Xixón al día

Categoría: Educación

  • 16 vacantes menos d’asturianu na convocatoria d’aniciu del cursu 2024-25

    16 vacantes menos d’asturianu na convocatoria d’aniciu del cursu 2024-25

    L’Asociación de Docentes d’Asturianu y Eonaviego/Gallego-asturiano (ADAE) fizo un llamáu
    urxente a la Conseyera d’Educación al traviés d’un documentu unviáu per rexistru a principios de xunetu pa qu’adoptare midíes inmediates énte l’ausencia escandalosa de 40 vacantes de dambes asignatures alvertida na rellación de necesidaes provisionales de docentes pal cursu 2024/2025.La corrección de les previsiones siguió dexando a mediaos de xunetu una falta de 30 places, lo que tamién s’alvirtió a Conseyería y a tolos sindicatos. Tres estos avisos, la convocatoria de places d’iniciu de cursu sal con una deficiencia de 16 vacantes en comparación coles convocaes a entamos del cursu 23/24.

    En Llingua Asturiana de Primaria desapaecen 13 vacantes y 7 pasen a media xornada. En
    Secundaria, desapaecen 3 puestos de trabayu que correspuenden a los Centros d’Educación de Persones Adultes (CEPA) que lleven años con docente de l’asignatura. Amás, siguen ensin convocase vacantes nos otros 5 CEPA. En Gallego-asturiano de Primaria la única xornada completa qu’había divídese en dos medies.

    Rexístrense dalgunos avances, como dos vacantes a xornada completa n’asturianu en Primaria que nun se conseñaben nes necesidaes provisionales y seis vacantes más a xornada completa n’asturianu en Secundaria. En gallego-asturiano en Secundaria convóquense dos medies xornaes nueves en centros nos que nun se daba l’asignatura y aumenta una media xornada a xornada completa. Estos avances son insuficientes, yá que depués de dos comunicaciones al traviés del rexistru a la Conseyería d’Educación
    siguen desapaeciendo 16 puestos de trabayu.

    El profesoráu que forma ADAE considera qu’esta situación ye inaceptable y camienta que se
    trata d’una estratexa d’aforru que tien tovía un coste mayor: l’incumplimientu de la normativa que permite al alumnáu d’Asturies que lo desee cursar l’asignatura d’ún d’estos dos idiomes, lo que suprime los sos drechos. ADAE insta a la Conseyería a que rectifique les previsiones y se convoquen les vacantes necesaries pa cumplir cola llexislación y la xurisprudencia vixente.

  • Investigadores de la Universidá d’Uviéu presenten descubrimientos na conferencia más importante de Física de Partícules

    Investigadores de la Universidá d’Uviéu presenten descubrimientos na conferencia más importante de Física de Partícules

    Estos díes ta celebrándose en Praga la conferencia más importante en Física de Partícules qu’axunta cada dos años a los mayores espertos mundiales nesta materia. El Grupu de Física Esperimental d’Altes Enerxíes, integráu nel ICTEA y que los sos investigadores son miembros del Departamentu de Física de la Universidá d’Uviéu, fueron escoyíos pa presentar dalgunos de los resultaos más importantes llograos pol esperimentu CMS, unu de los detectores de partícules del Gran Colisionador d’Hadrones nel CERN, en Suiza. En particular, destaca la presentación de la primer midida del procesu de producción simultánea d’un bosón W y un bosón Z (procesu WZ) a la máxima enerxía enxamás rexistrada (13.6 TeV) nun acelerador de partícules. Estos dos bosones son mui masivos polo que la probabilidá de producilos simultáneamente ye pequeña, de lo que se deriva en parte la dificultá pa reparalu. Son los mediadores de la fuerza débil, una de les úniques cuatro fuerces qu’esisten nel universu. L’afayu, lideráu polos estudiantes de doctoráu Carlos Vico y Miguel Grueso, dirixíos por Bárbara Álvarez, Santiago Folgueras, Enrique Palencia y Pietro Vischia, foi escoyíu ente los principales resultaos de CMS nesta conferencia internacional. Anque l’esperimentu CMS lleva yá dos años tomando datos a una enerxía de choque de 13.6 TeV, el gran volume de los datos recoyíos, la so complexidá y la precisión que se busca, esplica que, hasta esti momentu, namás pudieron lliberase cinco resultaos. El Grupu de Física Esperimental d’Altes Enerxíes participa en trés d’ellos.

