Xixón al día

Categoría: Educación

  • Educación confirma que la mayoría de los directores que presentaren la so dimisión van siguir nos sos cargos

    Educación confirma que la mayoría de los directores que presentaren la so dimisión van siguir nos sos cargos

    La conseyera d’Educación del Principáu, Eva Ledo, informó güei a les direcciones de los centros educativos que la gran mayoría de los y les directores que presentaron la so dimisión el pasáu 6 de xunu decidieron siguir nos sos puestos. En total, 86 de los 91 firmantes comunicaron la so decisión de siguir, tres el pidimientu espresu de la conseyera nuna carta unviada la selmana pasada. Los cinco restantes cesen por motivos diversos, como’l fin del so mandatu, el relevu del equipu directivu o’l treslláu a otru centru. Ledo agradeció públicamente esta decisión y l’enfotu depositáu na so xestión.

    Eva Ledo aprovechó estes xuntes pa presentase formalmente primero que remate’l cursu escolar. Sorrayó que’l profesoráu va ser una prioridá nel so mandatu y garantizó un acompañamientu constante per parte de la Conseyería. Amás, animó a los equipos directivos a comunicar cualquier incidencia o propuesta de meyora nel día a día, más allá de los compromisos yá recoyíos nel recién alcuerdu colos sindicatos, que contempla una inversión de 45 millones d’euros hasta’l final de la llexislatura.

    Per otru llau, la conseyera confirmó que los comedores escolares xestionaos pol gobiernu van estendese tamién a los meses de setiembre y xunu, tal como yá anunciara al comité de direcciones d’Infantil y Primaria. Anguaño, ta buscándose la meyor forma de coordinar tolos servicios implicaos, y esta selmana unvióse un corréu a los centros afectaos pa que faciliten los sos horarios.

    Na vez d’entrugues, Ledo tomó nota de diverses demandes plantegaes poles direcciones, ente elles: l’atención a la diversidá, la implantación del programa contra l’acosu escolar «Tutoría Ente Iguales» (TEI), y cuestiones alministratives.

  • La Universidá d’Uviéu supera per primer vegada los 200 grupos d’investigación acreditaos

    La Universidá d’Uviéu supera per primer vegada los 200 grupos d’investigación acreditaos

    La Universidá d’Uviéu superó, per primer vegada, los 200 grupos d’investigación acreditaos. La institución académica consolidó asina un enclín a l’alza que vien rexistrándose nos postreros quince años. El númberu de grupos d’investigación reconocíos pasó de los apenes 18 en 2010 a los 203 de 2024. Solo mientres el pasáu añu constituyéronse 19 grupos tres superar los trámites esixíos pola axencia acreditadora.

    Irene Díaz, vicerrectora d’Investigación de la Universidá d’Uviéu, sorraya que’l crecimientu calteníu nel númberu de grupos d’investigación pon de manifiestu la solidez y dinamismu del ecosistema científicu de la institución, consolidada como’l principal motor de la I+D+I n’Asturies. “La creación de casi una ventena de nuevos grupos nel últimu añu non solo reflexa’l compromisu y el talentu del nuesu personal investigador, sinón que tamién ye una evidencia clara de que les polítiques de sofitu a la investigación tán dando los sos frutos”, afirma. Díaz incide en que superar el procesu d’evaluación pa crear un grupu o pa reevaluar un grupu esistente nun ye trivial: trátase d’un procedimientu rigorosu, qu’esixe cumplir con criterios d’excelencia científica, actividá siguida, impactu, collaboración y proyección. “Que tantos grupos superaren esta evaluación tan esixente demuestra que se ta trabayando bien, con visión estratéxica y ambición científica”, añede.

    A manera d’exemplu, dalgunos de los grupos que llograron evaluase positivamente l’añu pasáu afronten temátiques tan variaes como la inxeniería geomática, la tecnoloxía y sostenibilidá na construcción con aceru y formigón, los estudios árabo-románicos, la salú mental, el derechu internacional públicu, la diversidá y caltenimientu animal o la salú y el mediu ambiente.

