Xixón al día

Categoría: Educación

  • Últimos díes pa matriculase nos cursos de B1 y B2 d’asturianu de l’Academia

    Últimos díes pa matriculase nos cursos de B1 y B2 d’asturianu de l’Academia

    Últimos trés díes pa poder inscribise nos cursos de B1 y B2 d’asturianu qu’ufierta l’Academia de la Llingua Asturiana. El plazu acaba esti vienres, 30 de xineru. Les clases presenciales van ser los martes y xueves n’horariu de 17 a 19 h, dende’l 10 de febreru hasta’l 28 de mayu, nel llar social de l’Academia (C/Águila, 10 – Uviéu). El preciu, de 150 €, inclúi materiales y una prueba final de nivel. La matrícula abre güei hasta’l 30 de xineru.

    Noyos ye un métodu d’alfabetización n’asturianu que garra’l Marco Común Européu de Referencia pa les Llingües como base pa graduar los diferentes niveles. Dende un puntu de vista comunicativu, al traviés del trabayu de les comunicaciones y de les espresiones orales y escrites, esti proyeutu quier abarcar los niveles elementales (A1 y A2), medios (B1 y B2) y superiores (C1 y C2). L’únicu requisitu d’entrada ye acreditar un nivel elemental d’asturianu (certificáu de superación de la Prueba de conocencia, cursu elemental de l’ALLA o certificáu de superación el A2 del MCER).

  • El Gobiernu d’Asturies abre la primer escuelina autonómica de Xixón con una matrícula de 31 neños y neñes

    El Gobiernu d’Asturies abre la primer escuelina autonómica de Xixón con una matrícula de 31 neños y neñes

    El Gobiernu d’Asturies abrió güei la escuelina Los Nuberinos, asitiada nel Colexu Asturias del distritu Xixón-Sur, que se convierte na cuadraxésimu quinta de la nueva rede pública, autonómica y gratuita y la primera que’l gobiernu asturianu constrúi nesti conceyu.

    La escuelina -que consta de trés unidaes- empieza la so andadura con 31 neños y neñes, que se van dir incorporando progresivamente, a partir de les nueve de la mañana, dientro del periodu d’adaptación. El personal ta compuestu por una directora y seis técniques d’educación infantil (TEI), dos per cada unidá.

    Los Nuberinos pertenez a la fase I de la rede autonómica de Les Escuelines/As Escolías. La obra encargóla’l gobiernu d’Asturies a la empresa Citanias y tuvo un costu de 372.529 euros, con financiamientu de los fondos europeos del Mecanismu de Recuperación y Resiliencia (MRR).

    La escuela ocupa la planta baxa del colexu y tien un accesu independiente. Amás de les trés aules dotaes con un aséu caúna, el centru dispón d’un cuartu bañu afechu y trés sales pa xuntes, la dirección y una polivalente. Nesta postrera va emprestase’l serviciu de comedor. Tamién cunta con un patiu de xuegos y una zona esterior urbanizada. En total, suma casi 400 metros cuadraos de superficie construyida.

    Per otru llau, el Gobiernu d’Asturies tien programaes otres trés escuelines en Xixón dientro de la fase II de la rede. La de Montevil, de cuatro unidaes, ta en fase d’execución. Y tán a puntu de recibir los proyectos de les previstes nos colexos Rei Pelayo y Santa Olaya, de dos unidaes caúna. Amás, el Conceyu de Xixón ta construyendo otru centru nel barriu d’El Llanu, que va asumir el gobiernu en cuanto tea concluyíu.

    Con esta nueva apertura, la rede autonómica de 0 a 3 años ta formada por 45 escuelines/escolías, 23 de la fase I y 22 municipales yá integraes. Esti mes ta prevista la inauguración de Los Ablaninos, n’Ayande.

    En febreru, van empezar la so andadura la escolía El Cabás, de Tapia, y les escuelines Les Xanines, de Caravia, y El Reblincu, de Quirós. Toes elles formen parte de la fase I de la rede, sacante la d’Ayande, incluyida yá na segunda.

