Xixón al día

Categoría: Asturies

  • El Principáu empecipia mañana la segunda fase del programa de bonos de descuentu pal pequeñu comerciu

    El Principáu empecipia mañana la segunda fase del programa de bonos de descuentu pal pequeñu comerciu

    El Gobiernu d’Asturies entama mañana la segunda fase del programa de bonos de descuentu pal pequeñu comerciu Bono Comerciu Asturies, al que destina 1.285.190 euros.

    Les persones interesaes van poder descargar los bonos, a partir de mañana y hasta el 15 d’ochobre –si nun s’escosen enantes- por aciu la so inscripción nel portal: https://bonoscomercioasturias.com. El plazu pa trocalos tamién empieza mañana y va rematar el 30 de payares.

    Al tratase de la segunda fase del programa, los 1.200 comercios xuníos son los mesmos que participaron nos meses de mayu y xunu.

    Pa les persones interesaes en consiguir los bonos, el programa va funcionar de la mesma que na primer fase. El sistema de descuentos articúlase al traviés de la plataforma web, na que los usuarios, una vegada rexistraos, van poder descargase los bonos. Estos van tener formatu dixital, van cuntar con un códigu QR y van poder utilizase por aciu una aplicación que dexa pagos dixitales.

    Cada persona va poder descargase, a lo más, 5 bonos de 10 euros, y va poder utilizar unu por cada 30 euros de compra. El Gobiernu d’Asturies va poner en circulación un total de 125.819 cupones, que son los que nun se consumieron nos meses de mayu y xunu.

    Al respective de la participación, aquellos usuarios que se fixeron colos bonos en primavera, namás van poder disponer de los que nun trocaren nes sos compres, pa lo que tendrán de volver a solicitalos. Si yá consumieron toos, nun van poder participar nesta segunda fase. D’esta forma, quien gastara dos cupones mientres la primer fase va disponer agora d’otros trés, ente que quien nun trocara nengún va poder emplegar los cinco nuevos bonos.

    La directora xeneral d’Empresa y Comerciu, Arantxa González Montell, confía en que la estensión del programa Bono Comercio Asturies tenga’l mesmu ésitu que la primer convocatoria y contribuya, una vegada más, a impulsar les ventes nos pequeños establecimientos.

    La iniciativa, promovida pola Conseyería de Ciencia, Industria y Empléu, sofita les ventes del comerciu minorista en periodos de baxa demanda y contribúi a estimular la economía. Na so primer fase, trocáronse 171.481 bonos por importe de 1,71 millones, que se traduxeron nun volume de ventes de 6,81 millones nesti tipu d’establecimientos.

     

  • El Desarme d’Uviéu recibe la declaración de Fiesta d’Interés Turísticu Nacional

    El Desarme d’Uviéu recibe la declaración de Fiesta d’Interés Turísticu Nacional

    La fiesta del Desarme d’Uviéu, una de les fiestes gastronómiques más antigües d’España, recibió la declaración de Fiesta d’Interés Turísticu Nacional qu’otorga la Secretaría d’Estáu de Turismu, una vegada que la solicitú presentada pol Conceyu d’Uviéu recibió l’informe favorable del Gobiernu del Principáu d’Asturies y cumple con tolos requisitos establecíos na orde ministerial que regula estes distinciones.

    El Desarme d’Uviéu tien los sos oríxenes nel sieglu XIX, como conmemoración de la defensa de la ciudá per parte de la milicia local frente al asediu de los carlistes en 1836, y básase nunos platos que fueron evolucionando a lo llargo del tiempu hasta llegar al actual menú que preside cada añu les meses de los restoranes d’Uviéu’l 19 d’ochobre: garbanzos con bacaláu y espinaques, callos al estilu d’Uviéu y arroz con lleche.

    La secretaria d’Estáu de Turismu, Rosario Sánchez, felicitó por esta reconocencia a la ciudá d’Uviéu y, de manera especial, “a la Confrería Gastronómica del Desarme, que s’encarga d’entamar, promocionar y espublizar, más allá de la ciudá, tanto la comida como tola programación complementaria, lo que supón un estraordinariu curiosu turísticu”.

