Xixón al día

Categoría: Ociu

  • Torna XixónTours mientres la Selmana Santa con rutes que siguen metiendo mieu

    Torna XixónTours mientres la Selmana Santa con rutes que siguen metiendo mieu

    Una vegada más Xixón tíñese de misteriu de la mano de la hestoriadora Arantza Margolles. La plataforma d’información sobre ociu y turismu VerAsturies.com y Cuatro Gotes retomen otra vuelta esti ciclu de visites guiaes temátiques n’asturianu con nueves feches de la ruta ‘Xixón mete mieu‘. Mientres la ruta, d’una hora y media de duración, vamos poder percorrer el Xixón más escuru: Crímenes, lleendes y edificios que fueron escenariu de los mayores misterios y asesinatos del Xixón del que yá naide fala. Una ruta pel Xixón negru nel que descubrir l’orixe de munches creencies y les hestories más macabres peles cais de Cimavilla. 

     

    Les rutes de XixónTours tán diseñaes pa buscar un acercamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral, dedicáu non namás pa turistes que quieran descubrir un Xixón más “atípicu” sinón tamién pa los y les xixoneses que yá conocen los llugares que van visitar y puedan ver aspectos diversos o desconocíos pa ellos.

     

    Feches y horarios de les visites guiaes

    • Vienres 15 d’abril – De 20:30 a 22:00
    • Sábadu 16 d’abril – De 20:30 a 22:00

     

    Les rutes parten dende la Plaza’l Marqués, frente a la estatua de Pelayo, con un preciu de 10€ pa mayores d’edá, 8€ pa adolescentes d’ente 13 y 18 años y de baldre pa guah.es de menos de 12 años. El pagu fadráse n’efectivu minutos enantes d’entamar el tour. La incripción podrá facese rellenando’l formulariu disponible n’esti enllaz

    Les rutes temátiques de XixónTours organizaes pola plataforma VerAsturies lleven yá dellos años siendo un ésitu de xente qu’acaba contenta y naguando por repetir una esperiencia diferente ya interesante na que conocer Xixón d’otra forma.

  • Asturies y Microsoft organicen un hackathon sobre intelixencia artificial aplicada a la meyora del mediuambiente

    Asturies y Microsoft organicen un hackathon sobre intelixencia artificial aplicada a la meyora del mediuambiente

    El Gobiernu d’Asturies y l’empresa Microsoft entamen un hackathon sobre intelixencia artificial aplicada a la sostenibilidá. L’eventu Artificial Intelligence (AI) for Earth, promovido pola multinacional tecnolóxica, va celebrase’l xueves nel nuevu edificiu d’innovación AS5-Hub de Xixón y va cuntar cola participación de más d’una trentena d’espertos d’entidaes, empreses y compañíes emerxentes (startups) asturianes.

    El hackathon –términu compuestu a partir de les palabres hacker y maratón- ta concebíu como un alcuentru de trabayu nel que los profesionales inscritos, distribuyíos en grupos, tienen de desenvolver soluciones a una serie de retos estratéxicos plantegaos pol Principáu, rellacionaos cola descarbonización, la economía circular, la meyora de la calidá del aire, les tecnoloxíes de l’agua, etc.

    La xornada, que se va celebrar dende les 09:00 hasta les 18:00 hores, persigue crear soluciones innovadores d’intelixencia artificial nel campu de la sostenibilidá. Mientres el desenvolvimientu de les idees y la presentación de propuestes, los participantes van cuntar col sofitu de mentores de Microsoft y d’Asturies, según cola supervisión d’un conseyu asesor coordináu pola Conseyería de Ciencia, con cuenta de los meyores conceutos convertir en proyectos que contribuyan a salvar el planeta.