  • Convócase la primer Escuela de Formadores en Coeducación pa liderar el tresformamientu educativu con perspectiva de xéneru

    El Gobiernu d’Asturies va celebrar en xunetu la primer Escuela de Formadores en Coeducación, una iniciativa pionera que busca formar a profesionales capaces de liderar procesos de sensibilización y tresformamientu educativu dende la perspectiva de xéneru. Concebida como un espaciu de capacitación intensiva, va dexar a les participantes adquirir ferramientes teóriques y práctiques pa instruyir dempués a docentes y axentes educativos nesta materia.

    La formación va impartir del 7 al 11 de xunetu, en modalidá presencial y n’horariu de 9:00 a 15:00 hores, nel Centru de Crisis pa Víctimes d’Agresiones Sexuales d’Uviéu. A lo llargo de trenta hores, les participantes van adquirir conocencies especializaes sobre igualdá, feminismu, lexislación, diagnósticu del sexismu nos centros educativos, oratoria, comunicación y usu de tecnoloxíes especializaes nesti ámbitu.

    L’equipu docente ta compuestu por cuatro reconocíes espertes nesti sector: Emma González, Marian Moreno, Carmen Ruíz Repullo y Laura Viñuela, quien van afontar cuestiones clave pa empoderar a futures formadores y acompañales na so preparación pa falar en públicu, estructurar presentaciones eficaces, utilizar ferramientes dixitales y responder con solvencia énte situaciones de resistencia o negación del feminismu.

    Diríxese a docentes, profesionales del ámbitu educativu y persones interesaes na formación n’igualdá. Hai 40 places disponibles, que se van axudicar por orde d’inscripción. Les persones interesaes pueden inscribise al traviés del siguiente formulariu https://forms.office.com/y/T8rZhMUc5y

  • El 94,57 % del estudiantáu aprueba la PAU na convocatoria de xunu n’Asturies

    El 94,57 % del estudiantáu aprueba la PAU na convocatoria de xunu n’Asturies

    El 94,57 % de los 4.485 estudiantes que realizaron la fase d’accesu de la PAU na convocatoria de xunu d’esti añu n’Asturies consiguieron superar los exames. El porcentaxe ye mui similar al llográu l’añu pasáu, cuando aprobó’l 94,97 % del estudiantáu esamináu. Por xéneros, fueron aptos el 94,17 % de les muyeres y el 95,07 % de los homes. La nota media xeneral de la prueba EBAU d’esti añu foi de 7,355, un datu tamién similar al de xunu del añu pasáu, cuando se algamó’l el 7,418. La nota más alta llograda nesta convocatoria de 2025 foi de 10 y un total de 619 estudiantes consiguieron una calificación igual o superior a 9.

    Por asignatures de la fase d’accesu, en Llingua Castellana y Lliteratura II el porcentaxe de persones aprobaes asítiase nel 84,95 % y la nota media ye de 6,76. En cuanto al inglés, aprueba’l 80,28 % de los esaminaos, con una nota media de 6,89. N’Hestoria d’España’l
    porcentaxe d’aprobaos xube a 81,30 % y una nota media de 6,74 y n’Hestoria de la Filosofía, hai un 81,14% de persones aprobaes y una nota media de 6,61.

    Nes pruebes correspondientes a les materies troncales de modalidá de Bachilleratu, el porcentaxe d’aprobaos en Matemátiques II ye del 79,41 % con una nota media de 6,75;
    na asignatura de Matemátiques Aplicaes a les Ciencies Sociales II ye del 80,22 % con una nota media de 6,28; en Llatín II ye del 67,85 % con una nota media de 6,15; en Dibuxu Artísticu II ye del 92,41 % con una nota media de 7,33; n’Analís Musical II, ye del 100% con una nota media de 6,32; n’Artes Escéniques ye del 88,10% y una nota media de 7,17
    y en Ciencies Xenerales ye del 70,91%, con una nota media 5,61.