  • Un 76,34% d’aprobaos na EBAU estraordinaria de xunetu

    Un 76,34% d’aprobaos na EBAU estraordinaria de xunetu

    El 76,34% del estudiantáu que se presentó a la convocatoria de xunetu de la Prueba d’Evaluación de Bachilleratu pal Accesu a la Universidá (EBAU) de la Universidá d’Uviéu superó con ésitu los exames (74,75% muyeres y 77,89% homes). Les pruebes desenvolviéronse del 8 al 10 de xunetu n’Uviéu, Xixón, Avilés, Mieres, Ribeseya, Cangas del Narcea, L.luarca y Tapia.

    Por asignatures de la fase d’accesu, el mayor porcentaxe de persones aprobaes rexistróse en Llingua Castellana y Lliteratura II, con un 54,19% d’exames superaos y una nota media de 5,03. Tocantes a Inglés, aprobó’l 43,58% del estudiantáu que se presentó a la convocatoria estraordinaria, con una nota media de 4,388. N’Hestoria d’España hai un 45,68% de persones aprobaes y una nota media de 4,509. Pela so parte, n’Hestoria de la Filosofía hai un 46,64% d’aprobaos y una nota media de 4,476.

    Per otru llau, tocantes a les pruebes correspondientes a les materies troncales de modalidá de Bachilleratu, el porcentaxe d’aprobaos en Matemátiques II ye del 77,34% con una nota media de 6,807, mientres que na asignatura de Matemátiques Aplicaes a les Ciencies Sociales II superaron l’exame’l 83,93% de los presentaos, con una nota media de 7,116.

    Na fase d’almisión son tamién reseñables los resultaos llograos nes asignatures de Bioloxía, con un 72,07% d’aprobaos y una nota media de 6,298 y en Química con un porcentaxe d’aprobaos del 55,56% y una nota media de 5,273. Na convocatoria estraordinaria de la EBAU de xunetu n’Asturies un total de 404 persones presentáronse namás a la fase d’accesu, toes elles procedentes de Bachilleratu. Amás, fueron 383 les persones que namás fixeron les pruebes de la fase d’almisión, de les que 286 veníen de Bachilleratu y 97 de ciclos de Formación Profesional. Ha destacase, amás, que 423 de los y les estudiantes que se presentaron realizaron de nuevu la prueba coles mires de xubir nota.

  • El profesoráu d’asturianu y eonaviegu denuncia qu’hai 40 vacantes menos na previsión pal cursu viniente

    El profesoráu d’asturianu y eonaviegu denuncia qu’hai 40 vacantes menos na previsión pal cursu viniente

    L’Asociación de Docentes d’asturianu y eonaviegu (ADAE) fai un llamáu urxente a la Conseyera d’Educación al traviés d’un documentu unviáu per rexistru pa qu’adopte midíes
    inmediates énte lo que califiquen de «ausencia escandalosa de 40 vacantes de dambes asignatures alvertida na rellación de necesidaes provisionales de docentes pal cursu 2024/2025».

    La previsión de puestos pal profesoráu d’asturianu y eonaviegu, en comparanza cola plantiya cola que s’inició’l cursu pasáu, «amuesa una reducción preocupante del númberu de puestos de trabayu y la reducción de xornaes completes», espliquen dende ADAE.