  • La versión n’asturianu de WORDLE en PlayPresta conviértese nun ésitu viral

    La versión n’asturianu de WORDLE en PlayPresta conviértese nun ésitu viral

    La plataforma de conteníu n’asturianu, PlayPresta, xunto con Cuatro Gotes Producciones y en collaboración Softastur presentó va pocos díes la so nueva propuesta d’ociu, Wordle, tres sacar va poco’l xuegu viral creáu pol New York Times, Caxellu. Trátase d’un xuegu que se fixo viral nel mes de xineru en dellos idiomes, como castellám ya inglés, y qu’anguaño sigue siendo un ésitu nes redes sociales, llugar nel que se pueden compartir los resultaos. Y agora, gracies a PlayPresta, tamién puede xugase n’asturianu. Una simple güeyada a la etiqueta #WordleAsturianu en Twitter amuesa l’importante tráficu que ta xenerando la versión asturiana d’esti xuegu.

    El xuegu n’asturianu, que na so versión inglesa ta acabante merca precisamente el New York Times, súmase a la llista del xuegu n’idiomes presentes nel estáu español; agora mesmo amás de n’asturianu y castellán, tamién se puede xugar en catalán, gallegu, vascu y aragonés. 

    Pa xugar vas tener seis oportunidaes caldía p’aldovinar la pallabra que s’escuende tres el tableru. Ha introducise pallabres de cinco lletres, siempres que tean presentes nel Diccionariu de l’Academia de la Llingua Asturiana (DALLA), entidá que collabora con esta edición, y pueden repitise lletres. Cuando la lletra nun tea na pallabra, el fondu sedrá negru, mientres que si ta en mariellu, la lletra ta, pero non nel llugar correctu. A lo último, si ta en verde, la lletra ta nel llugar correctu.

    El proyectu de Wordle Asturianu súmase al xuegu Caxellu que PlayPresta punxo a disposición del públicu va unes selmanes. El director de la plataforma PlayPresta, Inaciu Galán, esplicó esta nueva llinia de trabayu: “Tamos queriendo ufrir ferramientes nueves d’entretenimientu col asturianu como llingua vehicular a la comunidá asturfalante, especialmente pesando na xente mozo y col envís de da-y espacios nuevos d’usu al asturianu, con xuegos que tán de plena actualidá nel mundu enteru y a los que pue accedese tamién dende la llingua asturiana”. 

    El xuegu yá ta disponible: https://wordleasturianu.playpresta.com/ 

  • Café Quijano, Dani Martínez y La M.O.D.A actúen esta selmana na Llaboral

    Café Quijano, Dani Martínez y La M.O.D.A actúen esta selmana na Llaboral

    Café Quijano, Dani Martínez y LA M.O.D.A. actúen esta selmana nel Teatru de la Llaboral. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.

    El vienres 28 de xineru, a les 21:00 hores, Café Quijano vuelve a la Llaboral col so tour Manhattan, títulu del so nuevu trabayu y continuación del guo álbum superventas La tabierna del buda (2001), coincidiendo col 20º aniversariu de la so publicación. Manhattan ye la fiel continuación del soníu “quijano” de los sos primeros ésitos, al que se suma esi llinguaxe peculiar que caracteriza a toles composiciones del grupu con hestories que son puros curtiumetraxes. Nesta xira, amás de los nuevos temes, el grupu va faer una repasada de los sos boleros orixinales y de tolos ésitos collechaos nos sos 25 años de carrera.

    Per otra parte, Dani Martínez trai el so show Ya lo digo yo! a la Llaboral, con dos funciones a les 18:00 y 20:30 hores pa les que s’escosaron les entraes. Nel so nuevu espectáculu céntrase en temes que pasen inalvertíos pa la mayoría de la xente, pa lo que s’ayuda d’una gran pantalla, música, efectos visuales y imitaciones nun show onde ta bien presente la improvisación.

    El domingu 30 de xineru, a les 20:00 hores, La M.O.D.A. (La Maravillosa Orquesta del Alcohol) va presentar el so nuevu discu, Nuevo Cancionero Burgalés, inspiráu nel repertoriu popular de la so tierra, con lletres sacaes de los cancioneros populares de Federico Olmeda y Antonio José y música compuesta pol grupu. El colectivu, formáu por siete componentes, combina preseos como acordión, saxo, banjo, mandolina o clarinete con influyas variaes. Editó cuatro LP′s y un par de discos en directu y percorrió el circuitu de sales y festivales del país, amás de tocar en México, Colombia, Francia, Italia, Países Baxos, Irlanda, Reinu Uníu y Estaos Xuníos.