    Na fase d’almisión son reseñables los resultaos llograes nes asignatures d’Empresa y Diseñu de Modelos de Negociu, col 89,72% d’aprobaos y una nota media de 7,55; Física, col 65,61 % d’aprobaos y una nota media de 5,47; Química, con un porcentaxe d’aprobaos del 89,56 % y una nota media de 7,37; Xeografía, con un 70,07% aprobaos y una nota media de 5,85 y Bioloxía, con un 62,6 % d’aprobaos y una nota media de 5,44. Coles mesmes, realizaron puramente la fase d’almisión un total de 632 estudiantes, 347
    procedentes de ciclos formativos de grau cimeru y 285 procedentes de bachilleratu.

  • La Conseyería de Cultura asume de forma transitoria les competencies d’Educación y solo a efectos alministrativos

    La Conseyería de Cultura asume de forma transitoria les competencies d’Educación y solo a efectos alministrativos

    Les negociaciones encaminaes a algamar un acuerdu p’ameyorar la enseñanza pública continuarán llideraes pola vicepresidenta del gobiernu asturianu, Gimena Llamedo, y el titular de Facienda, Guillermo Peláez

    El Boletín Oficial del Principáu (Bopa) publicó güei un decretu del presidente, Adrián Barbón, pol que se delegan de forma transitoria les competencies del departamentu d’Educación na conseyera de Cultura, Política Llingüística y Deporte, Vanessa Gutiérrez. Esta decisión respuende puramente a razones alministratives, ye temporal y nun afecta al desenvolvimientu de les negociaciones colos sindicatos educativos, que van siguir lideraes pola vicepresidenta del Principáu, Gimena Llamedo, y el titular de Facienda, Guillermo Peláez.

    La dimisión de Lydia Espina como conseyera d’Educación trai efectos alministrativos. Otru integrante del Conseyu de Gobiernu tien qu’asumir responsabilidaes inherentes al funcionamientu cotidianu d’una Alministración, por casu, l’autorización y firma de determinaes decisiones que nun pueden retardase. L’encargu d’eses funciones permite caltener el trabayu cotidianu del departamentu y evitar retrasos.

    Por decisión del presidente, eses xeres recayeron na conseyera de Cultura, Política Llingüística y Deporte. L’exerciciu d’esos llabores va ser transitoriu, en tantu’l xefe del Executivu nun determine quién sustitúi a Escayu al mandu d’Educación. Adrián Barbón anunció ayeri qu’esta decisión va producise n’unos díes, ya que nestos momentos la máxima prioridá del Gobiernu d’Asturies ye la negociación abierta colos sindicatos docentes.

    El diálogu abiertu colos sindicatos educativos va siguir esta mesma tarde con una xunta que van encabezar la vicepresidenta y el conseyeru de Facienda. Dambos encargaránse de prosiguir les conversaciones coles mires d’algamar un alcuerdu que permita siguir ameyorando la educación pública.

     

  • Iniciativa pol Asturianu urxe cuntar con más compromisu col idioma na Conseyería d’Educación

    Iniciativa pol Asturianu urxe cuntar con más compromisu col idioma na Conseyería d’Educación

    Tres l’anunciu de la dimisión de Lydia Espina, conseyera d’Educación del Gobiernu del Principáu d’Asturies, Iniciativa pol Asturianu reclama al presidente del executivu autonómicu Adrián Barbón el nomamientu d’una persona con un perfil sensible y con compromisu coles llingües propies al frente del gabinete d’educación.

    Nesi sentíu, la organización considera qu’un Gobiernu favoratible a la oficialidá de la llingua asturiana y del eonaviego tien que cuntar con una política educativa potente onde les llingües propies tengan un papel importante. “Valoramos los pasos alantre que se dieron respeuto al interés pola presencia del idioma na etapa d’Educación Infantil pero echamos en falta más avences como la presencia del asturianu na Educación p’Adultos, la falta d’aumentu d’hores en Bachilleratu  o la realidá de facer competir l’asignatura d’asturianu con otres materies” apunten dende l’asociación.