    La organización contactó con dellos centros y confirmó la esistencia de vacantes que nun apaecen espublizaes pola Conseyería y que, de nun iguase, dexaríen a 40 centros ensin docentes d’asturianu y eonaviegu al entamu del cursu.

    La organización esplica qu’en Llingua Asturiana desapaecen 32 vacantes y 9 pasen a media xornada de Primaria. En secundaria desapaecen 7 puestos de trabayu, de los que 5 correspuenden a los Centros d’Educación de Persones Adultes (CEPA). Anque estos centros fixeron la petición, esti añu la Conseyería comunicó-yos la non intención d’incluyir estes vacantes hasta que nun termine’l plazu de matriculación (finales de setiembre), lo que p’ADAEA faise «ensin tener en cuenta la importancia d’incorporase al iniciu de cursu poles singularidaes pedagóxiques y de funcionamientu que caractericen a estos centros».

    «De ser asina, l’alumnáu va tar ensin docente hasta mediaos d’ochobre, un agraviu comparativu col restu de docentes y con otres optatives que sí van tener profesoráu dende l’entamu del cursu, aforrando un mes y mediu de sueldos», afirmen dende ADEA. Pa rematar, ADEA recuerda que «hai 5 CEPAs que siguen ensin incorporar l’asignatura añu tres añu, una irregularidá denunciada cada iniciu de cursu énte la que la Conseyería se pon de llau».

    Nel casu d’eonaviegu, los datos tampoco son positivos «en Primaria desapaez una vacante y otra pasa a media xornada y en Secundaria desapaez la única completa, siendo yá’l 100% de vacantes a media xornada».

    El profesoráu que forma ADAE, considera qu’esta situación ye inaceptable y solicita a la
    Conseyería d’Educación que revise y rectifique les previsiones. «Ye fundamental garantizar una dotación adecuada de profesoráu pa que l’alumnáu d’asturianu y eonaviegu nun
    empiece’l cursu ensin docentes pa cubrir les necesidaes y que l’alumnáu vea garantizaos los sos drechos», denuncien los docentes.

    «De tratase d’un retayu de les places, col periodu de matriculación más avanzáu qu’en cursos anteriores per estes feches, el recorte de puestos de trabayu nun tendría precedentes», afirmen dende ADEA. «Aguardamos que se trate d’una acumulación d’errores y non d’un nuevu intentu por aforrar dineru, lo que yá se trató de facer va unos meses cola propuesta d’axuntar medies xornaes convirtiendo la itinerancia en norma», esplica’l profesoráu d’asturianu y eonaviegu.

    Aprovechen, amás, pa recordar «qu’añu tres añu tán denunciándose irregularidaes cometíes pola Conseyería, polos equipos directivos de dalgunos centros o a comuña ente dambos cola única intención d’aforrar perres, mermando drechos del alumnáu, al que se priva de ser educáu na so llingua».

     

     

  • El Centru d’Estudios sobro l’Impactu Social de la Intelixencia Artificial de la Universidá d’Uviéu va inaugurase’l 15 de xunetu

    El Centru d’Estudios sobro l’Impactu Social de la Intelixencia Artificial de la Universidá d’Uviéu va inaugurase’l 15 de xunetu

    El Centru d’Estudios sobro l’Impactu Social de la Intelixencia Artificial de la Universidá d’Uviéu (CEISIA) va inaugurase’l próximu 15 de xunetu, nun actu institucional al que va asistir l’alcalde de Siero, Ángel García; el rector de la Universidá d’Uviéu, Ignacio Villaverde, y el director del centru , el profesor Roger Campione. La puesta de la llargu del nuevu centru d’investigación de la Universidá d’Uviéu va cuntar, amás de col actu institucional, con una mesa redonda titulada El futuru de la intelixencia artificial: implicaciones científiques, étiques y llegales, na que van participar dos espertos nacionales nesta materia : Humberto Bustince y Ibán García del Blanco, moderaos por Irene Díaz, vicerrectora d’Investigación de la Universidá d’Uviéu y esperta tamién n’intelixencia artificial.