    Al rodiu de les xornaes gastronómiques celébrense distintos actos culturales, desfiles, pasacalles y recreaciones históriques del eventu nes que participen confreríes gastronómiques de tol país y diversos países europeos.

    La fiesta gastronómica del Desarme viose reforzada pola reconocencia d’Uviéu como destín gastronómicu. Asina mesmo, la dómina del añu na que se celebra fai posible importantes sinergias con otres actividaes como los Premios Princesa d’Asturies, que se convoquen y apurren añalmente na ciudá d’Uviéu sobro eses feches.

    Nesti 2025 la celebración va tener llugar el vienres 24 d’ochobre nel Teatru Campoamor, con munchos de los premiaos, convidaos, prensa y visitantes participando nos distintos eventos que tienen llugar en redol a los premios Princesa d’Asturies y al Desarme.

  • El Muséu del Oriente d’Asturies supera los 6.000 visitantes y remata un branu de récord

    El Muséu del Oriente d’Asturies supera los 6.000 visitantes y remata un branu de récord

    El Muséu del Oriente d’Asturies recibió un total de 6.117 visitantes ente los meses de xunu, xunetu y agostu, lo que representa un crecimientu del 23% sobre’l mesmu períodu del añu pasáu. No que va d’añu, suma yá 9.396 visites; el 8,1% más qu’en 2024. Atendiendo a estes cifres, la previsión ye que’l zarru d’añu suponga un nuevu récord, superándose les 11.077 persones atendíes l’añu pasáu.

    Esti branu, les visites procedentes d’España siguen siendo mayoría, algamando’l 88% del total. Por procedencies, Madrid asitióse como’l primeru de los oríxenes (25,5%), siguíu d’Asturies (21,9%) Castiella y Llión (17,3%), Euskadi (6,6%) y Comunitat Valenciana (4,5%). Nel ámbitu internacional, que supunxo’l 12% de les visites, destacaron Francia (24,4%), Reinu Xuníu (13,7%), Alemaña (11,8%), México (9%) y Países Baxos (7,8%).

    Esposiciones y actividaes destacaes

    La programación especial del Muséu del Oriente d’Asturies supunxo un importante impulsu p’algamar estes cifres de visitantes. Dende la inauguración de la esposición «Aprendiendo. 100 años d’Escuela nel Oriente d’Asturies», que sigue como una de les ufiertes más destacaes d’esti 2025, pasando pola representación al campu de la obra teatral «La Dama del Alba», de la mano de Cristina López del Fierro, pa celebrar los 25 años del muséu, les instalaciones del muséu fueron una de les referencies culturales del Oriente d’Asturies nel branu.

    Dientro de les propuestes del muséu pa los próximos meses, torna a les sos instalaciones la esposición «Planeta herido. La mirada crítica de Sir Cámara», que va volver tar abierta al públicu a partir del día 30 de setiembre.

  • El serviciu de llanzaderes a toles reserves de la biosfera estiéndese hasta’l 13 d’ochobre

    El serviciu de llanzaderes a toles reserves de la biosfera estiéndese hasta’l 13 d’ochobre

    El Gobiernu del Principáu d’Asturies decidió prorrogar el serviciu de llanzaderes braniegues que conecta les reserves de la biosfera mientres toles fines de selmana y festivos hasta’l próximu 13 d’ochobre. Amás, a partir d’esti sábadu, estos servicios van ser gratuitos hasta completar les places disponibles. Esta midida busca incentivar l’accesu a estos espacios naturales protexíos y, coles mesmes, sofitar la economía local y el turismu en territorios especialmente afectaos polos recién quemes, como Somiedu, Fuentes del Narcea o Ponga.

    El Consorciu de Tresportes d’Asturies (CTA) va caltener operatives les 16 rutes que tuvieron en funcionamientu mientres el branu. Estes rutes percuerren les reserves de la biosfera d’Ozcos, Eo y Terras de Burón; Fuentes del Narcea, Degaña y Ibias; Somiedu; Ubiñes-La Mesa; Redes; Ponga; y Picos d’Europa, nel tramu que xune Arenas de Cabrales con Poncebos y Sotres. Primeramente, el dispositivu taba previstu hasta’l 8 de setiembre, coincidiendo cola celebración del Día d’Asturies, pero la bona acoyida per parte del públicu y el compromisu del Executivu col desenvolvimientu sostenible motivaron la so ampliación.