  • La matriculación n’asturianu y eonaviego xube esti cursu un 34,2%

    La matriculación n’asturianu y eonaviego xube esti cursu un 34,2%

    La Conseyería d’Educación aumentó un 34,2% la matriculación n’asturianu y eonaviego nesti cursu escolar, con un total de 30.782 estudiantes. Esi crecimientu, que se rexistra per cuartu añu consecutivu, vien motiváu fundamentalmente pola introducción de la llingua autóctona nel segundu ciclu d’Infantil como elección voluntaria.

    Esi novedosu acercamientu a la llingua asturiana, al traviés de dalgunos de los conteníos incluyíos na área de aprendizaje Comunicación y representación de la realidá, enllantóse de forma simultánea nos trés niveles del segundu ciclu d’Infantil. Esti primer añu matriculáronse 7.652 neños y neñes: 6.220 en centros públicos y 1.432, n’alcordaos. La cifra supera’l 48% del total del alumnáu d’esta etapa educativa, un datu mui satisfactoriu pa esti cursu inaugural.

    Si se descontara l’alumnáu d’Infantil, el balance resulta tamién positivu. Los estudiantes de Llingua Asturiana y Lliteratura en Primaria, Secundaria y Bachilleratu esperimenten una llixera medría del 0,83% respectu al cursu anterior.

    La principal crecedera de matrícula n’asturianu y eonaviego producióse ente l’alumnáu de Secundaria de la rede alcordada, con un 36,5% más que’l cursu 2024-2025, siguíu de Bachilleratu en centros públicos (8,7%) y Primaria na enseñanza alcordada (4,2%). Sicasí, en Primaria y Secundaria de la rede pública producióse un llixeru descensu del 1% y el 0,2%, respectivamente.

    Otra iniciativa pionera n’Asturies foi l’entamu esti cursu de la ufierta d’asturianu nes Escueles Oficiales d’Idiomes. El primer pasu diose n’Uviéu, onde se contabilicen 43 persones matriculaes nos trés niveles disponibles: 33 nel A1, estremaos en dos grupos; 3 nel B1 y 7 nel C1. La matrícula caltiense abierta.

  • Universidá d’Uviéu y Ayuntamientu de Llangréu refunden la Casa de La Buelga como exa dinamizadora del Nalón

    Universidá d’Uviéu y Ayuntamientu de Llangréu refunden la Casa de La Buelga como exa dinamizadora del Nalón

    La Universidá d’Uviéu y l’Ayuntamientu de Llangréu van estrechar la so collaboración coles mires de refundar La Casa de la Buelga pa convertila nuna exa fundamental de dinamización del Valle del Nalón. La refundación de La Casa de la Buelga enmárcase dientro de la estratexa UOTerritorio, una iniciativa de la Universidá d’Uviéu que tien por oxetu vertebrar espacios, estructures y programes naquellos conceyos onde la institución académica asturiana nun tien campus universitariu, como en Llangréu.

    La collaboración ente dambes instituciones pal palaciu barrocu de Ciañu busca los siguientes oxetivos:

    • Establecer nel Valle del Nalón un espaciu universitariu que contribuya a activar la vida cultural, a responder a los retos d’Asturies y a ufiertar soluciones a los sos problemes.
    • Materializar el compromisu de la Universidá d’Uviéu con Asturies, la so cultura y el so patrimoniu cultural, per aciu la instalación de les cátedres de la Sidra d’Asturies y de la Cultura Minera.
    • Establecer en La Casa de la Buelga la sede del programa Universitariu de Mayores de la Universidá d’Uviéu (PUMUO), que va ufiertar un mínimu d’ocho asignatures y d’ocho talleres. Dada la orientación de la entidá, dos de les asignatures y dos de los talleres van tar centraos na cultura sidrera y na minera.
    • Convertir La Casa de la Buelga nel centru d’una actividá qu’estableza sinerxes coles instituciones y la comunidá civil: cursos d’estensión, de branu, aules d’estensión, talleres, ciclos de conferencies…
    • Establecer un espaciu d’alcuentru y cooperación colos axentes del territoriu: conceyos, fundaciones, asociaciones, empreses y ciudadanía.
    • Recuperar la biblioteca y espaciu d’estudiu, tanto al serviciu del estudiantáu universitariu, como de la sociedá del Valle del Nalón y como centru especializáu n’estudios sobre la cultura asturiana, especialmente la rellacionada cola cultura de la sidra y la cultura minera.