    L’actu institucional va tener llugar nes instalaciones del CEISIA, nel edificiu de l’antigua Casa de Cultura de Llugones, cedíu pol Conceyu de Siero pa tal fin. Va ser a les 11:30 hores. Una hora más tarde, a les 12:30 hores y nel Centru Polivalente Integráu de Llugones, va tener llugar la mesa redonda con dos espertos nesta área de la conocencia que van dialogar sobre les implicaciones científiques, étiques y llegales de la intelixencia artificial.

    El Centru d’Estudios sobro l’Impactu Social de la Intelixencia Artificial naz coles mires de contribuyir al tratamientu de los aspeutos sociales, en sentíu ampliu, de la interacción ente el ser humanu y les aplicaciones de la intelixencia artificial. El CEISIA va estudiar aspeutos educativos rellacionaos cola intelixencia artificial, cómo afecta al procesu d’enseñanza, non solo como una ferramienta de sofitu , sinón tamién a la educación. Tamién s’atopa ente los sos oxetivos la rellación bidireccional, tan estrecha , ente la intelixencia artificial y les humanidaes, qu’apurren una perspectiva crítica de les implicaciones d’esta nueva ferramienta .

    El centru cunta con una financiamientu añal per parte del Conceyu de Siero de 100.000 euros, de los que 55.000 van tar destinaos a proyectos d’investigación, 32.000 a actividaes de divulgación científica y tecnolóxica y 10.000 a ayudes a estudiantes pa la realización de práctiques. Amás, va ponese en marcha un premiu rellacionáu cola intelixencia artificial. Tamién, nel marcu del Conveniu de Collaboración ente el Conceyu de Siero y l’Universidá d’Uviéu, va dirixise parte de l’actividá del centru al desenvolvimientu de nueves tecnoloxíes al traviés de la intelixencia artificial, y al estudiu y meyora de los procesos de l’alministración nel ámbitu local.

  • 1.199 estudiantes van esaminase na convocatoria estraordinaria de la EBAU n’Asturies la próxima selmana

    1.199 estudiantes van esaminase na convocatoria estraordinaria de la EBAU n’Asturies la próxima selmana

    Un total de 1.199 estudiantes esamínense anguaño n’Asturies de la Prueba d’Evaluación de Bachilleratu pal Accesu a la Universidá (EBAU) na so convocatoria estraordinaria, que se va desenvolvese ente’l próximu llunes, 8 de xunetu , y el miércoles, 10 de xunetu . Les pruebes van llevase a cabu en 9 allugamientos, asitiaos n’Uviéu, Xixón, Avilés, Mieres, Ribeseya, Cangas, L.luarca y Tapia de Casariego.

    El númberu d’estudiantes pa la convocatoria estraordinaria de la EBAU n’Asturies ye mayor al del añu pasáu, cuando s’inscribieron 1.115 persones na prueba de xunetu . Na presente edición van esaminase 669 muyeres y 530 homes.

    Los estudiantes de Bachilleratu tendrán d’esaminase de les cuatro asignatures que constitúin la fase d’accesu, cursaes en segundu de Bachilleratu según la modalidá ya itinerariu realizaos. Cada exerciciu de la fase d’accesu va calificase de 0 a 10 puntos. La calificación d’esta fase va ser la media aritmética de les calificaciones llograes en caúna de les materies, espresada nuna escala de 0 a 10 puntos con trés cifres decimales y arrondada a la milésima . Esta calificación tendrá de ser igual o superior a 4 puntos pa faer media cola calificación final del bachilleratu .

    La nota de la EBAU va calculase en base a un 60% de la calificación final del Bachilleratu y un 40% de la calificación de la fase d’accesu de la prueba. Va entendese qu’un estudiante axunta los requisitos d’accesu cuando la resultancia d’esta fórmula seya igual o superior a 5 puntos. La nota máxima nesta fase ye de 10 puntos.