    La organización de reivindicación llingüística echó en falta puxu nesti mandatu en delles cuestiones como ye’l casu de la falta de voluntá pa recuperar el Plan Pilotu Esperimental de Fomentu del Usu del Asturianu feche ente 2017 y 2019. Foi una iniciativa pionera pa la inclusión del asturianu como llingua vehicular en delles asignatures de Primaria, de manera llibre, optativa y voluntaria, que funcionó mui bien, participando hasta 10 centros educativos y a costu cero; cola satisfacción del alumnáu, families y docentes. L’asociación tamién considera que faltó fortaleza na defensa de la especialidá docente d’asturianu pa meyorar la situación del profesoráu y de la propia asignatura, como nos treslladen los representantes de los trabayadores de la enseñana.

    Asinamesmo, la entidá reconoz l’usu normal del asturianu en diferentes actos institucionales per parte de la yá exconseyera Lydia Espina y un cambiu d’actitú respecto a otros responsables d’Educación.

    Iniciativa pol Asturianu va pidir un conceyu informativu col nuevu titular de la materia del Gobiernu pa esponer que ye fundamental pal futuru del idioma cuntar con una presencia digna del idioma nel sistema educativu. El marcu llegal actual permite dar munchos pasos alantre que nun se tan faciendo. Ye’l momentu de ponese les piles y de faer la política educativa efectiva que precisa l’asturianu.

  • Investigadores de la Universidá d’Uviéu presenten un sistema de traducción automática neuronal pa llingües romániques de la península ibérica

    Investigadores de la Universidá d’Uviéu presenten un sistema de traducción automática neuronal pa llingües romániques de la península ibérica

    Nos últimos años, el númberu y l’eficacia de les tecnoloxíes de traducción automática disparáronse. Gracies a la intelixencia artificial (IA), llevamos nel nuesu bolsu potentes ferramientes que traducen con facilidá cualesquier de les llingües mayoritaries. Pero ¿qué pasa con aquelles que tienen menos falantes y menos recursos? ¿Cómo puede llegar a entendeles una IA? La respuesta podría tar nel aprendizaxe por tresferencia y l’entrenamientu de sistemes multilingües pa les llingües romániques de la península ibérica. El proyectu Traducción automática neuronal pa les llingües romániques de la península ibérica (TAN-IBE), financiáu pol Ministeriu de Ciencia, Innovación y Universidaes, coordináu pola Universitat Oberta de Catalunya (UOC) y cola participación de les universidaes d’Uviéu, Lleida y Zaragoza, esplora les técniques más efectives pa entrenar sistemes de traducción automática basaos en redes neuronales (un tipu de IA) aplicaes a delles llingües romániques de la península ibérica: español, aragonés, aranés y asturianu.

    Cristina Valdés, profesora del Departamentu de Filoloxía Inglesa, Francesa y Alemana de la Universidá d’Uviéu, sorraya que la traducción automática neuronal, tamién conocida poles sos sigles TAN, ye una tecnoloxía qu’emplega redes neuronales artificiales pa xenerar traducciones d’un idioma a otru. “La gran diferencia colos sistemes de traducción automática tradicionales mora en que la TAN apriende patrones complexos de grandes cantidaes de datos y puede producir traducciones más naturales y coherentes”, indica esta investigadora.

    D’esta miente, los sistemes de traducción basaos en redes neuronales entrénense a partir de millones d’oraciones nuna llingua cola so traducción n’otra llingua. Ye lo que se conoz como corpus paralelos, inmensos conxuntos de datos disponibles en dos llingües. Una vegada que la rede neuronal ta entrenada, ye capaz de traducir con eficacia cualquier testu neses llingües. “El problema ye que, con idiomes como l’español o’l portugués, ye cenciello atopar esos corpus paralelos, pero con aquelles llingües que tienen menos material disponible —como’l aranés, l’aragonés o’l nuesu asturianu— ye complicao tener abondos datos pa entrenar a la intelixencia artificial”, añede Valdés.