    Ignacio Villaverde recordó que la Estensión Universitaria ye una actividá fundamental pa la Universidá d’Uviéu que foi pionera nel so desenvolvimientu n’España. “El nuesu oxetivu ye promover y articular l’espardimientu de la conocencia, la cultura, l’arte y la ciencia na comunidá universitaria y na sociedá, con especial atención a les necesidaes de la so redolada”, destacó.

    La Estensión Universitaria cumple asina una doble función. D’un llau, la interna, espublizando conocencies na comunidá universitaria y promoviendo la interdisciplinariedá, l’alderique académicu y la fluidez na tresmisión de les innovaciones científiques, técniques o culturales. Y, d’otru llau, la función esterna, qu’afigura la concepción de la universidá como una institución dinamizadora del territoriu, arguyosa de la so cultura y el so patrimoniu cultural y comprometíu con Asturies.

    El rector sorrayó que, p’articular esi compromisu con Asturies, la Universidá d’Uviéu diseñó’l proyectu UOterritorio, qu’integra centros estables nos que se cunta con una actividá enriquecedora en materia d’estensión universitaria y proyección cultural, como ye’l casu del CSU (Centru de Servicios Universitarios d’Avilés) d’Avilés, al que se va sumar agora La Casa de la Buelga.

    Pela so parte, Roberto García señaló que “pa nós ye un momentu d’allegría ya ilusión. Tamos asistiendo al reverdecer de La Casa de la Buelga, que recupera l’actividá de la estensión universitario y sumo, per primer vegada, dos cátedres que son auténticos emblemes d’Asturies: la de la sidra y la de la minería. Ye un pasu que, ensin dulda, honra la nuesa identidá”.

    García añedió que’l Programa Universitariu pa Mayores de la Universidá d’Uviéu supón “una reconocencia al compromisu cultural del nuesu conceyu, que nel so día foi conocíu como’l kilómetru más cultu d’Europa. Axallá este seya solo’l primer pasu pa responder a les necesidaes formatives de los nuesos vecinos y pa que Ciañu vuelva ser un foru cultural vivu, abiertu, dinámicu y capaz d’impulsar la conocencia y la participación”.

  • Les dos sedes de la escuelina Carbayoninos, n’Uviéu van abrir n’ochobre

    Les dos sedes de la escuelina Carbayoninos, n’Uviéu van abrir n’ochobre

    La escuelina autonómica Carbayoninos, d’Uviéu, va empecipiar la so actividá n’ochobre, de forma simultánea, nes sos dos sedes de Les Campes y el Colexu Públicu San Llázaro-Escueles Blanques. Les obres de la primera yá tán concluyíes, mientres que la segunda sede se recepcionará esta selmana. La escuela yá tien nomada a una directora.

    L’apertura de la escuelina Carbayoninos va coincidir, por tanto, cola inauguración de les dos escuelines de Siero –Los Polesinos, de La Pola Siero, y Mundu Feliz, de Llugones– y, probablemente, con Los Cuscurrusquinos, de Sariegu.

    La conseyera ufiertó estos datos mientres la so visita al CP San Llázaro, la primera que realiza específicamente a un centru educativu dende la so toma de posesión. Tamién participaron la directora xeneral de Centros y Rede 0-3 Años, Paula Fernández, y l’inspectora de referencia del centru, Natalia Suárez.

    Ledo tuvo acompañada pola nuevu directora del colexu, Susana Suárez, l’equipu directivu y el presidente del AMPA, Gonzalo Riestra. Mientres el percorríu, visitaron la esposición Muyeres na hestoria, esplicada por un grupu d’alumnos y alumnes. Tamién guardaron una clase d’Educación Física y esfrutaron del estrenu d’un cantar interpretáu pol profesor y l’alumnáu de 6º de Primaria. A lo último, la conseyera caltuvo un alcuentru col claustru.