    Aquellos estudiantes que quieran xubir nota p’aportar a los sos estudios universitarios tendrán de presentase amás a la fase d’almisión. Va consistir na evaluación de les materies d’opción del bloque d’asignatures troncales de segundu cursu de Bachilleratu . Les materies d’esta fase nun requieren ser cursaes nel Bachilleratu pa ser evaluaes na prueba y los estudiantes podrán esaminase d’un máximu de cuatro asignatures. La nota final una vegada realizaes dambes fases (accesu y almisión) va algamar un máximu de 14 puntos.

    Como novedá, anguaño hai 10 asignatures nueves procedentes del Bachilleratu d’Artes y del Bachilleratu Xeneral.

  • Alejandro Braña gana’l premiu Comité Español d’Hestoria del Arte por un trabayu sobre arquitectura nel franquismu

    Alejandro Braña gana’l premiu Comité Español d’Hestoria del Arte por un trabayu sobre arquitectura nel franquismu

    Un estudiu de la Universidá d’Uviéu sobre la influencia de los hermanos Somolinos na arquitectura asturiana, desenvueltu pol estudiante Alejandro Braña Barcia, alzóse col premiu del Comité Español d’Hestoria del Arte (CEHA) al meyor Trabayo Fin de Máster (TFM) del añu 2023. El galardón destaca’l rigor de la investigación y el maduror na redacción que presenta l’estudiu, tutorizáu pola caderalga n’Hestoria del Arte María del Pilar García Cuetos.

    El trabayu, tituláu Somolinos arquitectos: les obres pa Valle, Ballina y Fernández, céntrase na parte más desconocida d’un estudiu que caltuvo la so actividá ente los años 1934 y 1975 y al que s’atribúin grandes proyectos como Perlora, la Casa Sindical d’Uviéu o l’edificiu del cine Aramo. Con él, Braña remató’l Máster Universitariu n’Estudios Avanzaos n’Hestoria del Arte: Investigación y Xestión.

    Gracies a esta reconocencia, el TFM d’Alejandro Braña Barcia va ser publicáu na páxina web
    del CEHA. Amás, va recibir un premiu económicu, un diploma acreditativu y la inscripción al Comité Español d’Hestoria del Arte mientres dellos años. La Xunta Directiva del CEHA decidió por unanimidá premiar el trabayu del estudiante de la Universidá d’Uviéu, que destacó sobre’l restu de les candidatures.

    El galardón va ser apurríu nel marcu del XXV Congresu del Comité Español d’Hestoria del Arte, que se va celebrar en Murcia ente’l 30 de setiembre y el 3 d’ochobre de 2025, dáu’l so calter biañal.

    “Ye un prestu enorme, un premiu que reconoz l’esfuerzu y la dificultá d’encarar un tema pocu tratáu primeramente”, celebra l’estudiante de la Universidá d’Uviéu. Alejandro Braña Barcia pon en valor, amás, que la so investigación xira alredor d’Asturies y a una parte de la so hestoria qu’anguaño sigue desenvolviendo nel programa oficial de Doctoráu n’Hestoria del Arte y Musicoloxía. La so tesis va siguir centrándose nel llabor de los hermanos Somolinos. “Quédanos entá muncho camín y elementos interesantes por afayar y poner en valor”, apuesta.

