segundu Plan d’Evaluación de la Función Docente sustituye al anterior, lo qu’implica que tol profesoráu interesao tuvo que volver adherise.

    Otra manera, la conseyería tramita yá’l cambéu normativu necesariu pa poner en marcha esti plan. El director xeneral de Personal Docente, José Manuel López Guerrero, llevó la propuesta de decretu de segunda modificación del reglamentu de los planes d’evaluación de la función docente a les meses de negociación de personal, que dieron el preste.

    Educación cunta con una partida de 4,8 millones pa cubrir el segundu tramu que s’habilita. La conseyería comprometióse a empezar a pagalu nel últimu cuatrimestre del añu, polo que la tramitación va tener que tar llista’l 31 d’agostu.

  • Entamen les obres pa iguar el teyáu del Centru d’atención a la dependencia de Candás

    Entamen les obres pa iguar el teyáu del Centru d’atención a la dependencia de Candás

    Les obres, qu’incluyen tamién reformes na terraza de la primer planta, empezaron ayeri y van rematar en mes y mediu

    La Conseyería de Derechos Sociales y Bienestar empecipió ayeri les obres pa impermiabilizar la cubierta y la terraza de la primer planta del centru d’atención a la dependencia de Candás, a les que se destinen 37.840 euros, y que van rematar en mes y mediu.

    “Esta obra yera una de les nuestres prioridaes pa garantizar un meyor serviciu a toles persones usuaries d’esti centru, que reciben terapies afeches a les sos necesidaes y que yá retomaron les sos rutines”, esplica la conseyera Melania Álvarez.

    La terraza de la primer planta ye una de les zones de más usu, yá que ellí desenvuélvense actividaes al aire llibre.

    La Fundación Asturiana d’Atención y Protección a Persones con Discapacidáes y/o Dependencies (Fasad) encárgase de xestionar esti equipamientu, qu’incluye dos recursos nel mesmu edificiu: el centru d’apoyu a la integración, onde 22 persones acuden a terapia, y el centru de día, con 15 usuarios.

    El centru inauguróse en xineru del 2011 y, ente otros servicios, ufierta terapies y talleres pa mayores dependientes y persones con discapacidá. Cunta con un equipu multidisciplinar compuestu por diez profesionales: director, psicólogu, fisioterapeuta, trés auxiliares d’enfermería, dos cuidadores y un educador.

    Les obres pa la so puesta en marcha supunxeron una inversión d’aproximao 1,4 millones.

  • El Muséu Arqueolóxicu presenta la espada de Sobrefoz, perdida hasta 1998

    El Muséu Arqueolóxicu presenta la espada de Sobrefoz, perdida hasta 1998

    La escepcional pieza, que se daba por perdida hasta 1998, ta datada a partir del 1.100 a.C. y foi donada al centru cultural pola hermana del so redescubridor, Maximino Blanco del Dago

    El presidente del Gobiernu del Principáu, Adrián Barbón, presentó güei nel Muséu Arqueolóxicu la espada de Sobrefoz, un oxetu únicu de la Edá de Bronce asturiana donáu al centru cultural en 2019 por María Victoria Blanco del Dago, xunto con diversos preseos de piedra de distintes procedencies.

    Blanco del Dago, que tuvo presente nel actu, manifestó que la donación faila en memoria del so hermanu Maximino, que dedicó gran parte de la so vida a coleccionar y a salvaguardar el patrimoniu cultural. El Muséu Arqueolóxicu d’Asturies quixo celebrar el Día Internacional de los Museos con esti singular eventu, al qu’asistieron tamién la conseyera de Cultura, Berta Piñán; el director xeneral de Cultura y Patrimoniu, Pablo León, y la directora del muséu, María Antonia Pedregal.

    El que fuera caderalgu de Prehistoria de la Universidá d’Uviéu Miguel Ángel de Blas, gran especialista na Edá de Bronce asturiana, foi l’encargáu d’esplicar la importancia histórica y el contestu cultural de la espada pistiliforme de Sobrefoz.

    Na tesis doctoral de De Blas, publicada en 1983, detállense les circunstancies del afayu de la pieza y de l’antigüedá que-y atribúin los especialistes. La espada foi afayada en 1878 n’una cuerria del pueblu de Sobrefoz (Ponga), identifícase como perteneciente a la familia de les espades con llingüeta tripartita y, dientro d’elles, al grupu de les pistiliformes atlántiques.