    El calendariu de funcionamientu gratuitu inclúi los díes 6, 7, 8, 13, 14, 20, 21, 27 y 28 de setiembre, mesmo qu’el 4, 5, 11, 12 y 13 d’ochobre. Nel casu concretu de la ruta ente Arenas de Cabrales, Poncebos y Sotres, que facilita l’accesu a la Ruta del Cares, va caltenese la operativa diaria hasta’l 13 d’ochobre, tal que taba previstu nel plan inicial d’accesos, y tamién va ser gratuita dende esti sábadu.

    Esti branu, el dispositivu de llanzaderes de CTA dobló la so ufierta al respective d’años anteriores, algamando un total de 31 rutes en 28 conceyos asturianos. Esta iniciativa forma parte de la estratexa del Gobiernu d’Asturies pa fomentar un modelu de movilidá sostenible y un turismu respetuosu cola redolada. Solo nel mes de xunetu, más de 80.000 persones utilizaron dalguna d’estes llanzaderes, integraes amás nes ventayes de la tarxeta CONECTA.

  • Empieza la exhumación de les víctimes del franquismu na fosa de Carcéu, en Valdés

    Empieza la exhumación de les víctimes del franquismu na fosa de Carcéu, en Valdés

    Empezaron los llabores de exhumación de les víctimes del franquismu na fosa de Carcéu, en Valdés. Los trabayos pa recuperar los cuerpos d’unes seis persones asesinaes n’ochobre de 1936 empezaron esta mesma selmana.

    Nesta fosa espérase atopar los restos d’estes víctimes nun procesu nel que, con independencia de los afayos, demuestra’l compromisu del Gobiernu asturianu coles families de los asesinaos y sumíos. “Siempres ye un ésitu que s’escuche a les families y que pongamos los recursos públicos pa cerrar una ferida. Ye un compromisu de la nuesa xestión”, aseguró Beatriz González, que tuvo acompañada de la directora xeneral de Memoria Democrática, Begoña Collada.

    En Valdés tamién se ta estudiando la fosa De Santiago de Molenes, en Grau, gracies al alcuerdu que caltien la Conseyería d’Ordenación de Territoriu, Urbanismu, Vivienda y Derechos Ciudadanos cola Universidá d’Uviéu, al traviés del Vicerrectorado d’Estensión Universitaria y el grupu Arqueos.

    Los trabayos d’exhumación centrar na busca de seis persones, trés de Ovés: Francisco González Prau (17 años), Bernabé Fernández Alonso, y Francisco García Rodríguez, y otres trés de Brañalonga: Darío Peláez Cuervo (21 años), Fernando González Peláez (21 años) y Julio González Peláez (19 años).

  • 37.000€ por un quesu Cabrales, el más caru del mundu

    37.000€ por un quesu Cabrales, el más caru del mundu

    Recór nuevu nel 53 Certame Quesu Cabrales de 2025 cola ufierta final de la puya pol meyor quesu Cabrales, con 37.000. Con esta, yá son cinco les vegaes que la celebración quesera bate’l récor Guinnes, superando en 1000€ a cantidá que pagó el mesmu Iván Suárez, d’El Llagar de Colloto, va un añu. Tamién repitió la quesería ganadora, que foi la Quesería Ángel Díaz Herrero.

    Na última edición, el Llagar de Colloto volvió ser protagonista al desembolsar nada menos que 36.000 euros pol quesu ganador, ellaboráu pola quesería Ángel Díaz Herrero. Nun ye un fechu aislláu: l’establecimientu yá inscribiera’l so nome nel Llibru Guinness en delles ocasiones, faciéndose con pieces en puya qu’algamaron cifres de 14.300 euros en 2018, 20.500 en 2019 y 30.000 en 2023.