  • Ignacio Villaverde presenta una revolución nel so equipu de gobiernu

    Ignacio Villaverde presenta una revolución nel so equipu de gobiernu

    El rector en funciones de la Universidá d’Uviéu, Ignacio Villaverde, presentó güe’l nuevu equipu de gobiernu de la institución, formáu por nueve vicerrectorados y trés delegaciones del rector, y nel que se reflexa una claru apueste pola internacionalización y el nuevu modelu de docencia. L’equipu, que va ser paritario, va cuntar con seis miembros del anterior mandatu. Ente les novedaes de la estructura destaquen la creación del Vicerrectoráu  d’Estudios y Docencia o del Vicerrectorado de Planificación Estratéxica y Coordinación de Campus; l’agrupación nuna mesma área de les polítiques de profesoráu y la ordenación académica, o la inclusión de la empleabilidá nel Vicerrectoráu d’Estudiantes. Amás, créanse dos delegaciones del rector claramente empobinaes al allugamientu internacional de la Universidá d’Uviéu: una pal Real Colexu Complutense en Harvard y Estaos Xuníos, y otra pa les aliances internacionales. Nun se producen cambeos al mandu de la Secretaría Xeneral, cola continuidá d’Ángel Espiniella. Estos son los cargos del equipu de gobiernu:

    • Vicerrectoráu de Polítiques de Profesoráu y Ordenación Académica – Pedro Alonso Velázquez (Deza (Soria), 1962)
    • Vicerrectoráu d’Investigación – Irene Díaz Rodríguez (Llugones, 1973)
    • Vicerrectoráu d’Estensión y Proyección Cultural – María Pilar García Cuetos (Samartín del Rei Aurelio, 1959)
    • Vicerrectoráu dEstudiantes y Empléu – Alfonso López Muñiz (Uviéu, 1956)
    • Vicerrectoráu de Tresferencia y Rellaciones cola Empresa – Susana Luque Rodríguez (Xixón, 1968)
    • Vicerrectoráu de Sostenibilidá y Dixitalización – Inés Peñuelas Sánchez (Soria, 1970)
    • Vicerrectoráu d’Internacionalización – Ana Suárez Vázquez (Cangas del Narcea, 1973)
    • Vicerrectoráu de Planificación Estratéxica y Coordinación de Campus | Juan Carlos San Pedro Veledo (Xixón, 1965)
    • Vicerrectoráu d’Estudios y Docencia – Juan Manuel Marchante Gayón (Mieres, 1967)
    • Delegación del Rector pa la Coordinación y Rellaciones Institucionales – Marce Fernández-Raigoso Castaño (L’Entregu, 1962)
    • Delegación del Rector pa les Aliances Internacionales – Jesús Daniel Santos Rodríguez (Mieres, 1975)
    • Delegación del Rector pal Real Colexu Complutense en Harvard y Estaos Xuníos – Cristina Valdés Rodríguez (Xixón, 1970)
  • Los graos de Criminoloxía y de Ciencies de l’Actividá Física y del Deporte van impartise dende setiembre

    Los graos de Criminoloxía y de Ciencies de l’Actividá Física y del Deporte van impartise dende setiembre

    L’Axencia Nacional d’Evaluación de la Calidá y Acreditación (ANECA) dio güei’l vistu bonu definitivu a los graos de Criminoloxía y de Ciencies de l’Actividá Física y del Deporte de la Universidá d’Uviéu, lo que va dexar empezar a impartir dambos estudios en septiembre de 2024, como taba previstu. Amás, l’aprobación del grau en Criminoloxía trai tamién la puesta en marcha del doble grau en Criminoloxía y Derechu.

    El vicerrector de Xestión Académica, José Miguel Arias, esplica que dende’l vicerrectoráu vívese con “enorme prestu l’aprobación definitiva de dos estudios bien demandaos”. “Tanto’l grau en Criminoloxía como’l grau de Ciencies de l’Actividá Física y el Deporte déxennos complementar la nuesa ufierta académica”, manifiesta y añede que “avanzamos tamién nel nuesu catálogu de dobles titulaciones”, una de los grandes apuestes d’esti equipu rectoral. Arias esplica que, una vegada que se cunta col vistu bonu de l’ANECA, solo resten agora trámites alministrativos que van concluyir cola publicación nel Boletín Oficial del Estáu de dambes titulaciones. Nel casu del doble grau de Criminoloxía y Derechu, solo ye necesaria la so aprobación pol Conseyu de Gobiernu de la Universidá d’Uviéu.