    Los especialistes envaloren que la pieza enmárcase n’una cronoloxía a partir del añu 1.100 a.C., y destaquen reiteradamente’l so calter atlánticu polos sos paralelismos con pieces topaes en Galicia, l’occidente de Francia y les isles britániques. La espada de Sobrefoz ye un oxetu únicu nel repertoriu arqueolóxicu d’Asturies ya ilustra un periodu del que se tienen bien escasos testimonios, nengunu de la entidá d’esta pieza. La calidá de la so factura técnica y l’escelente caltenimientu del so cuerpu metálicu faen pensar que vien de un depósitu votivu o funerariu rellacionáu con dalgún personaxe importante de la dómina.

    Cola so llegada al Muséu Arqueolóxicu, la pervalible pieza va poder sometese a estudios tipolóxicos y metalográficos qu’apurran datos hasta agora desconocíos. Al tiempu, ábrese la posibilidá d’afondar na conocencia de les técniques metalúrxiques practicaes na Edá del Bronce n’Asturies, y de verificar si los armeros que lu fundieron y forxaron utilizaron el cobre que  por munchos sieglos apurrieron les mines d’El Aramo o El Milagru a los artesanos prehistóricos.

    La donación

    Tres el so descubrimientu en Sobrefoz y la so pertenencia a la colección de bienes arqueolóxicos de Sebastián de Soto Cortés, ún de los grandes coleicionistes d’Asturies, el rastru de la espada difuminóse y ye bien probable que yá nos años 30 del pasáu sieglu nun tuviera alcontrada. En 1998, Maximino Blanco del Dago redescúbrela al realizar reformes n’una vivienda próxima al palaciu de Labra, casa familiar de Soto Cortés.

    Blanco foi un arquitectu técnicu establecíu en Cangues d’Onís que s’especializó na rehabilitación d’edificios históricos, como’l mesmu palacia de Labra, y na construcción d’hoteles rurales y cases d’aldega. Sicasí, el so llabor más reconocíu foi la d’adquirir, caltener y dar valor a un ricu patrimoniu popular y formar una gran colección de cerámica con pieces d’alfareros asturianos, munchos d’ellos yá desapaecíos. En 1995, inauguró’l Muséu Basilio Sobrecueva padedicalo al mundu de la cerámica.

    La voluntá de donar la espada al Muséu Arqueolóxicu ye una decisión de la so hermana María Victoria para caltener el pervalible bien arqueolóxicu y ponelu a disposición pa la investigación y tamién pal disfrute de la ciudadanía. Asina, en memoria del so hermanu Maximino, María Victoria Blanco donó al muséu en payares de 2019 la espada pistiliforme de la Edá de Bronce, un hachu de talón y dos argolles de bronce, mesmo que un conxuntu d’ocho útiles de piedra de distintes procedencies.

  • «Xixón, con ganes de ti» busca atrayer a los primeros turistes tres l’estáu d’alarma

    «Xixón, con ganes de ti» busca atrayer a los primeros turistes tres l’estáu d’alarma

    La campaña va distribuyise en plataformes d’audio online, TV, redes sociales, medios de comunicación online, revistes especializaes y soportes d’esterior.

    “Xixón, con ganes de ti”. Asina se presenta nun spot publicitariu nuevu la ciudá asturiana col envís d’atrayer turistes de magar finó l’estáu d’alarma y el pieslle perimetral de la comunidá autónoma. El spot nuevu de Xixón Turismo quier amosar que la ciudá, y la so xente, yá tá preparada p’acoyerar al visitante y cómo’l sector turísticu se prepara pa recibir a los/es turistes: agospios, restauración, turismu activu, llimpieza, caltenimientu, museos, xardines, sableres, cultura…

    “En el nuevo vídeo queríamos apostar las personas. Está claro que lo que los y las turistas buscan actualmente es la hospitalidad, el optimismo y la cercanía”, comenta Santos Tejón Llaneza, conceyal de Promoción Económica, Empléu, Turismu y Comerciu Llocal de Xixón.

    El vídeu tuvo en cuenta l’impautu de la COVID-19 y va empobinase a los segmentos de turismu prioritarios afitaos nel nuevu Plan de Marketing de Turismu 2021-2024: turismu mariniegu; turismu de congresos; turismu familiar; gastronomía; naturaleza; turismu activu; cultura ya hestoria.