    Les entraes pa los conciertos de Café Quijano y La M.O.D.A. tán disponibles na Recepción de la Llaboral, nel Centru d’Información Turística del Principáu (CITPA) n’Uviéu/Uviéu, nel Centru Niemeyer n’Avilés, vía telefónica nel 985 969 708, n’entraes.liberbank.es y na web de Llaboral Ciudá de la Cultura, onde vase comunicar cualesquier cambéu na programación.

  • Caxellu, el xuegu nuevu de Play Presta, ta siendo un ésitu

    Caxellu, el xuegu nuevu de Play Presta, ta siendo un ésitu

    La plataforma de conteníu online n’asturianu PlayPresta ta acabante de llanzar na so web y redes sociales el xuegu nuevu, Caxellu, que desenvolvieron y que yá ta disponible nel siguiente enllaz: https://caxellu.playpresta.com/. La propuesta trátase d’un xuegu nel qu’hai que combinar siete lletres pa formar pallabres y ye una adaptación del popularizáu xuegu del New York Times, Spelling Bee. Nos primeros díes, el númberu de participantes ta siendo un ésitu.

    La iniciativa, que llega agora a Asturies gracies a PlayPresta y Cuatro Gotes Producciones, ye un ésitu n’otros llugares del estáu, como Cataluña, onde’l lleva’l nome de Paraulògic y rexistró cifres que fixeron que los servidores colapsaran en dalgunos momentos. Los datos de participación siguen medrando, y ye que en dalgunos díes de les fiestes de Nadal, el xuegu llegó a cifres d’ente 120.000 y 137.000 persones, lo que dexa bien claro l’ésitu que tuvo y que sigue teniendo. 

    La creación del xuegu na so versión n’asturianu foi trabayu d’un equipu dirixíu por Inaciu Galán, cola xestión dixital a cargu del informáticu Óscar David Colorado Espina y col diseñu gráficu, basáu na idea del xuegu como un caxellu d’abeyes y de l’abeya Olaya como símbolu, pol reputáu ilustrador Enrique Carballeira. Amás, cuntaron cola collaboración de los creadores de la versión catalana del mesmu. L’Academia de la Llingua Asturiana collaboró tamién apurriendo’l corpus del diccionariu normativu de la institución, que ye la base na construcción de pallabres.

    Les normes del xuegu esixen formar pallabres coles lletres del caxellu, siete, pueden repitise y que se renueven cada nueche a les doce, pa dar entamu a un xuegu nuevu. La lletra del caxellu del mediu ye d’usu obligatoriu en toles pallabres que se faigan, qu’han tener un mínimu de trés lletres.

    De los verbos almítense namás los infinitivos (non les formes conxugaes). De los nomes y axetivos almítense les formes masculines, non les formes femenines y neutres, nin los plurales, pel momentu, anque l’equipu ta trabayando p’ameyorar esta opción. Nun s’almiten nomes propios; namás pallabres que tean dientro del Diccionariu de la llingua asturiana de l’Academia de la Llingua Asturiana (DALLA).

    Pa recoyer “la collecha de puntos”, les pallabres de 3 lletres dan 1 puntu, les de 4 lletres, 2 puntos y de magar les 5 lletres, tantos puntos como lletres tenga la palabra. Cada xuegu inclúi lo menos una ‘cortía’ na que s’usen toles lletres y con cada cortía’l xuegu date 10 puntos estra. El términu “cortía” provién del ámbitu de l’apicultura y fai referencia a la cantidá de miel que se saca al capar o cortar un caxellu.

    El xuegu ta disponible de baldre y adáptase perbién al usu dende’l móvil, permitiendo volver sobre’l xuegu a lo llargo del día y facer por consiguir toles pallabres posibles. 