    Baxo la dirección d’Iván Suárez, el local atropa amás una racha destacada: nos cinco últimes ediciones celebraes llevó siempres el quesu meyor puntuáu pol xuráu, que prueba unu a unu los exemplares antes de proclamar al vencedor. En 2022, tres el paréntesis obligáu pol andanciu de la covid, yá invirtieren 17.000 euros na pieza ganadora. Con esti nuevu trunfu, sumen seis reconocencies consecutives. Como vien asocediendo nos últimos años, un 15% del importe pagu va destinase nuevamente a l’Asociación Galbán, xestu solidariu que se repite per cuarta ocasión consecutiva.

    Na puya pol meyor Quesu Cabrales participaron La Montera Picona de Ramón (Xixón), Sidrería Román (Xixón), Carlos Tartiere (Madrid), el Camping Las Gaviotas (Castrillón), Lo de Viole (Madrid), El Dólar (Uviéu), Sidrería La Cuenca (Madrid) y El Carbayín (Madrid).

     

  • Barbón va convocar a los gobiernos de Galicia, Cantabria y Castiella y Llión pa coordinar una respuesta “rápida y eficaz” a les quemes forestales

    Barbón va convocar a los gobiernos de Galicia, Cantabria y Castiella y Llión pa coordinar una respuesta “rápida y eficaz” a les quemes forestales

    El gobiernu d’Asturies va convocar a los Executivos de les comunidaes vecines –Galicia, Cantabria y Castiella y Llión- coles mires de reforzar la coordinación énte les quemes forestales. El gobiernu tamién va conceder 800.000 euros n’ayudes directes a los ganaderos pa compensa-yos pola perda de forraxe causaes polos fueos.

    Adrián Barbón evaluó la evolución de les quemes. Anque “entá nun pasemos páxina” y los llabores de control y estinción siguen, la situación ameyoró notablemente al respective de les xornaes anteriores. L’atención a los fueos protagonizó la xunta selmanal del Conseyu de Gobiernu, que yá anunció nueves midíes empobinaes tanto a la prevención como al sofitu a los sectores más afectaos.

    Les conclusiones del Conseyu de Gobiernu fueron presentaes pol mesmu presidente asturianu, acompañáu de los conseyeros de Xestión d’Emerxencies, Alejandro Calvo, y del titular de Mediu Rural, Marcelino Marcos. Dalgunos de los sos principales mensaxes fueron los siguientes:

    • Salvar pueblos, salvar vides. Fueron y siguen siendo los oxetivos prioritarios del Gobiernu d’Asturies percima de cualesquier otra considerancia, enfatizó Barbón. Tanto’l presidente como los dos conseyeros abondaron nel agradecimientu a les persones implicaes nes xeres d’estinción, que demostraron “un esfuerzu que superó la obligación llaboral”, según resaltó’l titular de Xestión d’Emerxencies. Barbón emponderó’l bon funcionamientu del sistema d’emerxencies.
    • 5.500 hectárees quemaes. Esti ye’l balance provisional de la superficie esfarrapada pol fueu, a la espera de que puedan apagase tolos focos y realizase’l cálculu definitivu.
    • Reconocencia como zona catastrófica. Toles árees castigaes pola folada de quemes d’agostu van poder xuntase a la declaración de zona catastrófica (la denominación alministrativa ye zona especialmente afectada por una emerxencia de protección civil) que va aprobar mañana’l Conseyu de Ministros. La tramitación va ser más cenciella y rápida que n’ocasiones anteriores, porque la iniciativa parte de l’Alministración estatal, según esplicó Alejandro Calvo. Esa reconocencia va dexar recibir compensaciones.
    • Más recursos por que los conceyos ameyoren la prevención. Asturies, destacó’l presidente, supo sacar llecciones de les quemes de 2023. Cuenta con más medios y más personal para combatir los fueos y supo poner l’acentu na prevención cola creación d’un fondu específicu para los conceyos. Con cargu al mesmu, ta previstu la repartida de 18 millones ente 74 conceyos hasta 2026. Barbón anunció qu’esta cantidá va amontar colos presupuestos de 2026. Al tiempu, sorrayó la importancia de les midíes que facilita esti preséu, “como los nueve cortafueos executaos en Degaña”.
    • Coordinación coles comunidaes vecines pa encarar una situación distinta. El despoblamientu –col consecuente abandonu de los montes- y el calentamientu favorecen y agraven les quemes. El presidente sorrayó les dimensiones alcanzaes polos fueos, que pasaron d’una a otra comunidá, como asocedió nos Picos d’Europa y el suroccidente. Pa encarar esta situación distinta, el gobiernu va convidar a los gobiernos de les comunidaes vecines a reforzar la coordinación.
    • Un congresu p’aprender de la esperiencia internacional. Otros países yá tienen esperiencia nel abordaxe d’estes quemes, que los espertos denominen de sesta xeneración. Pa sacar llecciones, el Gobiernu d’Asturies va convocar una cume internacional, “un espaciu de reflexón” que dexe ameyorar la llucha contra’l fueu, informó’l presidente.
    • Sofitu a la ganadería: ayudes directes y PAC. Los fueos afectaron a los pacionales de la ganadería. Marcelino Marcos, qu’estimó “la solidaridá de los ganaderos”, anunció la distribución de 800.000 euros n’ayudes directes polos daños nel forraxe sufríos en nueve conceyos: Cabrales, Cangas, Casu, Degaña, Onís, Ponga, Quirós, Somiedu, Villayón. Estos fondos van conceder en función del númberu d’unidaes de ganáu mayor (UGM) y conforme a una gradación según el tipu d’animales. Coles mesmes, Marcos unvió un mensaxe de tranquilidá al sector: les quemes nun van afectar al cobru de les ayudes de la PAC.
    • A disposición de los conceyos. Barbón fixo fincapié na importancia de la coordinación ente Alministraciones. A esti respectu, ufiertó “collaboración máxima a los conceyos” por que puedan preparar los sos planes de prevención nos casos nos que tean obligaos a ello.
  • El gobiernu d’Asturies intensifica les inspecciones y sanciones pa frenar les viviendes turístiques illegales y blindar un modelu sostenible

    El gobiernu d’Asturies intensifica les inspecciones y sanciones pa frenar les viviendes turístiques illegales y blindar un modelu sostenible

    El Gobiernu d’Asturies dobló la vixilancia sobre les viviendes d’usu turísticu (VUT) y les empreses del sector nesta llexislatura coles mires de garantizar la llegalidá, la convivencia y un modelu de turismu sostenible y de calidá.

    Los datos respuenden por esti esfuerzu ensin precedentes:

    • Les inspecciones a empreses pasaron de 1.230 en 2023 a 3.366 en 2024 y algamen, nos primeres siete meses d’anguaño, les 4.025. De caltenese esti enclín a l’alza, l’exerciciu actual zarró con un aumentu que multiplicaría por seis les realizaes va dos años.
      Les inspecciones a VUT pasaron de 248 en 2023 a 1.825 en 2024 y a 2.166 nos siete primeros meses de 2025, lo que supondría un aumentu del 1.500% al respective de va dos años d’enllargase esta evolución hasta final de 2025.
    • Nel ámbitu sancionador, los procedimientos abiertos contra esti tipu d’agospiamientos crecieron de 62 en 2023 a 117 en 2024 (casi un 90% más) y suman 91 hasta agostu de 2025. Nel casu d’empreses turístiques incoáronse 477 espedientes no que va d’añu.
      La vicepresidenta y conseyera de Turismu, Gimena Llamedo, destacó que “Asturies actúa con determinación pa protexer la convivencia y el derechu a la vivienda, enfrentándose con mano firme a estos agospiamientos turísticos illegales. Queremos un modelu que xenere empléu y calidá, y respete la nuesa redolada”.

    Amás, tres el cambéu de la Llei de Turismu aprobada en payares de 2024, retiráronse 118 anuncios irregulares en plataformes como Airbnb y Booking por incumplir la obligación d’incluyir el númberu d’inscripción nel Rexistru d’Empreses y Actividaes Turístiques (REAT).