    El nuevu spot va emitise hasta’l 31 de mayu a nivel nacional al traviés de plataformes online d’audio (Spotify, Youtube Music, Soundcloud), TV (MiTele, AtresPlayer, TVG, CyLTV, EiTB, Telemadrid y TV3), redes sociales (Youtube, Instagram) y en medios de comunicación online. Arriendes d’ello, van incluyise publirreportaxes online en Viajes National Geographic y Condé Nast Traveler y publicidá esterior en metro y mercaos gastronómicos de Madrid y en Barcelona.

    La campaña ta empobinada a Galicia, Euskadi, Castiella y Llión, Madrid, Sevilla, Málaga, Cantabria, Navarra, La Rioxa, Estremadura, Cataluña, Valencia, Alicante y Murcia.

    Xixón, en toles ocasiones

    Yá en xunu, Xixón Turismu va reforciar la so campaña publicitaria pa reimpautar a les persones que vieren el spot y otres anuncies de la fola de mayu y llegar a les persones que tean buscando información n’Internet pa viaxar a Xixón. Arriendes d’ello, y col envís de recuperar al turista internacional, van ponese en marcha aiciones publicitaries online en Francia y Portugal.

    Nesti casu, va volver emplegase la creatividá “Xixón en toles ocasiones”, protagonizada por Rodrigo Cuevas, ellaborada en 2020 y qu’entá se caltién nel imaxinariu del posible turista. “Son muchos años de trabajo en Gijón/Xixón Turismo y estamos bien posicionados. Hay que reencontrarse con el turista, con un turista que ya nos conoce, y hay que ofrecerle vínculos emocionales”, comenta Daniel Martínez Junquera, direutor de Xixón Turismu.

     

    Resultaos

    Coles aiciones publicitaries previstes van xenerase 18,2 millones d’impautos, 46 700 clics a la web de Xixón Turismu y 1,9 millones de vistes completes de los spots.

  • Asturies abre la puerta al piragüismu femenín nel Centru de Tecnificación Deportiva de Tresona

    Asturies abre la puerta al piragüismu femenín nel Centru de Tecnificación Deportiva de Tresona

    La Conseyería de Cultura, Política Llingüística y Turismu empezó’l procesu pa que’l piragüismu femenín tenga acoyida nel Centru de Tecnificación Deportiva (CTD) de Tresona. La Dirección Xeneral de Deporte propón ampliar el CTD de piragüismu, de manera qu’acueya a piragüistes junior femenín. El proyectu, previstu pal cursu 2021-2022, va ser pioneru n’España n’acoyer esta categoría, antoxana pa deportistes d’altu nivel qu’aspiren a competir en campeonatos nacionales y internacionales.

    Deporte propunxo’l proyectu esta selmana nel marcu d’una xunta de la comisión de siguimientu del CTD de Tresona onde tuvieron presentes los presidentes de les federaciones española y asturiana, Pedro Pablo Barrios y Miguel Gallo, respectivamente. La propuesta de la directora xeneral de Deporte, Beatriz Álvarez Mesa, foi perbién acoyida pol organismu nacional y llogró el sofitu dafechu de la Federación Asturiana de Piragüismu.

    L’oxetivu del plan ye’l de sumar al CTD junior masculín un CTD junior femenín, de manera que les piragüistes dispongan de los recursos qu’ufierta’l programa de tecnificación de Tresona tocante a instalaciones, medios técnicos, médicos, científicos, educativos y culturales, de la mesma manera y nes mesmes condiciones que los palistes masculinos.

    Anguaño, el Principáu pon a disposición de la federación española 14 places pa deportistes del CTD de piragüismu y l’organismu federativu ta ellaborando un proyectu nuevu pa definir toles cuestiones de naturaleza técnica.

    Ente les obligaciones de la federación española ta la d’establecer y aplicar una vez al añu los criterios de selección de quien van conformar los grupos de tecnificación de piragüismu nel CTD de Tresona, facilita-yos la participación en competiciones nacionales y realizar el siguimientu técnicu de deportistes y entrenador.

    El Programa Nacional de Tecnificación Deportiva de Piragüismu desenvuélvese nel CTD de Tresona dende va años, activáu pol Conseyu Superior de Deportes en coordinación coles autoridaes asturianes y la Federación Española de Piragüismu. El programa busca sofitar a potenciales deportistes d’altu nivel pa que llogren los sos oxetivos, ensin perxuiciu de la so formación académica afayadiza.