    Pa Inaciu Galán, coordinador de Caxellu: “esta ye una oportunidá d’ufrir un xuegu interesante y formativu a la sociedá, que pensamos que va ser mui bien recibíu ente toles edaes, especialmente na mocedá, amás de ser una ferramienta interesante pal usu nos centros educativos yá qu’unu recuerda y deprende pallabres mientres xuega”.

  • Retrásase l’aniciu de la temporada en Valgrande-Payares y Fontes d’Iviernu

    Retrásase l’aniciu de la temporada en Valgrande-Payares y Fontes d’Iviernu

    Los espesores de ñeve acumulaos nes estaciones invernales Valgrande-Payares y Fontes d’Iviernu nun van permitir l’apertura de les estaciones asturianes mañana, 26 de payares, día previstu pal aniciu de la temporada d’esquí, nin mientres la fin de selmana.

    La lluvia cayida na xornada d’ayeri miércoles menguó los espesores, anque les previsiones apunten a que va haber precipitaciones en forma de ñeve mientres la fin de selmana que, en caso de cumplise, permitiríen acumular ñeve enforma pa abrir les pistes de les estaciones asturianes lo antes posible.

    Tanto nes páxines web como nes redes sociales de cada estación se va dir informando de cualesquier novedá.

  • El Gobiernu d’Asturies garantiza que Valgrande-Payares cunta con dirección técnica y va iniciar la temporada d’esquí con toles midíes de seguridá

    El Gobiernu d’Asturies garantiza que Valgrande-Payares cunta con dirección técnica y va iniciar la temporada d’esquí con toles midíes de seguridá

    La estación de Valgrande-Payares va empecipiar la temporada d’esquí con toles garantíes de seguridá para les persones ususaries. Asina lo aseguró güei la directora xeneral de Deporte, Beatriz Álvarez Mesa, quien esplicó que l’equipamientu ivernizu “cuenta col contratu a valir de responsabilidá técnica o dirección técnica, axudicáu a la empresa Inxeniería y Control d’Obres ya Instalaciones S.L”.

    Álvarez señaló que la seguridá de la estación “ye un asuntu demasiao seriu como para nun crear alarma social innecesaria y que rique rigor  a la hora d’informar”. La responsable de Deporte indicó que Valgrande-Payares va abrir la temporada’l próximu día 27 “con toles midíes de seguridá necesaries”.

    Proyectu de desestacionalización y reconstrucción

    En relación col proyectu de reconstrucción de la estación iverniza y de monte de Valgrande-Payares como motor económicu pal valle de L.lena, Álvarez recordó que’l Gobiernu d’Asturies llogró una financiación de 10 millones de los fondos mineros del Institutu de Transición Xusta, organismu que contribúi col 75% de la inversión, ente que’l 25% apúrrelu l’Alministración autonómica.

    La directora añedió que’l proyectu inicial dimensionóse y esgazóse depués, adaptándolu a l’actuación oxetu del conveniu y adaptándolu a la financiación disponible.

    El proyectu de reconstrucción, que se va executar nuna distribución tresañal (2021-2023), va llicitase a finales d’esti añu o primeros de 2022, tal que s’esplicó na Xunta Xeneral, cola fin d’empezar les obres na primavera del próximu añu al tratase d’un espaciu onde ye complicada cualquier actuación pel iviernu.

    Coles mesmes, la directora de Deporte especificó que para la primer fase propónse la execución d’un nuevu sistema de tresporte per cable pa la estación qu’inclúi la telecabina Cuitu Nigru, mesmo que l’acurtiamientu de la telesilla Brañil.lín y el desmontaxe de los telesquíes La Hoya y Arroyo, y de los telesillas Hoya de Cuitu Nigru y Les  Patines. ​

  • El Gobiernu d’Asturies va poner en marcha’l 13 d’avientu la Selmana Blanca nes estaciones de Payares y Fontes d’Iviernu

    El Gobiernu d’Asturies va poner en marcha’l 13 d’avientu la Selmana Blanca nes estaciones de Payares y Fontes d’Iviernu

    La Conseyería de Cultura, Política Llingüística y Turismu, al traviés de la Dirección Xeneral de Deporte, promueve la campaña Selmana Blanca, que se va celebrar a lo llargo de la temporada 2021-2022 nes estaciones d’esquí de Valgrande-Payares y Fontes d’Iviernu, depués d’un añu nel que nun pudo llevase a cabu por cuenta de la pandemia.