    El refuerzu de la inspección, con más personal y nueves ferramientes tecnolóxiques, dexó identificar y detener con mayor eficacia les irregularidaes. “Salvaguardemos la nuesa mariña y la nuesa riqueza ambiental, y agora frenamos a los especuladores con normes clares. El nuesu oxetivu ye un turismu sostenible y calidable ensin fisuras”, añedió Llamedo.

    De forma paralela, el gobiernu avanza na fase d’información pública del decretu que va regular les VUT, col fin de disponer d’un marcu normativu equilibráu que garantice la convivencia ciudadana, el derechu a la vivienda y un turismu responsable.

  • 87 años de la última declaración d’independencia d’Asturies

    87 años de la última declaración d’independencia d’Asturies

    Un 24 d’agostu de 1937 Xixón convertíase na capital d’una Asturies independiente. Facía tiempu que los territorios d’Asturies y Llión taben xeográficamente dixebraos del restu de territoriu embaxo control del gobiernu lexítimu republicanu. Les tropes fascistes del xeneral Franco ocupaben tola zona central peninsular faciendo bien difíciles les comunicaciones ente los dos territorios que defendíen la llegalidá democrática asaltada.


    El presidente del Conseyu Rexonal d’Asturies y Llión, presidíu pol sindicalista y diputáu socialista Belarmino Tomás resistía dende Xixón y llevaba tiempu actuando de forma autónoma, con non pocos conflictos col gobiernu central, que taba centráu na defensa del frente mediterráneu dexando nun ciertu abandonu a Asturies y el restu de territorios del norte peninsular.

    En xunu de 1936 cai Bilbao y Asturies queda sola dafechu, col occidente y Uviéu tomaes tamién poles tropes franquistes.

    El decretu aprobáu aquel 24 d’agostu funda’l Conseyu Soberanu d’Asturies y Llión cola «plena responsabilidá del mandu soberanu nel territoriu de la so autoridá», dicía’l solemne decretu. El Gobiernu del presidente Belarmino Tomás, con socialistes, comunistes y anarquistes, asume toles competencies y el control sobre l’actividá civil y militar. El Conseyu emite la so modena propia, que se conoz como «belarminos» y Xixón conviértese na capital dende’l día de la entrada en vigor de la independencia, 25 d’agostu.

    El gobiernu va instalase na Casa Blanca, l’edificiu racionalista asitiáu na Plaza’l Parchín de Xixón. Los conseyos de gobiernu celebrábense nel agora Vieyu Institutu Xovellanos.


    Popularmente conozse entós al Conseyu como «el gobiernín», términu qu’usen con despreciu los miembros del Gobiernu de la España republicana y el presidente de la República Manuel Azaña.

    L’hestoriador hispanista Hugh Thomas denominó a aquel gobiernu la República d’Asturies, anque Belarmino Tomás esplicaba qu’aquella independencia nun buscaba «separatismu» sinón necesidá de xestionar el territoriu en tan complicaes circunstancies, frente a les crítiques de desllealtá y d’insurrección espedíes pola República española. Belarmino Tomás yera pa dalgunos sospechosu, pues participara como unu de los cabezaleros na Revolución d’Asturies de 1934, onde tamién esistió un esperimientu soberanista asemeyáu sobre los territorio dominaos polos revolucionarios.

    Daquella Belarmino Tomás fuera condergáu a pena de muerte, conmutada por pena de cárcel un añu dempués y a la fin lliberáu dempués de la victoria del Frente Popular nel 36.

    La independencia fecha por non independentistes duró hasta’l 20 d’ochobre, cuando los miembros del Gobiernu d’Asturies celebraron el conseyu de gobiernu caberu, saliendo en barcu dende’l puertu d’El Musel un día dempués, entamando una dura represión contra los que nun fueren quien a fuxir de Xixón.

    Nun informe posterior, Belarmino Tomás echaba en cara al gobiernu d’España les acusaciones que contra ellos fixeren:  “Sospechar que naquellos momentos, marxistes, llibertarios y republicanos, declaraben una soberanía con fines separatistes más que de ser fatos ye tener  maldá”.

    57 díes duró la esperiencia independentista « por necesidá», que reproducía de dalguna manera a la proclamación de soberanía de la Xunta Xeneral d’Asturies frente a la invasión francesa del 25 de mayu de 1808.