  • La Universidá d’Uviéu da empiezu al cursu académicu cola bienllegada al estudiantáu nuevu

    La Universidá d’Uviéu da empiezu al cursu académicu cola bienllegada al estudiantáu nuevu

    La Universidá d’Uviéu arrinca’l cursu académicu 2025-2026 el próximu martes, 9 de setiembre. Para dar la bienvenida al estudiantáu de nuevu ingresu, les facultaes y centros celebren ente los díes 2 y 11 les Xornaes d’Acoyida, que tienen por oxetivu amosar les instalaciones y servicios de la institución académica. Al traviés d’un calendariu de sesiones informatives y visites, l’alumnáu va tener el so primera toma de contactu cola vida universitaria antes d’empezar el periodu lectivu.

    Con esta iniciativa, l’estudiantáu va poder afayar el centru nel que va desenvolver el so grau, recibir información básica sobre la so titulación o los servicios que la Universidá d’Uviéu pon a la so disposición, mesmo que conocer los sos derechos y deberes, les víes d’orientación de les que disponen o les posibilidaes de participación. “Les Xornaes d’Acoyida son una propuesta aparente por que quien empiecen los sos estudios de grau afayen el so centru y a quien van ser los sos compañeros y compañeres mientres los próximos años”, aseguró’l vicerrector d’Estudiantes y Empleabilidá, Alfonso López Muñiz, animando a participar a tol estudiantáu de nuevu ingresu. El centru encargáu d’abrir la programación esti añu va ser la Facultá de Química, que tien prevista una sesión informativa pa mañana martes, 2 de setiembre, ente les 9:30 y les 13:30 hores na Aula 02. Les Xornaes d’Acoyida van rematar el próximu día 11 de setiembre en Ciencies, con una sesión de bienvenida prevista pa les 13:00 hores.

  • Namás 2850 places d’aspirantes a interinidá nel próximu cursu escolar

    Namás 2850 places d’aspirantes a interinidá nel próximu cursu escolar

    Conseyería d’Educación publicó güei nel portal www.educastur.es la primer convocatoria de places p’aspirantes a interinidá del cursu escolar 2025-2026. La ufierta componse de 2.850 puestos: 1.533 pa Secundaria y otros cuerpos, y 1.317 pa Primaria. Unos datos que nun son del too bonos, yá que les fueron mayores n’años anteriores.

    Nesti primer llistáu incluyéronse les vacantes esistentes n’enseñances artístiques, la totalidá de les comisiones de serviciu aprobaes hasta’l momentu, y les places xeneraes por equipos directivos, lliberaciones sindicales o la sustitución de persones en situación de servicios especiales.

    Tamién formen parte de la ufierta los puestos de personal de los distintos programes d’inclusión educativa: aules abiertes en centros ordinarios, d’inmersión llingüística y hospitalaries; la unidá escolar del hospital de día infanto-xuvenil, y l’equipu mistu-conveniu ONCE. Nel casu de les aules abiertes, les nueves van cuntar con dos maestros especialistes a xornada completa: unu de Pedagoxía Terapéutica (PT) y otru d’Audición y Llinguaxe (AL).

    La convocatoria inclúi, amás, once places de dirección pa escueles de 0 a 3 años, mesmo que de personal pa los Centros de Profesoráu y Recursos (CPR) destinaos a los programes de cooperación territorial, financiaos con fondos europeos: refuerzu de la competencia matemático y llector, el PROA+, bienestar emocional y educación inclusiva.

    Cola publicación d’esta ufierta, les 17.855 persones convocaes van poder presentar les sos solicitúes dende güei y hasta’l próximu vienres, 22 d’agostu, hasta les 23:59 hores. L’oxetivu ye que puedan quedar axudicaes pa principios de la próxima selmana.