    Esta iniciativa, que va empezar el próximu 13 d’avientu y va allargase hasta’l 17 d’abril de 2022, empobínase a tolos centros educativos públicos y concertaos del Principáu, tanto de Primaria como de Secundaria, igual qu’a los colexos d’educación especial.

    El so principal oxetivu ye fomentar el deporte blancu ente los escolares, amás de la convivencia y el contactu cola naturaleza.

    El programa, como en campañes anteriores, va poder tener una duración d’unu a cinco díes ya inclúi agospiamientu, arriendu del equipu y clases d’esquí, amás d’un forfait que da derechu a accesu ilimitáu a los remontes en funcionamientu nel períodu solicitáu.

    El periodu d’inscripción abrirá’l llunes que vien, 15 de payares, y la Dirección Xeneral de Deporte espera una alta participación de los centros educativos.

  • Teatro del Cuervo ensaya Orsai nel Teatru de la Llaboral

    Teatro del Cuervo ensaya Orsai nel Teatru de la Llaboral

    La compañía Teatro del Cuervo ensaya’l so nuevu espectáculu, Orsai, del 25 al 27 d’ochobre nel Teatru de la Llaboral. 

    Sergio Gayol protagoniza esti monólogu nel que nos adientramos na vida d’Amancio, un humorista en fuera de xuegu que nos ufre’l so espectáculu definitivu, Orsai, un intentu desesperáu de recuperar a la so muyer y  a la so carrera.

    Teatro del Cuervo, compañía de teatru asturiana de más de catorce años d’esperiencia, produz Orsai, con testu y dramaturxia de Sergio Gayol y Patricia Rodríguez; la última ye tamién responsable de la dirección escénica. Eduardo Espina encárgase del diseñu de lluces; Azucena Rico, del vestuariu; Josune Cañas, de la escenografía; Roberto Lorenzo, del diseñu de soníu; Carlos José Martínez compón la banda sonora; y Rebeca Martín Tassis coreografía l’espectáculu.

    La compañía alcuéntrase ensayando na Llaboral nel marcu del Programa de Residencias del Centro de Recursos Escénicos del Principáu d’Asturies, un proyectu con sede en Llaboral Ciudá de la Cultura qu’ufre sofitu a la creación artística de les compañíes profesionales asturianes, poniendo a la so disposición recursos económicos, instalaciones y medios técnicos qu’impulsen la creación escénica de profesionales de la rexón. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.

  • Gozón saca de nueves les calabaces a la cai

    Gozón saca de nueves les calabaces a la cai

    L’Ayuntamiento de Gozón va organizar el sestu concursu de calabaces dempués de dos años de parón obligáu pola situación sanitaria derivada del andanciu. L’eventu (de baldre) va tener llugar el domingu 31 d’ochobre, a les 18.00 hores nel parque Zapardel de la villa. Les inscripciones van poder formalizase el mesmu día ente les 18.00 y les 20.00 hores nuna carpa instalada en dicho parque. Un xuráu integráu por personalidades vinculaes a les artes y la cultura del municipiu va elexir a les ganadores en tres categoríes: calabaza natural meyor tallada a mano, calabaza más orixinal y calabaza de mayor interés cultural. El fallo va dase a conocer a les 20.30 hores aproximadamente. Como novedá, el públicu va poder elexir  la so calabaza preferida al traviés de votu directu nuna urna.  

    Dende la organización, pídese evitar les referencies asociaes a la celebración estadounidense de Halloween, yá que ún de los oxetivos del certame ye poner en valor esta tradición de orixe celta.