    El despachu de Belarmino Tomás foi incantáu y dende va unos años volvió a ponese en valor tanto la so figura como los muebles del so despachu. El presidente Adrián Barbón dedicó-y una estancia nel Palaciu de los Presidentes, llar de la presidencia del Gobiernu d’Asturies n’Uviéu, onde agora firma dellos de los decretos de más importancia o celebra actos como l’homenaxe a los fundadores de Conceyu Bable, como xestu simbólicu de reconocencia a la tradición presidencial asturiana.

     

  • Camareru escanciador y sumiller de la sidra asturiana, les dos especialidaes nueves del SEPE

    Camareru escanciador y sumiller de la sidra asturiana, les dos especialidaes nueves del SEPE

    El Serviciu Públicu d’Empléu del Principáu (Sepepa) amplió la so ufierta formativa nel ámbitu de la hostelería y el turismu cola incorporación de dos nueves especialidaes venceyaes a la cultura sidrera asturiana: camareru escanciador y sumiller de sidra asturiana.

    Estes titulaciones, yá aprobaes ya incluyíes nel Catálogu d’Especialidaes del Serviciu Públicu d’Empléu Estatal (SEPE), respuenden a una demanda histórica del sector hosteleru asturianu. El so oxetivu ye facilitar a les empreses la contratación de profesionales cualificaos, capaces d’asesorar a la vecería na elección de la sidra más afayadiza pa cada menú y de sirvila en condiciones óptimes.

    El conseyeru de Ciencia, Industria y Empléu, Borja Sánchez, participó na presentación d’estes nueves especialidaes xunto cola directora xerente del Sepepa, Begoña López, y destacó’l so calter pioneru nel contestu español y européu: “Nun esiste nenguna acreditación similar n’España nin n’Europa. Esta iniciativa apurre un gran valor a la sidra asturiano y a les conocencies necesaries pa escoyela y sirvila correctamente”.

    Al so xuiciu, esti tipu de formación non solo ameyora la cualificación del personal, sinón que tamién respuende a una necesidá urxente del sector. “Les sidreríes treslládennos que cada vez ye más difícil atopar escanciadores cualificaos. Estes especialidaes busquen profesionalizar una ocupación mui valorada n’Asturies y que contribúi a la imaxe que proyectamos énte los turistes”, añedió.

    Darréu, detállense les principales característiques de los dos nueves especialidaes formatives:

    Camareru escanciador

    La formación va tener una duración de 240 hores y va tar abierta a cualquier persona comenenciuda, ensin requisitos previos, lo que va dexar que cualquier persona interesada pueda optar a esta especialización. L’alumnáu va aprender la técnica tradicional d’escanciáu dende botella siguiendo los cánones profesionales, de la que va adquirir conocencies sobre’l productu y el so procesu d’ellaboración.

    Estes conocencies dexarán-y esplicar l’orixe y les característiques de la sidra asturiana, asina como responder con solvencia a les entrugues de la vecería.

    Los conteníos se estructurarán en cuatro módulos sobre’l suministru y la reposición de la bébora, la so rotación y el so tratamientu pa garantizar un serviciu correctu nos establecimientos hosteleros.

    Sumiller de sidra asturiana

    La formación va constar de 435 hores distribuyíes n’ocho módulos. P’aportar a esta especialidá va ser necesariu cuntar col títulu d’ESO, FP básica o un certificáu de profesionalidá de nivel 1 o 2. Los conteníos van dexar al alumnáu planiar, entamar, dirixir y coordinar el serviciu de sidra n’establecimientos hosteleros, mesmo qu’apoderar técniques de cata y maridaje, conocer los distintos tipos d’esta bébora y asesorar a la vecería na so elección.

    Los conteníos distribúyense n’ocho módulos diseñaos pa capacitar al alumnáu na planificación, organización, dirección, supervisión y coordinación de toles actividaes rellacionaes col serviciu de sidra na hostelería.

    La collaboración del grupu Crivencar-Tierra Ástur col Sepepa foi clave nel diseñu de los módulos formativos, pa los qu’apurrieron la so esperiencia na definición de los conteníos que se van impartir.