    El director xeneral de Personal Docente, César González, esplicó que la convocatoria ye similar a la de 2023, añu en que tamién se celebraron procesos d’oposiciones similares. Per otru llau, la conseyería yá trabaya pa poder incluyir na segunda convocatoria de setiembre los puestos correspondientes a los programes de cooperación territorial destinaos a los centros educativos. La convocatoria ta prevista pal 9 de setiembre, va publicase’l día 11 y la incorporación va ser el 15 d’esi mes.

  • El gobiernu anicia la redacción d’un decretu pa prevenir, detectar y erradicar l’acosu escolar

    El gobiernu anicia la redacción d’un decretu pa prevenir, detectar y erradicar l’acosu escolar

    La Conseyería d’Educación empecipió la ellaboración d’un decretu pa prevenir, detectar y erradicar l’acosu escolar, tal como s’anunció en mayu. La Dirección Xeneral d’Inclusión Educativa y d’Ordenación empecipia a partir de mañana y hasta’l 22 de xunetu’l periodu de consulta pública previa, nel que la ciudadanía va poder realizar aportaciones. La información yá ta disponible nel portal de participación.

    Esti nuevu decretu tien como oxetivu establecer un marcu xurídicu sólidu que garantice la prevención y detección del acosu escolar, asegurando asina’l derechu del alumnáu a una educación de calidá, llibre de violencia, que dexe desenvolver dafechu les sos capacidaes y algamar el so máximu potencial.

    Ente los aspectos clave que va regular la norma tán los siguientes:

    • L’actualización y regulación de los protocolos esistentes, col fin d’ameyorar la detección temprana de casos y fomentar la sensibilización nos centros educativos.
    • La ellaboración d’un plan cuatrienal con midíes concretes pa combatir l’acosu escolar.
    • La promoción de la formación del personal educativo, l’establecimientu de canales eficaces de denuncia y la implementación d’acciones reeducativas empobinaes al alumnáu acosador.
    • La creación d’un sistema de siguimientu de casos, que dexe evaluar la efectividá de les midíes correctores adoptaes.
    • La puesta en marcha d’un Observatoriu del Acosu Escolar.
    • El decretu tamién va reforzar el compromisu de los centros educativos na llucha contra tou tipu de violencia, encamentándolos a utilizar tolos recursos al so algame pa prevenir situaciones d’acoso y fomentar una convivencia positiva.

    Ha destacase que’l gobiernu yá cunta con protocolos d’actuación que fueron actualizaos en trés ocasiones nos últimos cursos. Estes revisiones incorporaron aspectos como’l ciberacosu, les agresiones rellacionaes cola orientación o identidá sexual y les suxerencies de los equipos directivos. Amás, impulsáronse campañes informatives y roblóse un alcuerdu de collaboración col Colexu Oficial de Psicoloxía.

  • El Gobiernu suscribe colos sindicatos el pactu Asturies Educa

    El presidente del’Asturies, Adrián Barbón, encabezó güei la firma del pactu Asturies Educa, la fueya de ruta que va dexar fortalecer la escuela pública nos próximos años y qu’implica 45 millones d’inversión. “Pal mio Executivu, pal gobiernu de progresu d’Asturies, ye un pactu d’obligáu cumplimientu que namás va almitir cambeos pa reforzalu”, aseguró’l xefe del Executivu.

    La conseyera d’Educación, Eva Ledo, suscribió esta mañana’l documentu con Gumersindo Saiz, d’Anpe Asturies, Borja Llorente, de CC.OO. d’Enseñanza; Miguel Laria, de Suatea y Cristóbal Ponte, de UGT Servicios Públicos. La robla va dexar impulsar l’alcuerdu alcanzáu ente’l gobiernu y les organizaciones sindicales que punxo fin a les movilizaciones de la comunidá educativa’l pasáu mes de xunu.