  • Nel Amaro protagoniza la Selmana de les Lletres, qu’arranca’l llunes en Mieres

    Nel Amaro protagoniza la Selmana de les Lletres, qu’arranca’l llunes en Mieres

    La Conseyería de Cultura, Política Llingüística y Turismu presentó’l programa de la 42 Selmana de les Lletres Asturianes, que se celebra ente’l 3 y 7 de mayu próximos. Baxo’l lema Nel Amaro, la voz comprometida, y cola coordinación de Xandru Fernández, la Selmana rinde homenaxe al escritor y artista mierense coincidiendo colos diez años de la so muerte y los 75 de la so nacencia.

    La Dirección Xeneral de Política Llingüística ellaboró una programación alredor a l’actividá creadora tan estensa de Nel Amaro cola mira de reivindicar la figura humana y artística del escritor mierense. Asina, la obra conmemorativa de la 42 Selmana de les Lletres va ser Pruebes d’autor. Les siete vides de Nel Amaro, un llibru integráu por siete artículos sobre Nel Amaro y el contestu cultural, social y políticu de la so obra, qu’incluye amás material gráfico abondo. Esti llibru, que se va presentar nel actu inaugural de la Selmana, va repartise de baldre ente quien compre un llibru o discu n’asturianu’l día 7 de mayu, Día del Llibru Asturianu.

    Tamién nel actu inaugural, que se va celebrar el día 3 n’Auditoriu Teodoro Cuesta de Mieres del Camín, va proyectase un documental sobre Nel Amaro y va inaugurase una esposición onde se fai un percorríu pela vida y la obra del artista y la dómina na que se desenvolvió’l so llabor creativu al traviés de material gráfico, bibliográfico y audiovisual. La muestra, que s’inaugura en Mieres por ser el conceyu onde nació y vivió Nel Amaro, va poder vese depués en dellos llugares d’Asturies.

    El mesmu día de l’apertura de la Selmana de les Lletres, la compañía Nun Tris va ufiertar tamién en Mieres una llectura dramatizada de la obra Antígona, por exemplu, cola que Nel Amaro ganó’l Premiu de Teatru de l’Academia de la Llingua Asturiana en 1991. Esta obra va grabase, poniéndose depués a disposición de los centros docentes pa la so visualización con fines didácticos.

    El martes día 4, nel salón d’actos del Hotel d’Asociaciones de La Pola (Ḷḷena), preséntase’l llibru Esperté ensin patria pa dormir ensin pruyimientos de conciencia, una antoloxía estensa de la obra narrativa, poética y teatral de Nel Amaro seleccionada pol escritor y profesor Xandru Fernández, y coeditada pola Conseyería de Cultura, Política Llingüística y Turismu y Ediciones Trabe. Nesti mesmu actu, dellos performers y artistes visuales y de mail art van facer un homenaxe persingular al artista.

    Asina mesmo, en Llaboral Centru d’Arte, en Xixón, va inaugurase’l miércoles día 5 la esposición Nel Amaro-Postal/Visual, que recopila la so producción artística, incluyendo l’arte n’acción, la edición de publicaciones o la creación d’obres de poesía visual.

     

    Poesía en gallego-asturianu

    En cuantes a la presencia del gallego-asturianu na Selmana de les Lletres, la Conseyería de Cultura editó l’antoloxía Al aveiro d’un trabatel. Úa escoyeta de poesía contemporánea en gallego-asturiano, que recueye y ilustra una muestra de la poesía publicada en Trabatel. Revista eonaviega de lliteratura. La obra va presentase’l miércoles día 5 na Casa de la Cultura d’As Figueiras (Castropol), y va repartise de baldre en llibreríes de la comarca Navia-Eo’l 7 de mayu, Día del Llibru Asturianu, al comprar un llibru nesa llingua.

    El xueves día 6, n’Auditoriu Príncipe Felipe d’Uviéu, la Orquesta Sinfónica del Principáu d’Asturies (OSPA) ufierta’l Conciertu de les Lletres Asturianes. Baxo la dirección del maestru Rubén Díez, la OSPA va interpretar Rapsodia asturiana y Don Quijote y la batalla de los rebaños, dambes de Leoncio Diéguez Marcos, y Bricial, poema sinfónicu, de Guillermo Martínez.

    La programación de la Selmana de les Lletres zárrase’l viernes día 7 en Llaboral Centru d’Arte, en Xixón, cola sesta edición d’Entaína a escribir, un concursu de microrrellatos improvisaos n’asturianu pa menores de 35 años.

     

    Programa completu