    En cuanto al númberu de places, tal que yá se contemplaba na ufierta aprobada nel Conseyu de Gobiernu del 10 d’abril, el grau de Ciencies de l’Actividá Física y del Deporte va empezar con 60 places, les mesmes que se recueyen pal grau en Criminoloxía. Esti postreru, va dividir esi númberu ente’l grau en Criminoloxía (25) y el doble grau en Criminoloxía y Derechu (35).

    El decanu de la Facultá de Derechu, Javier Fernández Teruelo, manifiesta una “enorme allegría énte la consecución d’una aspiración histórica pa la facultá, como ye la puesta en marcha del grau en Criminoloxía”. “El frutu del trabayu d’esti equipu mientres cuatro años, nel qu’empleguemos a xeitu pa recuperar unos estudios históricos nesti centru”, esplica. Nesti sen, señala que la Universidá d’Uviéu cuntaba con un llaboratoriu y un institutu de Criminoloxía nel Edificiu Históricu, que se perdió nos bombardeos de 1934, y con ellos, cesaron los estudios nesta materia na Universidá d’Uviéu. Fernández Teruelo destaca tamién l’apueste por un doble grau mui atractivu con Derechu, dos titulaciones que se complementen perbién”.

    Pela so parte, el decanu de la Facultá de Formación del Profesoráu y Educación, Celestino Rodríguez, señala, otramiente, que “la lluz verde al grau de Ciencies de l’Actividá Física y el Deporte supón la reconocencia a munchos años de trabayu”. “L’interés per parte del centru pa poner en marcha estos estudios ye de fai yá casi trés décades, y por fin agora vemos que se materializa”, añede. Dambos decanos señalen qu’estes nueves titulaciones “espierten muncho interés per parte de los futuros alumnos”.

  • Les ayudes Severo Ochoa aumenten a 80 places

    Les ayudes Severo Ochoa aumenten a 80 places

    El Gobiernu d’Asturies introdució meyores nel programa d’ayudes predoctorales Severo Ochoa de cara a impulsar la carrera investigadora y la retención de talentu. La nueva convocatoria aumenta hasta 80 el númberu de places, una cifra récord, ya inclúi midíes como l’actualización salarial progresiva, una indemnización final o la posibilidá de siguir cola ayuda como periodu d’orientación postdoctoral una vegada lleida la tesis y hasta final de contratu.

    La nueva convocatoria salió publicada güei nel Boletín Oficial del Principáu d’Asturies (Bopa). Son 80 contratos de cuatro años destinaos a facilitar la preparación de la tesis doctoral y la Conseyería de Ciencia, Empreses, Formación y Empléu destina daqué más de 8,5 millones pa financialos hasta 2028.

    Les persones beneficiaries van ser les primeres que van disponer de delles de les siguientes meyores:

    • Aumentu en diez contratos sobre l’anterior convocatoria. Con esta decisión, dóblase’l númberu de places col qu’empezó’l programa va ocho años.
    • El financiamientu inclúi actualizaciones añales de les retribuciones afeches al sueldu de los emplegaos públicos. El primer añu, cada beneficiariu va percibir 17.000 euros y va dir aumentando progresivamente hasta los 23.000 euros. Tamién s’incorpora la indemnización por fin de contratu.
    • Les persones beneficiaries van poder siguir col so contratu una vegada lleida la tesis doctoral hasta rematar los cuatro años. El periodu del que dispongan va poder ser utilizáu como orientación postdoctoral.
    • Les ayudes tán abiertes a estudiantes matriculaos nun máster universitariu que tengan cuenta de realizar la so tesis doctoral. Esta midida, yá a valir, busca facilitar al máximu que les persones interesaes n’empecipiar una carrera investigadora puedan empezar yá con una ayuda y que los meyores espedientes y proyectos de tesis doctoral nun se queden fuera por razones económiques.