    Ente otros aspectos, el testu recueye los siguientes compromisos:

    – L’aumentu del profesoráu, con 300 nuevos especialistes en pedagoxía terapéutica y audición y llinguaxe.
    – L’aceleración del amenorgamientu del alumnáu por aula, hasta un máximu de 23.
    – La medría de les retribuciones, que nel profesoráu con menos de seis años d’esperiencia va llegar a los 210 euros mensuales.
    – L’axilización de les sustituciones.
    – L’aplicación del Plan Simplifica Educación, pa descargar de xeres burocrátiques al profesoráu.
    – La nueva regulación de les baxes médiques, que va garantizar el cobru del cien per cien del sueldu al personal docente.

    “Un gobiernu qu’escucha, que nun se tapa los oyíos, sabe reaccionar y rectificar. Pa delles persones, reconocer un erru ye una debilidá; pa mi ye un aciertu. Nós reconocémoslo y nos aprestamos a solucionalo. La disposición de les organizaciones sindicales y del gobiernu, representáu pola vicepresidenta, Gimena Llamedo, y el conseyeru de Facienda, Guillermo Peláez, dexó entablar la negociación que fructificó n’Asturies Educa”, valoró Barbón.

    Mientres la so intervención, aseguró que la Conseyería de Facienda trabaya por que los compromisos económicos que trai’l pactu tengan reflexu nes próximes cuentes autonómiques, “El proyectu de presupuestos de 2026 va ser, con mayúscules, el presupuestu de la educación pública”, garantizó.

  • Asturies aprueba la gratuidá del primer cursu na Universidá

    Asturies aprueba la gratuidá del primer cursu na Universidá

    El Gobiernu asturianu alcordó güei dos midíes que doblen el so sofitu a la Universidá pública: aprobó la gratuidá de la matrícula del primer cursu y conxeló les demás tases per sestu añu consecutivu. Con estes midíes, “Asturies asítiase a la vanguardia de les polítiques universitaries d’España”, destacó Borja Sánchez, conseyeru de Ciencia.

    El Conseyu de Gobiernu formalizó unu de los compromisos qu’asumiera’l presidente, Adrián Barbón, pa favorecer l’accesu a los estudios cimeros de toles persones, seya cual seya’l so nivel de renta. La meta ye igualar la educación universitaria al restu de servicios básicos, como la sanidá, los derechos sociales o les demás etapes educatives.

    Darréu, resúmense delles iniciatives:

    • Matrícula gratuita. A partir del próximu cursu (2025-2026), quien apuerte per primer vegada a un grau universitariu nun tendrán d’abonar importe dalgunu polos creítos del primer añu académicu. El Gobiernu d’Asturies fadráse cargu del costu de les matrícules y va compensar a la Universidá pa que nun vea amenorgaos los sos ingresos.

    L’Executivu calcula que la midida va beneficiar a más de 4.000 estudiantes. Sicasí, la gratuidá nun se llimita al primer cursu. Si l’alumnáu cumple los requisitos académicos va poder caltener la matrícula gratuita tola carrera.

    Esta midida pionera tamién favorez l’atracción d’estudiantes, tanto d’otres comunidaes como del estranxeru.

    • Conxelación de tases. El restu de cursos universitarios va beneficiase de la conxelación de precios públicos per sestu añu consecutivu nos estudios de grau, máster y doctoráu. D’esta miente, les families con estudiantes que yá asistan a la Universidá d’Uviéu van pagar una media de 300 euros menos qu’en 2011.

    Caltiénense, amás, otres exenciones yá previstes, como les aplicables a persones con discapacidá, families numberoses, víctimes de violencia de xéneru o terrorismu, ente otres.

    • Beques salariu. El gobiernu va convocar nos próximos meses les primeres beques salariu pal cursu 2025-2026. Tán dirixíes a mozos en situación de vulnerabilidá y con espedientes escelentes, que tienen que trabayar p’ayudar al sustentu familiar. La beca va dexar al estudiante cursar una carrera y apurrir ingresos a la familia.
    • Contratu programa. Toes estes midíes súmense al contratu programa vixente dende 2023 que garantiza la estabilidá financiera de la Universidá d’Uviéu mientres un periodu máximu de diez años. L’alcuerdu, que sirvió de modelu a otres comunidaes, inclúi más de mil millones nos primeres seis años y un modelu de financiamientu por oxetivos.