    La construcción del modelu de traducción nun ye l’únicu oxetivu del proyectu d’investigación, que busca, amás:

    • Compilar corpus paralelos y monollingües pa les siete llingües romániques que s’inclúin na propuesta, dedicando un mayor esfuerzu al asturianu, l’aragonés y l’aranés.
    • Esplorar nueves técniques pal entrenamientu de sistemes de traducción automática neuronal. Amás del deprendizaxe por tresferencia, va estudiase la traducción automática multillingüe, la traducción automática autosupervisada y la traducción automática non supervisada.
    • Entrenar sistemes de traducción automática neuronal ente l’español y el restu de les llingües del proyectu, en dambes direcciones.
    • Entrenar sistemes multilingües capaces de traducir dende y hacia toles llingües del proyectu.
    • Crear guíes y scripts que faciliten l’entrenamientu de sistemes de traducción automática neuronal polo xeneral y, más en concretu, pa les llingües del proyectu.
    • Publicar los resultaos del proyectu con llicencies llibres. Esto inclúi los corpus compilados, los modelos y motores de traducción automática y les guíes y scripts.
  • Educación abre’l plazu d’almisión pal próximu cursu, el primeru nel que l’alumnáu d’Infantil va poder estudiar asturianu

    Educación abre’l plazu d’almisión pal próximu cursu, el primeru nel que l’alumnáu d’Infantil va poder estudiar asturianu

    La Conseyería d’Educación va abrir mañana’l plazu de presentación de solicitúes d’almisión pal próximu cursu, que tendrán d’apurrise nel centru escoyíu como primer opción. Esti periodu va tar abiertu hasta’l 6 de mayu. La publicación de la llista provisional d’almitíos y escluyíos ta prevista pal 14 de mayu, mientres que’l periodu d’allegamientos va tomar del 14 al 16 del mesmu mes.

    Una de les novedaes del próximu cursu ye la inclusión de la enseñanza de les llingües propies d’Asturies nel segundu ciclu d’Infantil. Esta ufierta enmárcase na área d’aprendizaxe denomináu Comunicación y representación de la realidá, una de los trés d’esta etapa formativa. Va tener calter voluntariu, en cumplimientu de la Llei 1/1998, de 23 de marzu, d’Usu y Promoción del Asturianu.

    Esta midida nun trai’l cambéu de los conteníos, polo que se garantiza que tol alumnáu reciba la mesma formación y adquiera iguales competencies. Quien lo deseyen van estudiar parte de los conteníos de Comunicación y representación de la realidá n’asturianu y eonaviego y el restu va facelo en castellán.

    Les families interesaes van tener que cursar una solicitú más palantre, mientres el periodu de matriculación, del 18 al 25 de xunu. La conseyería ta peracabando un formulariu que va poner a la so disposición al traviés de les direcciones de los centros.

    La nueva ufierta va enllantar de forma simultánea nos trés cursos del segundu ciclu d’Infantil. Por esa razón, nesti primer añu, tendrá de solicitar la so incorporación a la enseñanza en llingua asturiana o en enaviego tol alumnáu. A partir del segundu añu, yá solo va ser necesariu que lo faiga’l de nueva incorporación.

    Dende mañana, 21 d’abril, y hasta el 6 de mayu, tamién ta abiertu’l plazu de solicitú de places del primer ciclu d’Infantil de toles escueles de 0 a 3 años pal próximu cursu. Per segundu añu consecutivu, el procedimientu va ser unificáu para los centros de titularidá municipal y para los que formen parte de la nueva rede autonómica de Les Escuelines/As Escolías.

    Los menores que se matricularen esti cursu en dalguna escuelina autonómica entá pendiente d’apertura cunten con plaza reservada nel nivel correspondiente pal próximu cursu y nun van tener que realizar nengún tipu de trámite.

    Nel so casu, la llista provisional d’almitíos en primer opción y non almitíos va publicase’l 2 de xunu. Ese mesmu día abrirá un plazu d’allegamientos hasta’l 6 de xunu. Tantu la relación definitiva d’almitíos como les llistes d’espera espublizaránse’l 13 de xunu.

    El documentu oficial pa cursar la solicitú va poder descargase de los portales www.asturias.es y www.educastur.es. Pa la rede autonómica, va presentase na see de la Conseyería d’Educación o nel centru de referencia pa l’almisión. Nel casu de les escueles municipales, va facese nel llugar especificáu por cada conceyu.

  • L’alumnáu qu’empecipie’l próximu cursu a la universidá va tener gratuidá na matrícula

    L’alumnáu qu’empecipie’l próximu cursu a la universidá va tener gratuidá na matrícula

    El Gobiernu d’Asturies decidió reforzar el so sofitu a la enseñanza pública y va financiar la matrícula a tol alumnáu qu’empecipie estudios de grau na Universidá d’Uviéu’l próximu cursu. Amás, va abrir la posibilidá de que quien nun dispongan de beca del Ministeriu d’Educación puedan realizar tola carrera universitaria gratis si acrediten bones resultancies académiques. L’oxetivu ye facilitar l’accesu universal a la educación cimera y centrar el focu nel rendimientu académicu del alumnáu y non na so situación económica.

    El Principáu va compensar a la Universidá d’Uviéu pol costu d’estes matrícules. Ello ye que nel presupuestu d’anguaño yá s’inclúi una partida de 2.9 millones, que va ser complementada nel presupuestu del próximu exerciciu colos fondos necesarios pa cubrir a tol alumnáu de nuevu ingresu, esto ye, a quien se matriculen en primer cursu d’un grau na institución académica asturiana y nun dispongan de beca.

    “Esta midida ye una apuesta clara y contundente pola nuesa universidá pública, pola Universidá d’Uviéu, de la que garantiza’l derechu universal a la educación inclusive nos estudios universitarios”, valoró’l conseyeru de Ciencia, Borja Sánchez. Sánchez esplicó que va ser, amás, una midida progresiva. Asina, va financiar tola carrera del estudiante que demuestre un bon rendimientu académicu. El cursu 2025-2026 va ser el primeru nel que s’enllante esta midida de gratuidá universitaria.

    Coles mesmes, el próximu decretu de precios públicos va caltener la conxelación de tases per sestu añu consecutivu pal restu de cursos universitarios, tanto de grau como de máster y doctoráu, en sintonía colo que se vien faciendo nos últimos años.

  • Educación pon nomes n’asturianu a los catorce centros de nueva creación de la fase 2 de la rede de Les Escuelines/As Escolías

    La Conseyería d’Educación punxo nomes oficiales n’asturianu a los catorce centros de nueva construcción previstos na fase 2 del esplegue de la rede autonómica, pública y gratuita de Les Escuelines/As Escolías p’alumnáu de 0 a 3 años. La denominación supon el pasu previu a la so creación alministrativa, que tendrá d’aprobar el Conseyu de Gobiernu.

    Al igual qu’asocedió coles 31 escuelinas/escolías de la fase 1, la conseyería encargóse de buscar nomes autóctonos, atendiendo a les peculiaridaes de cada conceyu. Darréu, les denominaciones propuestes consensuáronse colos conceyos.

    Los nomes son de procedencia variada, anque predominen los alusivos al mundu infantil y los xuegos tradicionales (Los Rebusquinos, Los Pericos, El Boliche, Trebeyos, Cucurrabucu) y a la flora y la fauna (Los Ablaninos, La Cerezal, Les Curuxines, La Foquina).

    Hai un topónimu, La Xungarosa, que ye como se conoz tradicionalmente al barriu avilesín de La Lluz, y dos alusiones a la hestoria local: Los Condalinos, en Noreña, y Los Vaqueirinos, en Tinéu. A lo último, dos escuelines d’Uviéu lleven el nome del matrimoniu formáu por Pinón y Telva, los dos personaxes creaos pol dibuxante Alfonso Iglesias.

    Per otru llau, la fase 2 de la rede educativa inclúi la creación d’unidaes en cinco escueles municipales yá esistentes. Trés d’elles tienen un nome propiu: La Oliva (Villaviciosa), La Marinera (Carreño) y Pinín (Navia), mientres que les otres dos caltienen, pel momentu, el del conceyu: El Franco y Pravia.